حب وحرب( في ليبيا يحرم العشق ) 🇱🇾🔥
البارت 46
بقلم: منى بن محمد الزوي
_______________
في الحرب ارواح تأجل موتها...
وفي الحب موت كامن وجبان...
~~~~~~~~~~
طفا الضي ورعد قعد يعيط من الظلمه... رفعته انسكت فيه اندور في تليفوني اندير بيه ضي دق الباب تلمست لين وصلت الشنطه طلعت التليفون دارلي ضي خفيف لانه يبي شحن مايولع فلاش..عزقت الشال على راسي
• _ من؟؟
_انا احمد
سمعت صوت عيل صغير فتحت.. عيل ومعاه بنت هما الأثنين صغار
_ عميمه قالتلك حنى تعالي تعشي معانا
تكلمت المرا من عند بابهم: تعالي يابنتي تعشي معانا نتعرفوا عليك
_ااا اي اشويه بس
وانا ماصدقت مانبي نقعد بروحي في الظلمه
قلت للصغار خليكم هنا دخلت لبست عبايتي وطلعت المرا مصبيه في الصور ترجا فيا و ماسكه ضي في يدها....اول ماوصلت عندها مسكت مني رعد..دخلت معاها للصاله حاطين فيها ضي وفي صبايا مقعمزات سلمت عليهن وقعدت حسيتهن كلهن يبحتن فيا مسكت رعد وقعدت ساكته
_ مشاء الله عليه وليدك شن اسمه؟
ردت عليها نواره ام الراجل اللي اجرت منه: اسمه رعد
_ مشاءالله اسمه حلو
• حلي ايامك حبيبه
تكلمت وحده ثانيه: انتي واخذينك في طرابلس صح
من جابت سيرة جوازي ارتبكت لكن حاولت مانبين : اي راجلي طرابلسي
_ اهاااا صح قالوا كبير!!
_ من قالك انتي
نواره: خلاص نهى خليك في حالك
الصبايا سكتن وانا رفعت رعد على كرعيا ندمت اني جيت ....دخلن البنات معاهن العشاء سلمن وقعدن
_ هي غاليه قربي
قربت اشوي من السفره بدينا ناكلوا رعد قعد يبكي نبي انصبي انسكته قالتلي صفاء مرت الراجل اللي اجرت منه هاتيه....خذت رعد صبت بيه
كملنا العشاء رفعن البنات السفر ...عندهم بنات من جيلي لكن ماتعرفت عليهن....قعدن الصبايا يحكن على الحرب واللي عرفته انهن صبايا خوت نواره وجاياتها زياره...دخل عيل صغير: ياحني ياحني
نوراه: ها يمي تعال هنا
_ باتي جا
_ باهي عدي سلم وليدي قوله يولع الماتوري التغيطه رايحه وظلام ضيقوا علمنا الله يضيق علمهم
أنت تقرأ
حب وحرب (في ليبيا يحرم العشق )
Romanceروايه ليبيه حقيقيه ، تحكي عن بنت يتيمه ، يعطيها عمها رهينه لدى ميليشياوي ، ، من اروع القصص الليبيه خليط من الحزن والفراق والإهانه والحب ، كلها تحدث مع مراهقة 16 عام . عندما تبداء الحرب في بلادنا ،،هل يجوز أن تكوني لاجئه الي...؟!🇱🇾🤍
