💂❤👸إمرأة هزت عرش الباي👸❤💂

❤الحلقة 61...❤

❄❄❄
خالتك حبيبة..تحكي وتلهث..تتكلم بكلام مقطع...حتى هي صعيب عليها اللي تحكي فيه بررشا...هند تسمع فيها وعينيها مزغللة بالدموع مش مصدقة...لدرجة انها قالتلها:
-ايا...اقرصني بش نتأكد اللي انت تحكي معاي توة...
هبطت عينيها ما تحبش تواجهها...حتى هي قلبها يعصر عليها...وجيعة كبيرة وهي تفتت في كبدتها وتلوح بعيد عليها...اما هي تحسب فيها بالعقل موش بالعاطفة...شدتها من ايديها الزوز بايدياتها الزوز اللي يرعشوا ودموعها تقطر:
-يا...يعيشك...قلي اللي تحكي فيه مش صحيح ... ياخي بالجد تطرد في؟؟قتلتني وانا حية؟؟؟مش مستعرفة بي وما مستعرفة كان ببناتك؟؟؟
سيبت ايديها منها ووقفت:
-يعلم ربي...عاضة على قلبي بش نعدي اللي قلتو واللي قاعد يصير...أما ما عنديش حل آخر...انت مشيت وما رجعت...بوك مات...كلامات الناس كلاتنا... في بوهم مات بتهمة سارق...في بنتهم هملت... خليت داري ووين عشت وعزي و خرجت هاربة باخواتك بش نمنعهم...اضطريت نحكي اللي قلتهولك...بنتي كبدتي راك...أما الوالدين كي صغير من صغارهم يمرض بمرض معدي يفصلوا بينو وبينهم بش ما يتعداوش...حتى يهز ربي امانتو...هو ماشي لذا ما نقمروش بالاخرين...نحبك تفهمني...راك عندك مدة لبرا...وحد ما يرحم ولا يقول كلمة خير...كنت جارية في حرملك شكون بش يعطي الثقة فينا؟؟؟...شي اقوى منك ومني...هذا مكتوب والمكتوب عالجبين لازم تشوفو العين...برا ارجع وين كنت...لعل ربي يخفف مكتوبك وتتهنى...نفرحلك..أما بنيتي بعيد علينا خلي نهني على اخياتك...
هند باقي مش مصدقة...تحب تفهم وتقبل اللي امها تطرد فيها ومش قادرة تستوعب...جاتها حاجة اكبر من طاقة استيعابها...وقفت وراها...تتكلم بجوارحها... بشعرها اللي هبط قدام عينيها غزلها تلوح فيه لتالي كينو تحالف ضدها...بايدياتها الصغرونين...بعينيها اللي تلمع بالدموع...
-امي...راهي حتى لو كيف ما تحكي حالة مرض معدي تفصل بيناتهم...أما الام تبقى بحذا مريضها حتى يبرا.. حتى لو يعدي تقمر بروحها وما تسيبش صغيرها لاخر لحظة...امي راني بنتك...راني كبدك...تلوحني؟؟؟... معناها انا الوحيدة اللي نضيع و مشيت فيها؟؟؟....
تتكلم وتبكي...مدت ايديها دورتها ليها...
-امي...ما تقليش شتلوحني للشارع؟؟؟وين نمشي معناها؟؟؟...أيا يزي من هالكلام الماسط....
تتكلم وتمخط وتمسح في خناينها ودموعها بكم روبتها...حست وجيعة قسمت قلبها نصين...مراااارة... بوها حتى اخر لحظة ما تخلاش عليها...وامها؟؟؟باهي مش امها هي؟؟؟
قصت عليهم خديجة دخلت تزرب:
-يا...حماتي في الباب...
مازالت بش تجاوبها وما فاقوا بيها كان داخلة...
-وه وه...تخليوا ضيافكم في الشارع هكا؟؟؟
لحظات مسحت فيهم وجها ورسمت تبسيمة خفيفة وقدمت ترحب بيها...سلمت وعنقت...
-لا وه...كيفاه يجي منو هو؟؟؟ انت مولات الدار توة موش ضيفة...تفضل تفضل للا زارتنا البركة...
قدمت قعدتها واستواتلها المخادد وهي تتكلم:
-تي ماهو تفاهمنا بش نجي نحكيوا في تحضيرات العرس...ما عاد ما مازال...
-ايه للا مرحبا يا مرحبا...
دورت عينيها جات في عينين هند اللي داخلة بعضها:
-شه شه...اللهم صل عالنبي...اش تكون منكم هالبنية؟؟ والله كان موش خطبنا راني فكيتها...
تربثت امها...مهمهت وجاوبت بتبسيمة صفرا:
-بنت جيرانا...جات تطل ومروحة...
اختها حلت فمها ما سكرت وهند قلبها سقط مالصدمة وهنا فاقت وتأكدت اللي امها تحكي بالرسمي...
استوات دبشها وهزت برنوسها خارجة وجهها احمر بش يطرشق من قوة المشهد اللي عاشتو...هزتو وخارجة وتكلمت:
-ايا في لامان...هاني مروحة...
اختها ما فهمتش...خلاتهم وتجري وراها:
-هند...فهمني عيش اختي...ياخي شنية الهدرة؟؟؟
تلفتتلها والدموع تصب:
-امك باعتني...قتلتني بالحياة....بش تعيشوا انتوما... ماليوم ما عندكش اختك هند...اللي يسألك قول ماتت...
وخرجت تجري...ما استناتهاش تشد فيها ولا تفهم منها...سكرت الباب بالقوي ومشات وهي ما عندها حتى وجهة ولا تعرف وين ماشية...#منو

✴✴✴✴