💂❤👸إمرأة هزت عرش الباي👸❤💂

❤الحلقة 28...❤

❄❄❄❄
هند موش مصدقة...فرحتها ما تتوصفش اللي عتقها ورحمها...بالنسبة ليها شاكير منقذها في كل محنها، حاول بش يخرجها تحضر جنازة بوها...وحب يهربها ويمنعها من الموت...لكن هادم اللذات ومفرق الجماعات سي محمد ديما يحضر...حرمها من دفينة بوها و توة حضر ...واقف قدامهم شامخ بخيلاء على حصانو... سواد في سواد ضارب ببرنوسو الأسود وعلى حصانو الاسود عاقد عرنينو شاكك...يعرف و متأكد انو شاكير كسر اوامر الباي و باش يمنعها...صحيح فرح لانو هند عايشة لكن زادة تغشش كيفاش هو كسر اوامر الباي
هو مالو الا عبد مأمور و لازم ينفذ الأوامر...
الله غالب هذا هوا الباي و هذي طريقة تفكيرو....تربى على اسس ما يقبلش نقضها... و اولها التقاعس في تنفيذ الاوامر العليا وبالاخص انو هذي اول قاعدة يتلقاها الجندي في المدرسة العسكرية...وشاكير بخلاف قيمتو العسكرية هو ولد القصر ورباية الباي و نسيبو في نفس الوقت...كيفاش يخالف الأوامر ؟؟؟ و علاش؟؟؟شنوة هالسبب القوي اللي خلاه يحيد على منهاجو؟؟؟...محمد فهمو ملي جاه بطلبها تحضر الجنازة وعرف اللي كان بش يهزها بعيونو المنبثة في القصر لكل...وكان شبه متأكد اللي بش يمنعها...احتمال واحد في الالف انو يعدمها...وعلى هذاكا خلط عليه... بينو وبين الصبايحية وهند خطوات...كان يتبع ويراقب من بعيد...قلبو محروق عليها موش حاببها تموت...وقمة التناقض فرحان بنجاتها وحاقد على شاكير اللي عصا اوامر سلطانو!!!!(تجي تفهم تدوخ )
و هذي النقطة اللي بش تعمق الخلاف بين شاكير و محمد لانو محمد باش يشدهالو زلة و يبقى يبخص فيه بيها... و زادة محمد من الفازة هذي ثقتو في شاكير باش تتمحى...ما تستغربوش... لكن هذا هو الباي شخصيتو و ربايتو تفرض عليه يكون اناني...
عينو تقدح شرار:
-وين على خير انت وياها؟؟؟
شاكير استلبس وما فهمش جيتو...دورها في مخو وعرفو قراه قبل حتى ما يخطي...سكت ما جاوبش...
صاح بأعلى صوتو:
-فهمني...اش تعمل انت وياها؟؟؟ما نفذتش؟؟؟
لسانو تلجلج من عيطة صاحبو وعرفها خلات،لكن هو ولد حرب وما تعلمش يهاب ولا يخاف...يخوض معاركو حتى اخر نفس...وهو قرر هنا لذا يلزم يتحمل نتيجة قرارو حتى اخر المطاف..وهي خلات خلات:
-قررت ما انفذش...هي مظلومة...ما فماش علاش بش نقتلوها....
بهت محمد في جرأة نسيبو:
-نعم نعم!!!من وقتاش تقرر انت ولا تحكم ولا حتى تنفذ من غير اذنا؟؟؟ شنوة ناسبت البايات وغرك مقامك وصورلك اللي انت تنجم تقرر؟؟ولا حتى تنجم ترفض وما تطيعش سلطانك؟؟؟
لهجة هزء وسخرية خلاتو يحس روحو وضيع لا قيمة لا ذات ولا صفات...اهانة كبيرة برغم هي حقيقة...
-انت صنع قصر الباي...و عجينة مطواعة في يد الباي يقلك تمشي تمشي ويقلك موت تموت...وعلا صياح محمد بغضب هادر...وليت تقرر وتنفذ لا تشاور لا تناور ؟؟؟ هذا القسم اللي اقسمتو؟؟؟هذي ثقة الباي فيك؟؟؟
و اللي زاد الطين بلة انو هند تسمع فيه زادت تخبات ورا شاكير تتحامى بيه...الشي اللي خلى محمد يغلغل على شاكير اكثر ...تلفتلها وعينيه نار:
-وانت زيد تتخبى وراه في بالك بش يمنعك مني... تتصور ينجم يعمل حاجة من غير اذني...تتحامى بيه ضدي انا وفي حضوري؟؟؟ اعرف اللي واقف قدامك شكون و اللي قاعدة وراه شكون...شكونو هو ما جا شي ولا يسوى قدامي...(هبل واللي همو وقتها انو يقلل من قيمتو ومقامو قدامها وهذا بش يزيد من حقد ونقمة شاكير)...شاكير كبس على بونيتو عروقو تنفخت مالغل وزاد عليه هند كبست على كتفو تواسي فيه...جاوب بغل:
-ما فماش علاش هالكلام...انتم والدولة والشعب تعرفوا شكون شاكير..
تبسم محمد ورد بسخرية موجه كلامو ليها
-أعرف المقامات يا...(قحرلها وما حبش يسميها) و العين راهي عمرها ما تعلا على الحاجب.. شاكير مالو الا عبد مملوك ينفذ اوامري..
غضب هادر يغلي في داخل شاكير مع قلة حيلتو و مذلتو قدام هند..ما نجمش يرد ولا يعاند لانو يعرف تطير فيها رقبتو توة خاصة شدو متلبس بتهريب المتهمة...بدنو بكلو يرف مالغش و نمل كالخدر سرى في بدنو...زادت عليه صيحة محمد على هند :
-اهبط وايجاني هنا...
بعيون ثاقبة تقدح بكلها قوة وشرار وثقة...بمعنى جرب ما تهبطش وما تجينيش...هند كانت متخبية ورا ظهر شاكير تخزرلو يعيون بكلها ثقة تلمع.. عندها امل انو يعاونها...كبشت فيه و غزرتلو:
-ما نجيش...
تسخايلو لعب ذري...تنطر من على فرسو وصاح:
-شاكيييييير...هبطها...وقلها تجيني...
ويدو على مقبض سيفو تهديد...هند متقوية بشاكير اللي بصوت واطي هامس قالها :اهبط...
تصدمت وحلت فيه عينيها موش مصدقة...خذلها و
غزرلها بعيون كلها مذلة و كسرة و بعد دنكس راسو في الارض...كسر قلب هند اللي حط امالو لكل عليه وخلاها تفهم انو حد ما يقدر ينقذها من هالظالم...
و كسر في نفس الوقت قلب شاكير و خلاه يغلغل على محمد و يكرهو و هو اللي كان في يوم من الايام صديقو المقرب...هبطت هند من عالحصان فاقدة كل امل في النجاة...#منو

✴✴✴✴