لا أعرف المستحيل

البارت الثالث والثلاثون

# لا أعرِفُ المُسْتَحِيل # زَهْراء مُهَنَّد

الحياة هيَ موجٌ يتبعهُ موج
والبطولة هيَ أن تعاند الأمواج .. وتنظر لأعلى .. وتبتسم بثقة .

إلين ..

إلين : آه أيليان گومني آه ه بطنييي

أيليان : شنو شبيچ ؟!!

حچاها وهوَ مخطوف لونه ، مـ گدرت أرد عليه بسبب الوجع إللي دأحسه بمعدتي ، تمسكت بإيده وگمت بأتجاه الحمام

أستفرغت واني أبچي وأتذكر ماما إللي چان حلمها تشوفني طبيبة

اني خيبت ظنها بية !

أيليان : كافي بچي حـ تموتين نفسچ !!

غسل وجهي بمي بارد ودنگ لمستواي

أيليان : وين إلين إللي تگول للظروف اني أقوى منك ؟

إلين : إنكسرت يا أيليان إنكسرت

بچيت أثناء كلامي وهوَ أخذني لحضنه

أيليان : ما عاش إللي يكسر إلينتي ، التخصص مالتچ حلو ودراسته حلوة ليش هل الإنكسار ؟! ، مو إلين إللي يكسرها تخصص

قاطعته واني أبتعد منه وأصرخ

إلين : گتلي تخصص حلو !!! شنو الحلو بأنه أصير فيترچية سنون
هااا گولييي شنوو الحلوووو ؟؟

أيليان : إلين هذا مو منطق إنسان عاقل ، شنو فيترچية سنون !
أنتِ طبيبة أسنان طبيبة ، ركزتي ع الكلمة ، طبيبة يعني حالچ
حال طالب الطب العام وما تقلين عنه بشي ، أحنا لشوكت نفكر بهل السطحية ؟! طبيب الأسنان فيترچي والصيدلاني عطار والخ من هل المصطلحات التعبانة ، كافي نبجل الطب وكأنه الحياة والموت بإيده ،
كُل قسم يكمل بعضه ، الجراح مـ يسوي العملية بدون تقني التخدير وبدون الأشعة والتحليلات ، المريض مـ يتحسن بدون العلاج إللي يصنعه الصيدلي وكذلك الصيدلي مـ يصنع علاج بالمصنع بدون المهندس ، طبيب الأسنان ميسوي حشوة بدون أدوات وهل الأدوات الهم مصنع يصنعهن وهل المصنع اله عمال وهل العمال الهم مدير أعمال ، دتشوفين شلون كُل قسم يكمل ثاني ؟ بعد أحنا ليش نضوج من قسمنا
ونقلل من قيمته والله شنو لأن مو طب !! هذا مو منطق مو منطق

صاح بنهاية كلامه واني جثيت بالأرض واني أبچي

إلين : بس مو حلمي ، طب الأسنان مو حلمي