الصلح

الفصل الأول: الخطيئة

الجزء 13

دفعاتو و دخلات معصبة و غير تتغوت..

فاطمة بالغوات: فينك أ قليل لعفة خرج عندي.. فين مخبي فين ديتي ليا بنتي أ الحيواااان يا الخطاااااف النسااااا
عائشة بحدة: ألاااالة! أاااش هااادشي تتقووولي؟ واااش عااارررفة راااسك باااااب من دقيتي؟

هشام سد لباب دغية صحاب ليه رشيد خطف لها بنتها باش ينتاقم من يحيى مشا قاصدو و هضر بهمس

هشام: شنو درتي!

رشيد مصدوم معرفش باش  تبلى

رشيد: ولله أ الوليد مدرت شي حاجة
هشام مخنزر: هاحنا غنشوفو

فاطمة بالغوات: آه! عااارفة دقيت على قلالين الشرف لي ولدهم ضحك على بنت الناااس و خطفها و هرررب!! فين دااا ليا بنتي؟ راه ولله حتى ندير ليكم الشووووهة هنااااياااا و نوصلها حتال بلاد الشماااااال!!
عبدالرحيم بحدة: عرفي راسك علامن تتهضري راك داقة الدار لغالطة!! سيري لعند ولادك ولا قلبي على هادا فجهة خرا
فاطمة بالغوات: لله ياااااخد فيه الحق و لله ماااااا نسمح ليه على هااااادشي لي داااار ليااا فبنتي و الا متيقتووونيش سيرووو عند الداااية ديااال 'الغابة الحرشة' هي لي غتقووول ليكم شنووو كاااين و وقتاااش وقع.. (بتوعد) و لكن تنحلف ليكم الا مشاو حتى قتلو ليا بنتي حتى نوصلها لبلاد الشمال و ولدكم تاهو غيموت!!

عبدالرحيم محملش تهديداتها ليهم: شكون نتي بعدا و سمي ليا هادا لي قاس ليك بنتك!!
فاطمة: أنا فاطمة راميل مرات حسن راميل راجلي مشا لسبيطار بسباب حفيدك و شنو دار فبنتي!! لله ياخذ فيه الحق..

هنا كلشي فهم شنو واقع، شكون من غيرو لي غابر هادي أيام فاروق.. حياة شداتها الدوخة ممتيقاش بلي تتهضر على ولدها

حياة بعصبية: أ شريفة علامن تتهضري ؟
فاطمة بالغوات:  فارووووق حفيدكم!! فيناااهو!؟ قليل الشرف هداك الشمااااتة فين

فاطمة فقدات الشعور ملي وصلات لهنا مبقاتش تتفرق هضرتها غير تتخرجها حتى وصلات معاها لدرجة نطقات بالكلمات المحرمة!! بدون متعرف غير تتحاول تخرج الاحاسيس ديال القهرة و الخوف على مصير بنتها و لكن خرجاتهم بالطريقة الغلط.. لي جا ليها ففمها تتخرجو و كشاكشها خارجين.. لي شافها يعرفها فين وصلات معاها القهرة و يحس بيها واخا يكون قلبو حجر.. فاطمة تتبقى ام لي خايفة بنتها تضيع منها.. خايفة تكون بنتها ضحية للعادات و التقاليد، و هاد الخوف بالضبط هو لي خلاها تسكت على الحقيقة و تلوح اللومة على فاروق و تبين بلي هو الملام الوحيد فهادشي.. كأي ام غادي تبغي تحمي بنتها فقط..