طول عمري كنت بحلم أعيش قصه حب شبه قصص الروايات والمسلسلات التركيه، مكنتش أتخيل أبدًا اني أعيشها من طرف واحد! استنزاف في مشاعري، وجع ونغزه في القلب مبتنتهيش، خوف... والكلمه دي لوحدها بترعبني، خوفي من اني أفقده بعد سنين كتير أوي حلمت إنها تجمعنا وأهه قد كان، بس جمعتنا على الورق وبس.
_نص ساعه وهعدي عليكي علشان نروح نجيب الشبكه.
_مش لازم شبكه ي فرحات، كفايه اوي دبله وبس.
_مش عاوز كلام تاني ف الموضوع دا، يالا اجهزي.
قلبي وجعني بشكل غريب، أنا مش محتاجه شبكه والله يكفيني دبله بسيطه جدًا منه وبس، مقدرتش أسكت عن الموضوع دا ف كلمت رضوى اخته.
_حاولي ي رضوى علشان خاطري أقنعيه.
_حنان انتِ اكتر واحده عارفه انه فرحات مش هيرجع ف كلامه نهائي وخاصه بعد الموضوع اللي حصل دا.
_تمام.. افرض جاب الشبكه.. هنتجوز منين؟ انا عارفه ظروفه ومش عاوزاه يكون مديون لحد أبدًا كفايه أوي الدبله.
_هو اتفق مع باباكي على الشبكه ومش هيرضي بحاجه زي دي أبدًا، أنا حتى اتحايلت كتير عليه أوي انه يتجوز قبلي ورفض علشان يقدر يجوزني، بس انا متأكده انه ربنا هيدبرها والله متشيليش هم حاجه.
ازاي مشيلش همه! انا فرحتي مش كامله وانا شيفاه بيشتغل وبيتعب ليل مع نهار، مش قادره أخفف عنه ولو بجزء بسيط، حتى مبيشتكيش ولا بيقول انه تعب أبدًا، دايمًا بيحاول يبين انه كويس، بس هو مش كويس أبدًا!
كلمني وقال انه تحت البيت هو ورضوي ونزلتلهم، كنت مستنيه يقول اني شكل حلو، وفستاني جميل.. بس حتى مشافنيش! كان ساكت طول الوقت وسرحان ورضوي كانت بتتكلم في أي كلام تداري بيه زعلي وتحاول تفرحني لغايه ما وصلنا قدام محل الدهب.
_فرحات يعني لو...
_حنااان..قفلي على الموضوع دا بقا.
بصيت لرضوي كان نفسي تقول أي حاجه تقنعه بس متكلمتش، جاله مكالمه وملامحه اتغيرت نهائي،فطلب مننا انه نركب العربيه علشان يوصلنا.
_نرجع ليه؟ اي اللي حصل!
_محمد صاحبي اخدوه على المستشفى وتعبان لازم اروحله.
_طيب ممكن تمشي إنت واحنا نجيب الشبكه.
_خلاص تمام.
حسيت انها فرصه كويسه وجاتلي لغايه عندي، مع اني كنت مرعوبه من القرار اللي أخدته بس هو دا أنسب حل.
_يالا ي حنان نجيب الشبكه
_بصراحه انا مش عاوزه شبكه
_ايييه؟
_أرجوكِ ي رضوى، تسمعيني من غير أي نقاش
بعد محاولات كتير جدًا في اقناعها باللي انا عاوزاه واقتنعت ف الاخر.
فرحات تعب جدًا من هو صغير، يمكن مقضاش
طفولته زي صحابه اللي ف سنه، مامته اتوفت وهو عمره15 سنه، وكانت رضوى عندها 12 سنه وللأسف من بعد وفاه مامته بسنتين بس باباه اتجوز وسابهم لوحدهم! سابهم من غير ما يصرف عليهم! من غير ما يطمن عليهم ولا يعرف عايشين منين ولا ازاي!
كان أكبر وجع ليه هو فقدانه لوالدته لإنه كان متعلق بيها جدًا وكانت آخر جمله قالتهاله انه ميطلعش قاسي زي باباه ويحافظ على أخته ويتقي ربنا في اي بنت هيرتبط بيها، كان تاني وجع يعيشه لما البنت اللي حبها واتمناها من الدنيا دي كلها متكونش من نصيبه، راح أتقدم ليها بس باباه رفضه لسببين: الأول :لان فرحات طلب منه يخطبها بس مش هيتجوزها غير بعد أما يجوز رضوى أخته الأول ويطمن عليها ، والتاني : انه والد حبيبته طلب منه مهر وشبكه فرحات ميقدرش عليهم أبدًا.
