💂❤👸إمرأة هزت عرش الباي👸❤💂

👸الحلقة 92...👸

❄❄❄
توجه مباشرة لديوانو...بركان ثاير...يغلي و الاحتمالات لكل تدور في مخو...وقت يوصل لاي احتمال او تصور فيه هند تتأذى مخو ياقف ويسكر عينيه ويحرك راسو بعلامة رافض...بش يجن..ماشي جاي بش يتحرق وحس صباطو ينقب الرخام...لا سايعتو ارض ولا حاملتو سما...مرتو وحبيبتو مخطوفة ولا مخبية ولا اي تسمية تفيد اللي هي مش في حمايتو توة...دقات قلبو تطرق بعنف بش تخلع صدرو...راسو مزنزن... بدنو بكلو يسطر عليه كل ما يتذكر اللي هوما زوز مش واحد...مرتو وصغيرو...كلمة صغيرو فيسع تسرق شطر بسمة تترسم على جنب و تغيب تماما بذكرى الغياب...وما امر غياب الناس اللي نحبوهم...القلب يموت بالحن،بالوحش...في خيالنا بنفس الصورة اللي خليناهم عليها...ما انجموش نتصورهم كان بابهى صورة وحلة وتبسيمة بنينة تتخلل عروقنا تحييها و تحير الحب الدفين(ويوا علي نشعر...اااه مالحب وسنينو😂😂..)...بدخول شاكير... جابوه من فرشو بمنامتو مدهشر و في عينيه البهتة...
صاح محمد:
-سيبوه واخرجوا...
يسمع في هرج البرا...
-حد ما يدخل علينا مهما كان يكون...
خرجوا وسكروا الباب...
وقف يستوي في روحو وحوايجو المخرومة:
-اش صار؟؟ شنوة اللي يستدعي جياني في هالزمان وانا بهالحالة ومن فرشي؟؟؟
قرب منو وضيق عينيه بهزة حاجب:
-هند...ويني مرتي؟؟؟
مهما كان قوي وجلد عندو الا انو ما نجمش يخبي ارتباكو وربثتو وقت قال مرتي...
-مرتكم الاميرة نورة على ما نعلم...
قاطعو بنبرة حاسمة:
-وهند مرتي قبلها...انا اللي نستجوب فيك موش انت..
تدارك روحو وهز اكتافو بسيطرة و ايديه مكتفة قدامو:
-ما نعرفش...هاكم جبتوني من جناحي وفرشي...
-علموك الليى عشيقتك سليمة لقاوها مقتولة؟؟
حمحم:
-ما سمعتش...
صاح فيه:
-ارقد على وذنيك...امر جيشنا...نحب تفتح تحقيق في موتها...وتجيبلي هند من تحت لارض...ما كانش راسك على المحك...
وتلفت عطاه بالظهر...معناها اخرج...ما راش بسمة الدهاء والخبث...لكنها تبسيمة اخترقت ظهرو وحسها تحرق فيه وفي أجنابو...تلفت لشاكير يلقاه داير بش يخرج ويحك في لحيتو بحلة فم تغطي تبسيمتو... في قلبو يا ويلك لو انت صاحب العملة...
دوبما فجج الباب...بانت الضجة شكون سببها... عروستو، امو،اختو سلوى،السلطانة فاطمة...سلوى ما دخلتش تراجعت مع شاكير ومشات معاه ودخلوا البقية...العروسة تبكي...حالها يحزن...
-فهمني...شكوني اللي مهملني على خاطرها؟؟ اش عمتلك وشنوة ذنبي؟؟؟
تسكت فيها للا فاطمة، و منانة تغزرلو تحب تفهم وتتكلم اما بعدما يبرر...كتف ايديه ورا ظهرو:
-مرتي...قبلك كتبت أنا وياها...وحب حياتي...الفرق بينك وبينها هي من عامة الشعب وقلبي اختارها... وانت بنت الباي والسلطة والمنصب اختاروك...في الاثنين ما نجم نظلم حد...وحدة اختارها قلبي ولاخرى عقلي...
تكلمت السلطانة فاطمة:
-انت بهذا خرقت قانون حكمنا...السلطانة من اهل السلطة...هي تنجم تكون جاريتك...حلالك...مما ملكت يمينك...أما هذي مرتك قدام ربي وعبادو...مهملة ولتوة لا فرحت...
قحرلها محمد بمعنى كلامك ما يهمنيش وما عندكش حتى سلطة علي...
-قبل لا تعطيني مواعظ...انا اخترت وانا قد اختياراتي وقراراتي...ومرتي اللي ما يعجبهاش الوضع نسرحها بالإحسان...واذا راضية ما تتشكاش لحتى حد مهما كان...هذي امور شخصية حتى حد ما عندو دخل فيها. وكان من المفروض يا سلطانات تهتموا لامور الحرملك في الوقت اللي جاييني فيه تعاتبوا وتلوموا...الليلة جارية تقتلت...ومرتي تخطفت...
منانة شهقت وحطت يدها على فمها...خاطر تعرف اش معناها الباي خطفولوا مرتو من قصرو...وللا فاطمة عوجت فمها استنكار لانو ما نكرش عرسو بأخرى ومن الناس العاديين،لا و يتبجح بيه قدام الكل وما خايف من حد...واتهامهم بالتقصير كسلطانات في امور القصر خلاها تفد وترد الفعل:
-امور الحرملك نتصرفوا ونصلحوها...أما خبر عرسك هذا ما يتصلحش...كان بأنك تقطع ورقة الزواج وتعتبرو ما صارش وهي ليك في لول ولاخر...ما كانش هذا امر ما يتسكتش عليه...
وهنا هي استوفات طاقة صبرو،ولهجة تهديدها ما تعداتلوش:
-تهدد في؟؟..تهدد في الباي؟؟؟...بش نعتبر روحي ما سمعتش...ونكرمك على خاطر مرت بابا لاولى...تفضل على جناحك...
ويوزع...طردها بضخامة...تصدمت واحمارت واخضارت وازراقت نيلة(هههههههههه كي دجاجات خميسة)...مازادتش حتى كلمة...وخرت راجعة...أما يمين البكوش في صدرو...وهذا مكسب لعدو جديد ومش اي عدو هذي السلطانة لاولى...واتخذت انما وبحيث...ها محمد راسو راس هم😂😂😂#منو

✴✴✴✴