( شتاء ليوا )
الساعه 10 الصبح بعد ماتريقت و تقوهت طلعت ام خليفه من البيت متجهه للستور و معاها مطر و حمدان ، دخلت الستور وقالت لـ حمدان يروح و ينادي لها العامل اليديد ، راح حمدان وياب لها عامل الزراعه لانه ماعرف منو اليديد من العمال و عامل الزراعه بالنسبه لـ حمدان ويه يديد لان عمره ما طلعت يتمشى فالحوش مع يدته ولا قد عابل بشي في ليوا ؛
ام خليفه : شحقه منادي مال الزراعه
حمدان : شكله يديد
ام خليفه : ها صارله خمس سنين عندنا او اكثر بعد
حمدان : والله ما كنت ادري
ام خليفه لـ عامل الزراعه : وين عامل جديد ؟
عامل الزراعه : مناك داخل متبخ
ام خليفه : انزين قول مشان هوا يجي
مطر : يدتيه ارمسي معاه عادي مثلنا
ام خليفه : مايفهم الرمسه
مطر : منو قال ؟ تراهم يفهون بس يحبون يستهبلون
***
ياها العامل اليديد و طلعت معاه زوليه عوده ، و قالت له يغسلها الحين لان تباها تكون نظيمه و ناشه على الساعه 8 لانهم بيقعدون برا و بيسوون عشاهم برا ، بعدها راحت لـ مطبخ الطباخ اتشوف شو طابخ اليوم و تذوق الأكل عشان تعطيه نصايحها ، مل حمدان و راح الميلس اما ام خليفه و مطر كملوا و راحوا صوب الزراعه تشوف راعي الزراعه شو يسوي و قعدت على راسه لين ما قص الورق الميت و نظف المكان و عدل فوز توزيع الماي ، ياهم مايد بلبس قفزالحواجز و راحوا معاه صوب الاسطبل ، كانن البنات ( سلامه ، فطيم ، ساره ) بعد هناك يتمرنن حق مسابقة قفز الحواجز الي بيشاركون فيها بناديهم ،،، قبل سنه ،،، وصل لـ عبيد ( بو ساره ) مبلغ و المبلغ جداً كبير فخاف انه يخسر هالمبلغ على اشياء تافهه مالها اي داعي فشاروا عليه خوانه انه يفتح نادي فروسيه لانه يحب الخيل وعنده خبره في هالمجال بعد تفكير طويل قرر عبيد ( بو ساره ) يفتح نادي فروسيه و الكل وقف معاه وشجعه على هالخطوه و من فتره قرا سيف ( بو راشد ) عن مسابقة قفز الحواجز و على طول بلغ عبيد ( بو ساره ) يسجل فيها و ماتردد ابداً على طول سجل و وصار كل يوم يروح للأسطبل و يتابع فريقه و يحاول كثر ما يقدر انه مايقصر معاهم حتى على حساب نفسه .
***
( في الاسطبل الي في مزرعة ليوا )
عبيد ( بو ساره ) كان قاعد على المدرجات يتابع تمرين البنات ، و هزاع قاعد فوق الحديده يشوف تدريب سلامه ( زوجته ) و بكل حب قاعد يدعمها و يعطيها ملاحظات يا مايد وراه طيحه على الارض و على طول ركض يطلع خيله ، قام هزاع و راح صوب المدرجات لـ عمه :
