حب وحرب( في ليبيا يحرم العشق )🇱🇾🔥
البارت 33
كتابة : منى بن محمد الزوي.
___________
الا ليت الشرور دون نقاط....
وليت الحرب كانت دون راء...
~~~~~~~~
لين الليل لا جا نضال ولا رضا،،، ولا يردوا على الإتصالات،،، انا خايفه على نضال ساده تعب ومزال ما شبعت منه،،، مرات نبكي انخاف يصيرله شي لأن مزال خطر عليه هوا وجماعته، ،،ومرات نستغفر ربي ونحمده عشان ردلي روحي،،، حالتي تحسنت اشوي كليت ودوشت وانا مرتاحه نوعاً ما...، خذيت بجامه من رزان حتى هيا ضعيفه زيي ،، وسمر تبكي وتندب ،، خايفه نضال يقتل الاء ،،في الليل جا صهيب ينادي في امه من الصاله طلعتله عمتي غدير ..اشوي وجت قالت : غاليه جهزي روحك نضال في الطريق ومستعجل
بعد قالت نضال جاي تريحت صبيت لبست عبايه من رزان ،، وقعدت نرجا فيه،،عمتي غدير دارتلي كحل قالتلي ياسر حزن فدينا..
جا نضال ورتل سيارات وراه،، دخل هوا ورضا وسلاحهم في أيديهم،،، بطني قعدت توجع فيا مانقبل انشوف السلاح،،،نضال رغم شغله إلي كله سلاح وهوا اللي يدخل فيه للبلاد لكن مايجيبه قدامي ولا يحكيلي عليه،، دخل سلم على سمر ورضا قال لسمر جيبي اميه بسرعه مشيت جابت اميه شرب نضال محد فينا تجرأ يسأل على الاء نضال معصب وهالك،، قالي هيا طلعنا ورضا يحاول فيه يقوله
_ نضال خليك اهني اليوم وغدوا الصبح اطلع خطر عليك هارون الكلب مايخليك بعد اللي صار اليوم
رفع نضال يده وطلع مارد على رضا،،،طلعت وراه وصلنا للباب لف عليا قالي : غطي وجك..
استغربت منه رفعت الشال غطيت وجي وطلعت،،، في رجاله كانوا واقفين برا بعد طلعنا لفوا على نضال،،، رفع يده وقال: خلاص شباب ماقصرتوا توكلوا توا وبكرا حسام يكلمكم
طلع رضا وقال لنضال: يارجال انت خيرك بايعها خليهم يمشوا معاك ع الأقل
_ لالا مافي داعي بكرا الصبح انا عندك تم
_ تم
ركبت في السياره مش سيارة نضال وحده ثانيه عاليه واجد،،،اول ماركبت وجعتني الخياطه ،،، عيطت بشوي كردة فعل،،، صكر الباب وشافلي مستغرب: خيرك
عدلت قعدتي وتنهدت قتله: راسي خبط فوق نقزت بسرعه
• ماقدرت انقوله سقطت ولدي وهوا في الحاله هذي ،، ولع السياره ويسوق بعصبيه ودخان في جرة دخان وقف قدام العماره اللي فيها سوسن وهلها قالي انزلي،،، استغربت فيه نبي انتكلم قالي: غاليه رحمه لوالديك ماعندي خلوق للنقاش
نزلت وانا ساكته لكن رقيتلي نفسيتي تعبانه ويجيبني قدام سوسن ،، دخلنا العماره تلاقينا مع زياد خوها سلم على نضال بالأحضان ورد رقا معانا فتح شقتهم ونادا سوسن جت تجري شافت نضال حضناته وتبكي غمتلي انا ،،ماحوتك باعدت منه جت امها سلمت على نضال ،،سلمن عليا سلمت عليهن عادي ماتكلمت،،،، قالولنا تفضلوا جوا انا مابيت ندخل قعدت يالا نضال امصبيه،،،قاللهم جيت عشان انسلم بس انا وغاليه بايتين في الشقه المقابلتكم
