منقذي ذو النجوم

بارت 38

منقذي ذوم النجوم

الكاتبه غدير العزاوي

..

ولج اريج وينهم امل وعلي وحنين ....ردت اريج بعدم مبالاه ماادري همه كالو مانريد نلعب وياج عفتهم واجيت ...

صخام يااريج ليش تعوفيهم ...هسه وين يكدرون يجون تره مو كبار همه امل ٣ سنوات وحنين سنتين ونص وعلي وين يكدر عليهم اخخ منج يااريج ...زين اوك اني دزيتج ع تمن جبتي ...

لا ماجبته علي كال الا اني اني ...وهيه تقلده بصوتها الناعم ...

بقيت انتضرهم بلباب صاحت فاطمه ...ولج ريم يله وين صار التمن بسرعه ...

اوكفي ولج ماادري وين صاروا اريج عايفتهم وجايه ...ها ذولاك شفتهم اجو اجو...

علي كايد ايد امل من جه وايد حنين من جه والتمن باايد امل وهمه يمشون ويضحكون وبايعين الدنيا الي يكولك انه احنه هسه منتضريهم ع بيض مكسر ...شويه ويوصلون الولد ...

طبوا للبيت علي الي سماره بلشمس صاير اسمر بعد ومناك حنين الي تصب عرك ...درت وجهي لااموله ...شفت شعرها السرح يطاير وخدودها الورديه وخشمها هم....

-علي ليش اتأخرتوا هيج...

-مااتخرنا بس دارو التمن جانو يتعاركون علي منو يشيله وذبوا بلكاع رجعت لاابو المحل ينطيني جيس ثاني بس الحقير بلكوه قبل ماادري ليش ...

-رديت علي بضحك ولك غير انتوا الي ذابي بلكاع شدخله ابو المحل ...

واحنه نحجي والجو حار بلحوش دخلوا حسام ومهدي...ركضت امل لمهدي ومهدي شالها ويفتر بيها...

-الحمدلله ع سلامه مهدي ...شلون جانت سفرتك ...شويه ودخلوا عامر وسامر ومرت مهدي ركضت عليها بوستها من زمان ماشايفيهم ...علمود السالفه العوجه...اخخخ يامهدي شسويت بينه وبهذلتنه.....

-يله يله دخلوا الجو حار...

ركضت ام حسام لمهدي بعد فراف سنتين وهيه هسه تشوفه كلب الام بعد ...واحتضنته بذراعها وهو دنك وضل يبووس بيها من كل جه يعني من صدوك موقف يدمع الواحد...

كعدنه كولنه شويه حجينا وبعدين كمنه حظرنه الغده وفرشنه وكلنا فرحانين بجيت مهدي ....

دزلي رساله اطلع فوك...

عفت المواعين يكملوها ملاك والبنات...طلعت يمه واني الدرج بلكوه اصعده ...

فتحت الباب شفته كاعد ..سديت الباب وتقدمت يمه........

حجه حسام بتنهيده ....تعالي ريمي كعدي يمي ...تقدمت وكعدت...

-ريم حبيبتي وعمري ودنيتي كلها ...اني هم شكد صعبه عليه ...بسس ....

ماكمل حجيه شفت عيونه دمعت ...كام طلع بسرعه من الغرفه واني لحكته ...اريد افتح الباب بسرعه طخيت بلحايط ...دخت شويه ...بس توازنت ..