سليم ' بخوف ': انت بتقول ايه
عائش : هي ...هي بتتنفس بس نفسها ضعيف، حازم أتصرف
سليم : حاااازم فوق واتصرف...
عائش ' بدموع': سليم اعمل حاجة حازم مش بيتصرف هو حاضنها بس
ايسل: خديها من بين ايديه ونوديه المستشفى حالا
عائش: ايوا كلامها صح... سليم يلا ناخدها المستشفى
-------
حازم ' مش فاكر ايه اللي حصل ولا مستوعب لدلوقتي كلامها وشكلها وهي بتعيط. ..هي مكنتش طبيعية كان جسمها بيترجف بين أيدي من كتر العياط. ..لما اغمي عليها معرفتش اعمل ايه. .ناديت علي اي حد يتصرف، كل المواقف والمشاكل اللي حصلت معايا وخوفي وقتها متجيش حاجة جنب خوفي وهي مش بتننفس خوفي اني اخسرها او يحصلها حاجة كنت تايه وخايف زي العيل الصغير. ..حسيت ان الدنيا كلها فضيت وضلمت قدام عنيا، مفوقتش غير وسليم بياخدها من بين ايديا وبيشيلها ويجري عليها فضلت قاعد مكاني ومتحركتش فوقت علي صوت جدي وهو بيحط ايده علي كتفي
- حازم يابني...
" هي مش بتتنفس"
- متخفش هي كويسة ، سليم وعائش معاها وهي دلوقتي بخير بس نايمة
" هي كل الايام دي كانت زعلانة مني. ... هي مفكرة اني بكرهه ياجدي، والله العظيم قلبي مدقش لغيرها انت الوحيد اللي عارف اني بحبها، انت اللي اكتشفت اني بحبها من وانا عندي 15 سنة انتي وقتها اللي عرفت معني لمعة عنيا لما بشوفها، وقتها فسرتلي معني ابتسامتي اللي بدرايها لما هي تضحك، انا لسه فاكر لما كانت بتغلط كانت بتيجي قدامي وتضحك وتقولي أنها مستحيل تخاف مني لانها عارفة اني هسكت قدام دموعها ..ليه مستمرتش حياتنا علي المنوال كده ...ليه ياجدي سمحت لابويا انه يقويني عليها، ليه خليته يزرع فيا ان الحب بيضعف ويذل ولو حبيت اتجوز اللي بحبها بس مقولهاش...ليه خلاني ادوس عليها لحد مابقيت تترعب مني .. انا بحبها عشان كده اتجوزتها بس انا قدامها مش بعرف اتكلم مش بعرف أقولها علي اللي جوايا ، ليه ياجدي خليتني اقسي عليها. ..ليه محدش وقف في وشي، ليه خلتوني أحبها بيني وبين نفسي بس "
- اهدا...انت غلطت وابوك للاسف اتربي على قسوة جده وأخواتي ..اول ماتفوق فهمها كل حاجة قولها علي الي في قلبك وبطل جبن، مش رجالتنا اللي تخاف من الحب، هي بتحبك بس عنادها منعها من أنها تعترف. ..هي مراتك دلوقتي قولها كل حاجة ...يلا روح المستشفى اقعد جنب مراتك
" حاضر ياجدي "
---------
مكنتش قابلة تشوفني حتي ، كان سليم وامي وامها وعائش معاها ..كانت تعبانة جدا وباين على عنيها، كان سليم حاضنها وبيقرالها قران...
- مش هتدخلها
" دخلت وهي مش قابلة تشوفني ياعائش"
- ابيه حازم انا معرفش ايه اللي حصل بس موكد هي زعلانة منك بسبب ايسل
" ايسل؟"
_ ايوا ياابيه ايسل كانت بتتعمد تتكلم عنك قدامها وتتكلم عن فترة الجامعة وانك علطول كنت بتساعدها وكلامها صراحة خلانا نشك انك بتحبها
" انا مبحبهاش ان كنت بتعامل معاها كده عشان اخوها "
- معرفش بس ابقي افهم الفت بكرا كده كده هي هترجع البيت بكره الصبح
" تمام وانا هشوف حل للموضوع ده"
----------
" ايييييييسل"
-حازم. .خير في ايه؟
" انتي فهمتي مراتي ايه؟
- مش فاهمة قصدك
" لا اتعدلي كده انا مش بحب الاستهبال....انتي كنتي بتتكلمي مع الفت في ايه "
- مالك زعلان قوي كده ..فهمتها الحقيقة واني بحبك وانت بتحبني
حازم ' بعصبية ': لا ياهانم انا عمري ماحبيتك وانتي عارفة كده كويس. ..من اول مرة قولتيلي فيها انك بتحبيني قولتلك فيها اني بحب واحدة تانية وهتجوزها
- هي فيها ايه احسن مني ...دي عيلة صغيرة، انا احلي منها في الشكل وكمان اذكي منها، هي غبية ومبتعرفش حاجة غير العياط وطولة اللسان وكمان دي مش بتحبك
" ايسسسسسل ....يمين بالله لولا انك واحدة ست كان زماني دفانك دلوقتي. ..اللي بتتكلمي عنها دي بنت عمي قبل ماتكون مراتي فاهمة ...وهي احلي منك في الشكل مليون مرة وفي الطبع وانا بحبها ومش محتاج رأيك ..انا شايفه بقلبي ومش محتاج رأيك فيها ...انا كلمت اخوكي بكرة ييجي ياخدك لانك مش مرحب بيكي وسطينا"
----------
- ممكن بقي تردى
" لو سمحت انا عايزة انام. ..ممكن تطلع وتقفل الباب وراك "
-الفت متعصبنيش
اتعصبت" اديني قومت اهو. ..خير يادكتور حازم، هتعزمني علي فرحك انت ودكتورة ايسل امتي "
ضحك ' لما اعملي فرحنا الأول ابقي اعمل فرحي انا وايسل '
" وانت فاكر اني هخليك تتجوز عليا ..والله اطلق علطول، انا اقطعك كدا واحطك في أكياس وارميك لكلاب السكك"
قرب مني' هتقطعي مين؟'
" جوزي"
- اللي هو مين؟
"معرفوش"
- نعم ياختي. ..امال انا ايه؟
" انت ابن عمي "
مسكني من شعري ' بت اتظبطي كده ...انا جوزك وطلاق مش هطلق "
" خلاص انت ابن عمي وجوزي وهتطلقني عشان تتجوز ايسل"
- الفت ممكن تسمعيني وتبطلي عند ...ايسل علاقتي بيها كلها في الكلية كانت صداقة ومساعدة مني ليها عشان أخوها كان بيطلب مني اساعدها وانا مكنتش بحب احرجه بس انا محبتهاش والله انا حبيت واحدة بس من صغري، وبعدين مش انا اللي احب واحدة واتجوز غيرها، انا لو حبيت واحدة هتجوزها علطول ياهانم '
" وانت بتحب مين بقي ان شاء الله ؟"
- الفت انتي ليه غبية؟ يعني بقولك اللي بحبها هتجوزها، وانا متجوزك انتي يبقى بحب مين؟
" وانا اعرف منين؟ "
- الصبر يارب علي غبائها. ..يارب عيالي ميكونش اغبياء زيك
" وانا مالي بعيالك ؟ هو انا امهم مثلا؟ "
اتعصب ' الفت بطلي غباء،،،، انتي هتكوني مراتي وعيالي هما عيالك وانا بحبك انتي'
ضحكت " طيب ماتقول كده من الأول ... وانا أيضا ياعزيزيي لاف يو كتير"
ابتسم وغمازاته بانت' كلميني عربي لأني مش فاهم لغات '
" انت برضوا ساقط لغة عربية "
مسكني من اللبس' بتقولي ايه بقي؟'
" بقول بحبك ياابو العيال"
-
' بعد 12 سنة '
" يوسف متعصبنيش يا حبيبي المبتدا مرفوع ياحيوان"
يوسف : ياماما بنسي الله
حازم : يعني صوتكم عالي خير
يوسف: يابابا هي ماما عصبية وبتزعق كتير
حازم : يعني انت مش مستفز وعصبتها
يوسف ' بضحك': ابدا يا بابا
" حازم خلي ابنك يمشي من وشي احسن اقتلك انت وهو"
حازم : امشي يايوسف اعمل كوباية ليمون لماما وتعال
يوسف : حاضر يا بابا
حازم : خير بقي يافروالة مالك زعلانة؟
" ابنك اديلي ساعة بشرحه المبتدأ واقوله انه معرب ومرفوع وهو بيكسره....ابنك هيطلع ساقط لغة عربية زيك "
- ياام لسان طويل انا داخل طب وناقص في العربي نص درجة بس ...وبعدين مالمبتدا مكسور
" ودا نحو اخترعته جديد ياروحي "
ضمني ' لسانك طويل بس بحبك. ..اسمعي ياستي
إن جئتك مكسورا فضمك واجب
انا في هواك اخالف الاعرابا
" انا مفهمتش غير انك ساقط لغة عربية وامشي من وشي انا هروح انام وذاكر لابنك "
- يا الفت استني
" والله لادخل انام وذاكر انت لابنك وابقي اشرب الليمون وروق اعصابك...سلام ياعمرررري"
يوسف : انت هتذكرلي يا بابا؟
- اذكرلك ايه يابني. ...يلا ندخل نلعب بلايستيشن. ..قال مذاكرة قال
يوسف : احلي اب دا ولا ايه
إن جئت مكسورا فضمك واجب
أنا في هواك اخالف الاعرابا 💜
#صغيرتي
#خلود ناجي
#رايكم💙
