Kissing You Hello

The Evil Sister

"How could you!" Namumula ang mga matang sumbat ng kapatid niyang si Jan Marie kay Rebecca Grace.

Umismid siya. Ngumuya siya habang patuyang nakatingin sa babae. Pagkatapos ay bumuo siya ng bilog mula sa bubble gum at pinalobo 'yon. Hinintay niyang pumutok ang bubble gum bago sumagot sa akusasyon ng kapatid.

He likes me, ganoon lang kasimple."

"Ikaw ang lumapit kay Lance, ikaw ang nang-akit! Iniiwasan ka na nga, para ka pa ring lintang kapit na kapit na rin! My god, Ate! Pinatunayan mo lang na kaladkarin ka nga talaga!"

"It's not my fault that Lance finds me prettier than you," kulang sa interes na pagtatama niya sa kapatid. "At pwede ba? Malandi lang ako pero hindi ako bobo. Marunong akong makaintindi 'pag sinabi ng lalaking ayaw niya. Umiwas kamo si Lance? Kailan? Eh, ni hindi ko man lang narinig na inayawan niya ako. Ang narinig ko lang, 'yong mga ungol niya."

 Sinundan niya 'yon ng pagkindat. Lalong namula ang mukha ng kapatid niya. 

"Becca, stop provoking her," saway ni Lance na kararating lang.

Itinuro ni Becca ang sarili na para bang nagtatanong "bakit ako?" Natigilan ang kapatid niya nang makita si Lance. Nangilid na ang luha sa mga mata ni Jan Marie. Inabot ni Lance ang babae sa mukha at pinahid ang mga luha nito. Napangisi si Becca.

"L-Lance."

"Jan, tama na. Please stop crying," mababa ang boses na alo ni Lance sa babae. 

Niyakap ni Jan Marie ang binata pero nanatiling nakatayo doon si Lance, hindi gumaganti ng yakap.

"B-Bakit siya pa?" basag ang boses na tanong ni Jan Marie.

Napapalatak si Becca. "Because I'm hot."

"Becca," saway ni Lance.

Ngumisi ang dalaga. Inilibot niya ang tingin sa buong paligid, partikular sa mga taong nakikiusyoso. Pumalakpak si Becca para kunin ang atensyon ng mga nanonood.

"Show's over folks! Walang happily ever after. Amen. Pwede na kayong umalis." Sinadya niyang lakasan ang boses.

Nagsitalikuran na ang mga tao. 'Yong mga ayaw pa umalis ay diretsong tinitigan ni Becca, mata sa mata. Nakaramdam naman ng hiya ang mga 'yon at nagsimulang umalis.

"Grabe 'no? Alam naman niyang si Jan ang gusto ni Lance noong una pero inakit pa rin niya. Hindi man lang nahiya. Kawawa naman si Jan."

Lihim na napailing si Becca sa sarili. Alam niyang hindi maganda ang reputasyong mayroon siya sa eskuwelahan. Sa edad na disi otso, kilala siya sa buong campus ng St. Xavier University kung magbilang ng boyfriend. Wala siyang pakialam kahit siya ang pinakamasamang babae sa balat ng lupa sa paningin ng iba. Hinding-hindi siya magpapaapekto sa kakitirin ng isip ng lipunan.

Bago siya tumalikod ay nagtama ang paningin nila ni Lance. Wala siyang sinabi pero sapat na ang isang tingin para ipaabot sa binata ang mensahe ng mga mata niya. Isang mahinang tango ang isinagot ni Lance bago ibinaling ang atensyon kay Jan Marie.

Pasipol-sipol na tumalikod si Becca. Nilagpasan niya ang ilang kalalakihang sadyang nagpaiwan para hulihin ang atensyon niya. Pero hindi siya interesado. Isang tipid na ngiti lang ang iginanti ng dalaga sa mga pagbati ng mga ito.

Diretso siya sa Communication Arts building. Medyo malayo iyon nang kaunti mula sa pinanggalingan niyang High School Department pero hindi niya ininda ang lakarin. Tuloy-tuloy siya sa rooftop. May mga lumang upuan at mesa ang nakatambak doon. Tanging ang janitor at maintenance personnel ng eskuwelahan ang may access sa lugar na 'yon. Kinaibigan niya ang mga ito para bigyan siya ng access.