ريتاج

رقم غريب

قد تعود المياه الى مجاريها دائما كما يقولون
لكنها تعود وهي غير صالحة للشرب 💔

❤❤❤❤❤❤❤❤❤❤

خلصت الحفلة اني وحنين كعدنا ننظف البيت وأية راحت ترتاح بغرفتها او احنه الي جبرناها تروح لان خطية تعبت شكم ساعة وهيه على نفس الكعدة وراسها اكيد صار يوجعها

اسراء واختها كاعدات يم بيبي يسولفن والحجية كاعدة صفح تباوعلنه وتعوج شفتها شكلها ما عاجبها احد تجاهلت نضراتها وتصرفاتها والتهيت ويه حنين

اجه ايهم وشايل احلام بحضنه
فدوة نايمة شكلها بريء وبس اريد اكرط خدودها
وداها ايهم لغرفتهم وحنين استأذنت راحت تبدل لبتها
وضليت وحدي انظف كملت وكعدت بالكاع صحت...بعد ما اكدر اكوم

بيبي...روحي بيبي ارتاحي رجلج يريدج هسه البنات يكملن المطبخ
ريتاج... مابيه حيل اصعد الدرج
بيبي...كومي كافي عجز

صاحت بيه كمزتني من مكاني صعدت وصلت للغرفة
سمعت صوت صقر يحجي بالموبايل
صقر... اي اي ماكوو مشكلة اني من زمان مكنسلها للسالفة وماسح الرقم بس حافظين رقمي عدهم ميطون مفكة

فتحت الباب ما حجيت شي بسرعة اخذت هدوم من الكنتور وفتت للحمام من التعب عظامي توجعني واني طول الحفلة لابسة حذاء عالي تكرمون ما نزعته
دخلت بالبانيو وترسته مي دافي كعدت بيه وعضلاتي رخت الا شويه انام بالحمام لو ما صوت صقر وهوه يصيح عليه

ريتاج... هاا هاا مابيه شي
صقر... لعد طلعي شعندج تأخرتي

كملت غسل لبست تراكسود وطلعت
ريتاج... تعبانه

كلت هيج ومد ايده رحت حضنته وغمضت عيوني
صقر... من شنوو تعبانه
ريتاج... من كل شي

كلت هيج وسكتت
رفع راسي بأصبعه وكال...احجي شبيج ريتاج

ريتاج... تعبت من الشغل حاليا واشتاقيت لأهلي لرغد
صقر... متعبيج بالشغل ليش تشتغلين وحدج اكو كومة بنات بالبيت
ريتاج... المشكلة موو بالشغل صقر الشغل اشتغل منا وبعد كم دقيقة ارتاح اني نفسيتي تعبانة

كملت...بالبداية اهلي مشايفتهم من زواجنه الحجية بيبية اسراء بس نضراتها الي تسويلي ضغط ومتخليني مرتاحة ونوب انته وسالفة صديقك الي بي افلونزا كلها خربطتلي افكاري

صقر... لتفكرين هواي.. أهلج انشالله بس يصير عندي مجال اوديج وتباتين يمهم كم يوم الحجية لتديريلها بال مخبلة وبس تريد حجة حتى تتعارك

ريتاج... وأنته
صقر... أني؟
ريتاج... لتخوفني عليك هلشكل مرة ثانية

ابتسم ورجع حط راسه بركبتي
صقر... بعدج تحطين من هلعطر
ريتاج... اي وأذا خلص احط من مالتك

صقر... عود ذكريني اشتريلج عطر ملابس
ريتاج... عطر وملابس عدي اريد بس نطلع اني وياك وحدنه من بداية زواجنه لسه مطالعين بس لأربيل