لا أعرف المستحيل

البارت الرابع والثلاثون

# لا أعرِفُ المُسْتَحِيل # زَهْراء مُهَنَّد

بعد مرور سنة

إلين ..

مرت الأيام والأشهر وصارت سنة وخلالها عشت أجمل أيام

المرحلة الأولى چانت مرحلة حلوة وخاصة من بعد ما گدرت أتقبل
تخصصي وأحب دراسته ، تعلمت من هل السنة هواية شغلات
وگدرت أطور من نفسي ، شاركت بعدة أنشطة طلابية وحصلت
ع شهادة شكر وتقدير من جامعتي
وهيچ أنتهت المرحلة الاولى وصرت مرحلة ثانية وأموري تمام من ناحية الدراسة إما من ناحية حياتي ؛ فـ حياتي مستقرة

اني وأيليان علاقتنا مثل ما هيَ متفاهمين ، مـ بينّا مشاكل ومرتاحين  بس أكيد محد مخلينا بحالنا ، اقاربنا كُل ما شافونا وحچوا بموضوع الأطفال  وأيليان أحسه بيه يضوج بس يغلس واني همين اغلس
وصراحة هل الشي مضوجني

سالفة أنُ خافية شي مهم عن أيليان تضوجني بس ما اگدر أتجرأ واحچيله

أخاف يتعكر صفو علاقتنا ونرجع مثل قبل لذلك اختاريت السكوت
مـ چان أبالي أنُ سكوتي حـ يدفعني الثمن غالي ..

رند : إلين أنتهت المحاضرة مـ اطلعين نتغدة سوا ؟

حچتها صديقتي ، هيَ مو مقربة إلي وإنما هيچ صداقة نسولف ونقضي وقت سوا ، گمت وياها طلبنا بيتزا وگعدنا ناكل ودگ عَليَّ أيليان

إلين : يا هلا بأبو عيون العمص شلونك ؟

ضحك بعدم إكتراث لتنمري لأن يعرف هذا غزل بطريقتي

أيليان : صرت بخير من سمعت صوتچ ، أنتِ شلونچ ؟

إلين : نعسانة ودايخة وجوعانة بس دأملي بطني ، أنتَ تغديت ؟

أيليان : اي قبل شوي تغديت وغصيت بلگمتي فـ أتصلت بيچ حتى اگلچ
روحي للكافتريا اكلي

إلين : يا عمري شگد حنون فديتك اني ، هسة نزلت بيتزا ودآكل

أيليان : الف عافية يلا كملي غداچ

إلين : ع گلبك ، بيباي

نهيت المكالمة وسألتني الگاعدة مقابيلي

رند : تحبيه ؟

إلين : زوجي وصارلي أكثر من سنة عايشة وياه فشي أكيد أحبه بس
مثله مثل اي شخص مقرب بحياتي يعني أحبه بس مو هذاك الحُب اللي بين الأحبة

رند : لعد شلون عايشة وياه إذا مـ تحبيه ! اني مستحيل أتقبل فكرة أعيش وية شخص بدون ما احبه ويحبني

إلين : عايشة وياه ع أساس المودة والرحمة اللي تنشأ بين أي زوجين
كوننا متفاهمين هل الشي كُلش كافي يخلينا سعداء ، العلاقة إللي ما بيها
مشاكل علاقة حلوة حتى إذا ما كان الطرفين يحبون بعض ، من تكونين
فاهمته وفاهمچ وتخافين عليه ويخاف عليچ ، من تهتمين اله ويهتم الچ
من تسهرين وياه بمرضه ويسهر يقرأ آيات قرآن بس حتى يهدأچ ويخليچ تنامين براحة هل الشي أفضل بهواية من أحبك وتحبني وعمري وحياتي وهل السوالف اللي تكون بس قول مو فعل