منقذي ذو النجوم

بارت 35

منقذي ذو النجوم

الكاتبه غدير العزاوي

..

ركضنا كولنه ويسبقنا حسام والشباب مااشوف اله حسام شايل علي وكأنه جثه هامده وكفت كدامه....

-وين مااخذي شبي كولولي شبي اني هسه بدلته باايدي ونزلته شصار هو مابي شي مو مابي شي ...

-اهدي اهدي مابي شي بس افتحيلي طريق نستعجل نروح للمستشفى...

-اوكفو اني هم اجي وياكم انتظروني...

طلعو الولد بدون ماياخذوني واني بقيت بلبيت كاعده وابجي وهمه يهدون بيه كلهم حجت ام حسام..

-شنو هل صلافه يعني واذا هسه صار شي بلولد وين نودي وجهنه بس شنكول غير انه انتِ فكر ماكو منج هو اني من البدايه جنت معارضه هل زواج بس ابني مايبطل هاي السوالف هسه اذا صار شي بيهم ...

-عمه يعني شيصير بيهم ماتكليلي تره علي هو الي جان واكع مو احد من ابنائج ...عفتهم يحجون ع ام حسام بيبي هم جانت تحجي عليها ماخلن حجي ماحجته....وطلعت للغرفه

هو شوكت الراحه دايمتلج ياريم شوكت بس اريد افهم كل يوم افرح بي لازم ادفع ثمن الفرح الي فرحته بحزن.....

سمعت صوت السياره نزلت بسرعه وركضت ردت اوكع لزمتني زمن...ركضت ع علي وكلت مابي شي موو احجو مابي شي ..اخذته لحضني جان نايم واني احجي ويا وابوسه واحضنه اخذه حسام من ايدي وخلا بغرفة بيبي كال هسه نايم...

دخلت للغرفه ويه علي وكلهم طلعو...

كعدت يم راسه واني احجي واكول كل الي بكلبي وكأنه هو هسه جبير ويسمعني ويفهمني اريدك تكون سندي من تكبر ولابيوم حسيت شنو معنى الاخو لانه جنه محرومين هل يجي يوم وتعوفني مثل رزان لو تبقى يمي لو هم يقشمروك بحجايتين وتروح ..

هم راح يجي يوم واشوفك بي جبير وتوكف وياي بلصغيره قبل الجبيره ...حجيت وفضفت كل الي بكلبي وطلعت جانو كاعدين بلصاله اشرلي حسام اروح يمه...

رحت يمه وكعدت واني اسأل اي وشنو صار وشنو كالو الاطباء ...

ماحجو شي كتلهم انطقوا احجو شي ...

-عنده حاله مثل الصرع كالو الاطباء وهذا مراح يبقى ويا طول العمر فتره قصيره بس يتعالج بيها ويحتاجله جو هادء وراحه تامه....واضافة الى هذا من نتائج الحاله النفسيه الي مار بي ...ومن التعذيب...

عرفتها رزان الحقيره ماتخلي علي براحته ...مااكول غير الله يسامحها ...

وره ماكعدنه شويه حسام اخذ علي بحضنه وصعدنا للغرفه نومنا بلجربايه بيناتنا....

جنت موقته الموبايل لااذان الصبح كمت افتريت يم حسام وكعدته يصلي صلينه هو كدامي واني ورا...شكد حلو واحساس فوق الروعه وتحسين نفسج من صدوك امرأه من توكفين بلصلاة وره زوجج ....كولش احب هذا الشي...