لا أعرف المستحيل

البارت الأول

في مجتمعٍ لا يَعرِفُ الرحمة ولدتُ أنا وبينَ تقاليده
أقفُ أنا كـ ريشةٍ في مَهبِ الريح مصيرها إما أن تُسحَب من قِبل تيارات الرياح أو أن تقاومها وتظل صامدة .

بِقَلمي : زَهْراء

  .................

_ أحمد : داگلچ ماكو دوام يعني ماكو دوام ابن عمچ تقدملچ واني موافق وانتيِ خلص انسي شي اسمه دراسة واتزوجي وعيشي حياتچ

_ ليش بس اللي تتزوج عايشة حياتها، اني اريد اكمل دراسة كم مرة گتلكم اني دراستي ما اعوفها وزواج ما اتزوج

رديت ع كلام أبوية

_ إسلام : تسكتين وتسدين حلگچ لا هسة اعلمچ شنو ترفضين وتعلين صوتچ مـ تستحين انوب جديدة هاي بنية تعاند وتدرس ، احب اذكرچ انتِ بنية يعني مكانچ ابيت زوجچ ، تهتمين بزوجچ وجهالچ وتسوين شغل بيتچ هذا العليچ فلا تظلين تتحلمين عود مدري شتصيرين انتِ كلچ مرة لا حول ولا قوة فهمتي لو افهمچ بغير طريقة

حچاها أخوية

_ اي اني بنية وافتخر بنفسي واني اگدر اسوي كل شي ؛ لأن اني مو مثل متفكر أنتَ مكاني ابيت زوجي ، اني اگدر ادرس وانجح واحقق حلمي واعيش حياتي

_ إسلام : اي بالله درستي ونجحتي وبعدين شتصيرين مثلاً هاا ؟!

_ اصير انسانة عندي كياني الخاص وشهادة تنفعني
اصير انسانة ناجحة واحقق حلمي مو مثل حضرتك گاعد بالبيت لا شعل ولا عمل وابوك يصرف عليك واذا كلش تشتغل عامل ويا دوب اطلع كم فلس وتشتري بيهم جگاير وسوالف تافهة

_ إسلام : لا وطالعلچ لسان وصايرة تراددين ! ، يابة شوف هم بنية وهم لسان، شايفة هذا حچيچ اذا عدتي الا اطيح حظچ واگص هذا لسانچ الطويل

_ ليش لان حچيت الحق اي اني احسن منك
ع الاقل عندي هدف وحلم اريد احققه مو مثلك لا شهادة ولا شغل وأبوي يصرف عليك و ع مرتك

حچيتها وهو ضربني راجدي وجرني من شعري

_ إسلام : منين متعلمة هذا الحچي ؟ ، اكيد من المدرسة ومن هذن البنات المستهترات بعدچ زعطوطة ولسانچ بطولچ بس تكبرين شتسوين !

_ أحمد : عوفها خلي تولي مستهترة، اني اعرف شلون أربيها ، باوعيلي دوام بعد ماكو ، سالفة الدراسة شيليها من راسچ وحضري نفسچ لعرسچ من ابن عمچ

_ اني ما اتزوج ودراستي ما اعوفها لو شنو ما تسوون ماشي

حچيتها وعفتهم ورحت للغرفة همَ ظلوا يحچون ويصيحون واني ولا چني اسمعهم همَ كل سنة هيچ خلصتها من الابتدائية ولحد هسة هيچ كلما انجح لمرحلة يظلون يحچون ويردوني ما اداوم بس بكل مرة اعند واسويلي حل واداوم بس هل المرة چنه الموضوع صدگ لأن صار بيها زواجي من هذاك الطرگاعة