بين .. قبرين

البارت الاول

روايه/ بين .. قبرين

البارت الاول

بقلمي الكاتب/حسن الاسدي
------------------------------------------
السلام عليكم أنا نبض طالبه سادس علمي عمري 18 سنه احب دراستي ومن اني وزغيره احلم اصير دكتوره عايشه ويه امي وبوي عندي اخوان ثنين علاء الجبير وامير الزغير
______________________________
نبض.. گعدت من النوم الفجر توضيت وصليت دعيت الله يوفقني جنت فرحانه لان اول يوم مدرسه واني بصف السادس
جنت فرحانه لان بس هاي السنه ودخل كليه صليت خلصت طبكت السجاده وطلعت ملابسي مال مدرسه وحضرتهن وكويت سدريتي وحجابي وكعدت احضر بكتبي سمعت صوت بره طلعت لكيته ابوي جاي يتوضه رحت صبحت علي

نبض.. صباح الخير بويه
ابوي.. صباح النور بنيتي

گعدت امي وخواني

سويت ريوگ أني وأمي جاي اتريك باوعت للساعه بسبعه اله عشر طفرت من مكاني
امي.. يمه بعد وكت كملي ريوكج وراج يوم طويل

نبض.. لا يمه ما الحگ بسبعه ونص يدك الجرس

رحت ركض لغرفتي بدلت ولبست حجابي وخذت جنطتي وطلعت رحت لخوي الجبير علاء

نبض..علاء ما توصلني للمدرسه اليوم اول يوم مدرسه وأبو الخط ما يجي يكول عنده ضرف

علاء.. عادي ما عندي شي اذبج على مدرستج ومناك اطلع لشغلي

نبض.. طلعت وصعدت بلسياره
ولمدرسه بعيده عن بيته وانه اخذت الطريق بس افكر شلون راح اتخرج وصير دكتوره وقطع تفكيري ولد هذه الولد كل يوم اشوفنه حته من اروح للمدرسه اشوفه هناك جايب اخته وصلت للمدرسه نزلت

نبض.. يله مع السلامه
علاء.. الله وياج ديري بالج
--------------------------------------------
طبعن علاء مدرس رياضيات بمدرسه مال ولد عمره 30 سنه هوه طيب بس عنده شي واحد مخرب علي الي هيه العصبيه مزوج بس ما عنده اطفال مرته كلش زينه وطيبه اسمها بنين بس مشاكل هيه ورجلها لان ما يصير عدهم اطفال وصوج من علاء بس ما يقبل يسوي عمليه اطفال الانابيب يكلها رب العالمين ما قاسملنا يصير عدنه اطفال ويوميه مشاكل ومرات توصل للطلاق بس امي وبوي يهدونهم وهسه هيه زعلانه بيت اهلها

ابوي مدير مدرسه بس طلع تقاعد صارله سنتين وصار شيخ اله صيته بلعشيره وعلم اخوي علاء هم على العشاير

امي ربت بيت هدت نفسها لزوجها واولادها

أما امير ثاني سنه كليه قانون
____________________________
دخلت المدرسه هوسه لكيت صديقتي زينب خوش بنيه فقيره هيه وياي من المتوسطه كلش احبها وهيه صديقتي الوحيده
بلكوه خلص الدوام اشكد انطونه تحاضير لان سادس رجعت للبيت تعبانه

لكيت امي جاي تطبخ

نبض.. هلو
امي.. شنو هلو جم مره كايلتلج من اطبين بمكان تكولين السلام عليكم
نبض.. السلام عليكم
امي.. وعليكم السلام ها وين اكو احله من تحيه الاسلام

نبض.. شنو غدانه
امي.. مركه سمج ابوج مشتهيها
نبض.. ستوت لو لا لان كلش جوعانه
امي.. ستوت روحي بدلي على ما يجون اخوانج ياله اصب
______________________________
رحت لغرفتي كلت خل اسبح لان الجو كلش حار دخلت سبحت ولبست دشداشه نيلي وسويت شعري ذيل حصان ولبست قدم اسود
نزلت لگيت علاء جاي رحت للمطبخ لكيت أمي جاي اصب بلاكل ساعدتها جاي نتغده ودخل امير

امير.. السلام عليكم
الكل.. وعليكم السلام

امي.. اكعد يمه ادغده
امير.. لا يمه توني ماكل بلمطعم اني وجماعتي راح اصعد فوك انام كعدوني بلسته العصر
امي.. أنشأالله
_______________________________
خلصنه غده كلت لمي انتي غسلي المواعين لان هستوني سابحه مااريد اتزفر اني راح اخدر چاي خدرت چاي وصبيته بستكاين وطلعت حب وكرزات ويه الچاي وگعدنه نشرب وناكل حب دك تلفون ابوي واحد من جبير عشيرتنه

كله ابو علاء عدنه اليوف فصل تعال انته ولدك ابوي گله انشأالله

ابوي.. علاء يله بويه سمعت الحجي
علاء.. عادي بويه اروح بس اروح ابدل وجي

ابوي.. بويه نبض صعدي كعدي اخوج امير خل يجي ويانه
امي.. خلي نايم عود روح انته وعلاء
ابوي تعصب.. اليوم ما اطلع إذا ما امير ويانه كافي ضال هايت بشوارع من مطعم لمطعم ومن گهوه لگهوه لازم يتعلم على العشاير ولفصول ولكعدات ولازم يتعلم على عاداته وتقاليدنه حته يصير زلمه

امي.. جا شني زلمه ونص
نبض..هسه شني اصعد اكعده لو لا
ابوي.. صعدي كعدي
_____________________________
صعدت دكيت الباب مره مرتين ماكو فتحت الباب ودخلت ضلمه شغلت الضوه وصحته امير
نبض.. امير اكعد ابوي ايكول خل يروح ويانه
امير.. ويييييين
نبض.. ما ادري فصل مدري كعده

هوه من سمع كعده عشاير ما قبل وضل يصيح لان هوه ما يحب هاي السوالف مال عشاير بس اجبر يروح لان ابوي أصر

ابوي عنده الولد بس (يشب) لازم يروح هيج اماكن بس امير انطو على مايه وامي مدلعته

بدلو ولبسو دشاديش وطلعو بسياره علاء وامير صاعد على اعصابه
_______________________________
رحت لغرفتي فتحت تلفوني لان اليوم كله ما فاتحته دكيت على صديقتي زينب وضلينه نسولف وخذتنه السوالف نعست
اترخصت منها وطفيت التلفون ونمت ما ادري بدنيه طشت لو رشت

يتبع.....

---------------------------------------------
حبايبي تصويتكم يخليني اتشجع إنشاء الله تنال اعجابكم
وهاي اول روايه الي

الكاتب
         حسن الاسدي
                          تحياتي