💂❤👸إمرأة هزت عرش الباي👸❤💂

❤الحلقة 30...❤

❄❄❄❄
حاسة قلبي غام عليا و صدري ضيق،رموشي رزاااااان و راسي يوجع عالاخر..مش عارفة انا وين و لا حاسة بشي...فقط نسمع في كلام مش قادرة  نفهم منو شي و لا حتى نفرز منو كلمة خاطر وذني تصفر..حتى من النفس صهيب علي و نرد فيه  بالسيف..شنوا لي  جرى ؟؟شبيه بدني مخدر هكا؟؟ الدوخة عمال ترج فيا رجان و تزيد تقوى...اما انا حابة نفيق و نعرف انا وين ..يدي على جبيني نحاول نتذكر شنوا اللي صار باش نفهم اللي قاعد يجرى توة...اما شي..حسيت قلبي غم علي من جديد كيني قاعدة نغرق في بير... مش فاهمة شي غير انو الدوخة رجعتلي من جديد و الظاهر انو بدني رافض يفيق مع انو روحي حابة تعرف شنوة لي قاعد يدور حواليا...غبت شوية على الوعي و شوية وقت بديت نحس بيد شادة يدي و نشم في ريحة كونوليا قوية و وقتها فين بديت نفيق و نتنفس و نعافر في جفوني و نهز فيهم باش نرى.... و الحقيقة انو حتى كيف حليتهم مش نرى في شي... نرى كان في ضباب و خيالات... لكن مع الوقت الصورة بدات توضاح و وذنيا بدات تخف عليهم التزفيرة و رجعت نسمع شوية.. شفت خيال طويل عريض... لابس كسوة تونسي حرير في السكري مطرزة  يا محلاها... واقف من بعيد بجنب الباب...  واقف وقفة  انا نعرفها مليح مليح ... أكتافو مفرودين.. قامتو مستقيمة و يديه مكتفين وراه... ما قدرتش نرى ملامحو و لا شي... ماعدا لحيتو العسلي المستشقرة... بلعت ريقي بالسيف و عبيت ضلوعي بالهواء... لفتت عيوني حواليا نحاول نفهم اكثر... واقفين على يميني زوز صبايا و على يساري زوز صبايا يا محلاهم و يا محلا زينهم و لبستهم.. قدرت نثبت في ملامحهم خاطرهم قراب مني مش كيفو هو بعيد .. بجنبي فوق الفرش مرا كبيرة كأنها الطبيبة و واقفة وراها مرا كبيرة في العمر نظرتها ثاقبة... نسمع فيها تقلها:
-اه فاقتشي!!...
و لخرى تجاوب فيها:
-ايه هاي حلت عينيها ان شاء الله ما ترجعش تدوخ مرة اخرى..
اكا الخيال البعيد قدم شوية ناحيتي و حتى كيف قدم بقى بعيد علي تقول معاديني... مانعرفش علاش عيوني تنصبو عليه و ما نعرفش علاه مركزة و نحبو يقرب و نحب نراه...ما نعرف شي غير انو عيوني محلولين شوية و غير انهم مرشوقين فيه هو بالذات
... بدني مهدود و قلبي تاعب و مش قاعدة نتفكر في شي.. كأنو شريط حياتي الكلو تمسح و كأني تولدت هاللحظة هذي.. شوية وقت و نسمع في المرا تقول:
- الحمدلله على سلامتها سيدنا.  هوكا فاقت اما لازم تبدلولها دبشها خاطر كلو مبلول و من المستحسن تعمل حمام سخون لا تمرض..
نسمع في صوت جاوب عليها من بعيد بأمر :
-حضرولها الحمام و دخلوها...
و قرب يوشوش للمرا لخرى الكبيرة بكلام ما سمعتوش، اما الظاهر الكلام علي لانو يحكي معاها و يغزرلي عكسها هي اللي راسها في الارض و ما تسمع منها كان كلمة: حاضر سيدي ولدي...
قال كلامو و خرج و انا عيوني منصوبة عليه.. تبعتو لحد ما الباب تسكر في جرتو... هو خرج منا و انا  قربولي اكا ال4  صبايا المزيانات... هزوني ددشوني لآخر البيت.. و دخلوني بعدها لممر طويل اخرو باب أزرق كبير  ... جابولي فوطة و نحاولي لبستي ولفوني فيها و هوما زادة نحاوا حوايجهم و دخلوا معايا... و عطاوني قبقاب نمشي بيه..راسي يووووووجع و بدني فاااااشل عالاخر نمشي مسلمة نبدل في الخطوة بالسيف.. كل شوية نقول ساقي بش تخوني و نطيح  على ماني فاشلة ودايخة عالاخر ..وهالبنات سانديني من قدام و من تالي و عاليمين و عاليسار.. شكون هاذم زعمة؟؟...
مش فاهمة شي ومخي حابس مش متفكرة ولا حاجة...  حلوا الباب  و دخلنا لبيت كبييييييييييييرة كلها رخام.. ارضها... حيوطها.. و حتى  سقفها  كلهم رخام ڨري منقوش يعشق.. بيت سخووووونة فيها برشا شموع تشعل مضويتها.. فيها مبخرة يفوح منها بخور ريحتو تهبل... بيت كلها سخانة و  بخار و نسمع فيها صوت الماء يشرشر...الظاهر انو حمام  و مش اي حمام هذا حمام ملكي... حاسة روحي في حلمة بين يقظة و منام..  ددشوني شويا و قعدوني فوق حجرة رخام  مدورة... و قدامي حوض رخام كبيييير و معبي بالماء و فوقو فما زوز سبابل  لونهم ذهبي و نقشهم يا محلاه و في وسط اكا الحوض تعوم غرافات فضة منقوشين...فردولي شعري و وحدة فيهم هزت اكا الغرافة و بدات تصب عليا بالشوية في ماء دافي و الاخرين يغسلولي في اطرافي.. يعملولي في الصابون و يمسدوا فيا بالشوية بالشوية...حسيت بدني ترخف.. سندت ظهري على وحدة من الصبايا واقفة طول وراي و عيوني تغمضو وحدهم و ياريتهم ما تغمضو و يا ريت ما فقت من الحلمة...الناس كيف تتحل عيونها تفيق من الحلمة...و انت يا هند يا منحوسة كيف تتغمض عيونك تفيق من الحلمة!!شريط طويييييل تعدى بين عيني في لحظة و كلمات رجعتني للواقع المر لي أمر من الحنظل..
.انت مش بنتي كيف ترجع بوك ايج توة تلقى امك رجعت معاه...سيدنا المتهم مات... مات موتة ربي... انت ظالم.. هزوها للحبس وغدوة يتنفذ فيها حكم الاعدام...شاكير عاوني.اصوات تتكرر... و اخرهم صوت الكف اللي كلاتو... رجعها للواقع.. شهقت شهقة قوية و وقفت بزربة من بلاصتها... تنهج بالقوي... حلت عيونها و كآنها توة فين فاقت من دوختها... البنات اللي دايرين بيها مش فاهمين شي مستغربين و يخزروا لبعضهم... شبيها مش كانت شايخة بالعومة؟؟؟كانت مستسلمة بين ايديهم لانا... شبيها واقفة و تڨحرلهم بغل  هكا تلفت في راسها يمين يسار  و تثبت في الحمام بالطريقة هذي؟؟؟....
قربتلها وحدة و حاولت تقعدها من جديد:
_أقعد و كمل حمامك.. سيدنا وصانا عليك..
و على اكا الكلمة ثور هايج و تسيب عليهم ... تدز فيهم بقوة جهدها و تعيط...
_سيبوني يا ولاد الكلب... حد ما يحط كسرتو عليا... انا وين انا وين....
البنات يحاولوا يشدوها و هي تفارع فيهم..
_ سيبوني... تي سيبوني..  سيبووووووووني.... يا باااااابا.... يا باااااااابا.. الباب وينو... خليوني نمشي لدارنا... نمشي لبابا و نحضر دفينتو..
هيا تعافر و هوما يعافروا فيها.. أربعة صبايا و ما قدروش عليها... هي  الحق طول و ڨد و قوة.... كيف ما خلاوهاش تخرج نحات القبقاب اللي في ساقيها حدفتهم بيه... جرات و قلبت الحمام على ريوسهم.... قلبت الشمع.. كبت العطور... لوحت  الصابون  على طول يدها في القاعة... ضربتهم بالغرافات... عملت فيهم شر الشعف.... تضرب و تعيط و تبكي و صياحها قبب قبب.. هدهدتهم و عملت فيهم...
في الاخر البنات بعدوا عليها خايفين من جنونها ههه... جرات باتجاه باب الحمام و حلتو ...و  ياريت ما حلتو.. لقات قدامها زوز نساء و قدامهم  مرا سمرة ملامحها قاسية.. قاسية عالاخر...  هي نفسها المرا الكبيرة اللي واقفة قبيلة مع الطبيبة... مرا قوية و عاتية.. ضربتها بكف بدون اي سبب جابتها مطروحة على الأرض دموعها تقطر في القاعة..  من حرارة الضربة هند  شدت خدها و تلفتلها بغش كبيييييير..
_ اش تحبو عندي ...  اش تحبو عندي سيبوني..  شكونكم انتوما اش تحبو...
_سكر فمك..  صوتك ما يعلاش في القصر...
هند ضيقت عيونها مدهوشة و مستغربة ...
_  صوتك ما يعلاش في قصر سيدي ولدي... سيدي الباي محمد ربي يفضلهولنا تاج فوق روسنا ... لنا كان الاحترام و الطاعة.. انت من اليوم جارية من جواري الحرملك و القواعد هذي اطبقها و راسك لوطا...
من قوة الذهول هند ما قدرتش ترد بحتى حرف.. .  ولو حرف واحد... الكلام و الحروف هربوا عليها...مش مصدقة اللي صار... من خبر موت بوها لخبر عبوديتها في قصر ولد الباي !! ... قصر الظالم اللي يتمها و  قتل بوها و لي خلى امها تتبرى منها!!.. هي مازالت مصدومة و اكا المرا بركت على ركايبها.. قربت منها و وشوشتلها..
_ الظاهر فيك باش اتعبنا و باش نتعبوك.. نوعدك انو المكان هذا باش يكونلك جهنم على وجه الأرض ...  صدقني و كان عدموك ارحملك بياسر من اللي يستنى فيك هوني يا بنت السارق...#منو
أيا حبيباتي...وصلنا للحرملك وحمام الحرملك...ليلتنا فل بالصلاة عالنبي...يا لندرا شكون بش يروض شكون ؟؟؟هند تروض محمد ولا العكس؟؟؟زعمة هند بش تتهد وترخ ولا تتعنطز وتاكل على راسها؟؟؟؟توقعاتكم و اراءكم...هالله هالله عالجد والجد هالله عليه...انما وبحيث وصلنا للرسمي وبش توكل بعضها...هضاكهو.. تحيات منو...

✴✴✴✴