حب وحرب( في ليبيا يحرم العشق )🇱🇾🔥
البارت 12 : كتابة mona alzwiy
يادمعتي خاطي مقالب خدي
دخيلتك وحدنا ننصبو طابان
قدام العرب م الدمع بالك ردي
قدام العرب ديري عزوم امتان
ووين ماتخالينا دموعك بدي
وانكاني نهيتك وقتها غلطان .
√~~~~~~~Π
دخل السياره للقراج و التفت عليا: اسف غلاي بلاهي عليك سامحيني،،، ان شاء الله انعوضك عن كل مر شفتيه معاي
_ انشوفله وانا ساكته ،، صعب العتاب ،،،،،في أوقات كثرة الكلام تجبرنا على السكوت،،،في اوقات من كثرة الألم اللي تحس بيه ومن الخنقه صعب تشرح احساسك بالكلمات ،،،يقال الصمت قوه،،،ولكن صمتي يا نضال ضعف واستسلام ،،، استسلمت لقدري لوجعي لنصيبي معاك،،،
_ هزيتله راسي وقتله : ان شاء الله
_ يعني مش زعلانه مني
لحضتها يا نضال ماعرفت شنو انرد عليك ،،انقولك زعلانه ،وانت اللي تعتذرلي من امس ، ولا تبيني نكذب وانقولك مش زعلانه،،، ماجاوبتك وقتها لكن دمعتي وتنهيدتي جاوبن عني ،،،،
فتح باب السياره ونزل فتح باب البيت ،وجا فتحتلي الباب ،،ساندني ونزلت ،،دخلنا مع باب المطبخ لقيت سمر قربت مني سلمت كويس وسألتني على صحتي توا،،،مش عارفه هيا حست على روحها ولا خايفه من نضال ،،سلمت عليها ودخلنا على دار عمتي ،،من شافتني فتحتلي ايديها قربت منها ضميتها وبكيت وهي تبكي معاي ،،، واتعاتب في نضال
_ علاش يام ابنيه صغيره تضربها هكا علاش شنو دارك هيا عشان تضربها حرام عليك
_ ساعة غضب يام اعوذ بالله من الشيطان
_ ساعة غضب تضرب البنت لين تدخل المستشفى، هذي يتيمه خاف ربك فها ،،حرام عليك ياولدي الله يهديك
_ هيا غاليه ارقي تريحي
• صبيت حبيت على راس عمتي وطلعت مع نضال رقينا فوق،،، اول ما دخلت للدار شفت صلايتي في مكانها نزلن دموعي ،،سجدت لربي وما نضت غير في المستشفى،،،ركزت ع المكان اللي ضربني فيه نضال،،، تذكرت الموقف واللحظه جسمي مزال يوجع فيا،،، لاقادره انحرك لا يد لا كراع ،،حضني زين لين وجعني ،بكيت بقهر على حالي وعلى جسمي اللي كله علامات ،،باعدت منه بقوه نبي نقعمز معش قادره انصبي عيوني ظلمن والدنيا اتدور بيا ،،رد مسكني: غلاي اسف غلاي غير اسمعيني...
نبكي ونشهق ومهدود حيلي : نضال بلاهي عليك فوتني كرهتك انا كرهتك خليني
_ لكن انا انحبك
_ واضح حبك لنقانه واضح ،افهم افهم انا نكرهك نكرهك
_ قتلك وانا انحبك غصباً عليك انحبك وسيورك اتحبيني
تعبت من النقاش تعبت نفسياً وجسدياً ،،شنو طيح سعدي بس وجابني لك يا نضال ،،،مشيت بخوات ثقيله قعدت ع السرير وتنهدت بتعب ،،رفعت عيوني في عيونه شفت في نضراته شفقه وحنيه وحب وندم
_ نضال
_ عيونه ،،،وقرب قعد يالاي: احكي ياعيون نضال
_ طلقني
_ شني،،،تي والله مانقدر انعيش بلاك غلاي اذكري ربك
_ لا اله الا الله،،،نضال انا تعبت طلقني وريحني اعتقني لوجه الله ماعاد عندي حيل
_ غلاي اسف ،،، انسي ووعد مني انسيك انعوضك عن كل شي
_ تبي راحتي طلقني
_ انطلقك وين تمشي
_ لبنغازي
_ من يشيلك
_ انت
_ كان طلقتك تحرمي عليا
_ دزني لبنغازي بس ومش شورك بيا اندبر روحي
_ مرا مش مراتي ما دخلني بيها لا انشيلك ولا انجيبك
شفتله بنضرة استحقار ورديت ضحكت على حالي التفتت عليه: ايوا تبي اتمنن عليا توا ،، لاقيني لا بات لا خو ،،، بدون سند تضرب وتجرح وتهين وماعندي حد يصدك ،ماعندي حد في ظهري ،، عمي وباعني لك وخلاني للمذله ،،لو عندي خو كان كسر خشمك كيف ما كسرتني لكن ماعندي ما انقول غير الله يقهرك يا نضال الله يقهرك كي ماقهرتني
YOU ARE READING
حب وحرب (في ليبيا يحرم العشق )
Romanceروايه ليبيه حقيقيه ، تحكي عن بنت يتيمه ، يعطيها عمها رهينه لدى ميليشياوي ، ، من اروع القصص الليبيه خليط من الحزن والفراق والإهانه والحب ، كلها تحدث مع مراهقة 16 عام . عندما تبداء الحرب في بلادنا ،،هل يجوز أن تكوني لاجئه الي...؟!🇱🇾🤍
