-هتمشي برضوا؟
_لو مش هتوصلني بعد اذنك تطلبلي تاكس ..
شال الشنطة ونزل من غير ما يتكلم
هو عارف إني مش هقدر أفضل معاه بعد اللي عمله
عارف كويس إن مينفعش ييجي على كرامتي بالطريقة دي، أو يقلل من إحترامي كده ..
ده احترامه ليا من احترامه لنفسه !
وصلت البيت وسلم على ماما ومشي بحجة أنه وراه شغل
مقولتش لماما أي حاجه، جايه بس أقعد معاها أسبوعين ولا حاجه علشان وحشتني .
مقتنعة تمامًا إن مينفعش أي مشكلة بيني وبين جوزي تخرج بره حتى لو لأمي ..
أنا وهو هنتصافى وهيرجع الود بينا بس هي هتفضل شايله منه غصب عنها ..
فات أسبوع وتقريبًا علي بيتصل بيا كُل يوم بس أنا مش قادرة حقيقي أرد عليه
مش قادرة أكلمه بعد ما اتصرف معايا بالطريقة دي
أنا عمري ما كنت أتخيل أنه يعمل حاجه زي دي ..
أنا بعترف إني غلطت وأوي كمان
مكانش ينفع أحكي حاجه عن أهلي ليه في فترة خطوبتنا ولا أحكي عامًة ..
كان لازم تفضل صورتهم نضيفة قدامه مهما عملوا ومهما حصل أنا فعلًا غلطانة.
كنت تقريبًا بقضي اليوم كله في أوضتي ومبخرجش
خايفه اتعب تاني بسبب اللي كان بيحصل دايمًا هنا بس
مش عارفه البيت هنا بقى هادي أوي عن الأول !
مبقوش بيتخانقوا .. !
طول فترة وجودي هنا مسمعتهومش بيشدوا مع بعض وده حاجه مش مآلوفة بالنسبالي!
اتعودت منهم على زعيق وخناق كل يوم ومشاكل على اتفه الأسباب!
يمكن ده سبب كبير في إني كنت بهرب لـ علي وأحكيله
كنت بحس إني مرتاحة لما بتكلم معاه..
مكونتش عايزاه يعمل معايا كده، كنت خايفه إن حياتنا توصل للمستوى اللي أهلي وصلوله ده ..
كنت مرعوبة، مش هقدر أكمل حياتي كلها بشكل غير مستقر كده
بعد عزلة طويلة في أوضتي قررت إني أخرج أقعد معاهم
كنت لسه هدخل الصالة سمعتهم بيتكلموا فوقفت
مكانش قصدي أتصنت لكن الكلام صدمني فغصب عني وقفت ..
بابا وماما مقررين ينفصلوا !!
وبابا بيحب واحدة تانية !!
بعد العمر ده كله !!!
طب ازاي أنا معرفش حاجه زي دي؟؟
يعني كمان ماليش حق أعرف ؟؟؟
مشيت بسرعة ودخلت على أوضتي
مبقيتش مستحملة أي حاجه
ولا أي حد .
طيب أستحمل ايه ولا ايه!!
طب عيلتي اللي المفروض بتخفف عني ولا زوجي اللي هو عوضي وسندي فالدنيا !
-أنا هنزل أقعد ما تيتا وجدو تحت يا ماما
_اشمعنا كده يا ندى هو أحنا ضايقناكي في حاجه ؟
-لا بس هما وحشوني جدًا بس ..
سكتت ونزلت وبابا طبعًا معترضش
هيعترض ليه وهو مش فارق معاه أصلًا !
-وشايلة هم الدنيا فوق راسك ليه ؟
حضنتها وعيطت، تقريبًا كنت مستنية أي حد يكلمني علشان أعيط وستي هي أكتر حد بيفهمني وحنين عليا ..
