انا شاعرك العام والقصيد عيونك

انا شاعرك العام والقصيد عيونك ٤

بقلم الكاتبه آمال ✍️ arwicx ،
'
-
صقر ضحك وطلع عبدالرحمن لحقه وطلعو للحوش ،
ابو مشعل : احط الرز وفوقه احط الدجاجه ولا كيف؟
يوسف : لا اول شي نحط الدجاجه بدون رز ينطبخ ونسوي الرز،
عمر : من الحين اقول اعظم الله اجرنا والله يرحمنا مقدمًا ،
سلطان : انت من امس تاكل من مطاعم الي ما يغسلون يدهم ولا مت ف لا تخاف عندك سبع ارواح ،
'
عبدالرحمن مشى وقف عند اسطبل الخيل صقر وقف جنبه والتفت له : شعندك تراقبني؟
عبدالرحمن : جاكيتها صح ؟
صقر بصدمه : وانت كيف عرفت ؟
عبدالرحمن بضحكه : الفستان الاصفر على قولتك ما نسيته ،
صقر تنهد وهو يصد : حتى ريحة عطرها نفسه ،
عبدالرحمن : تعبتك واضح !
صقر تنهد وهو يصد : ليتني ما وقفتها يوم طاحت ،
عبدالرحمن : مو ناوي تصالح مع جدي لاجل خاطرك ؟
صقر : ماودي لاجل مصلحتي اتصالح اما خاطري عاف ،
عبدالرحمن : صدقني يا صقر مافي غير جدي الي يسمعك ،
صقر التفت له : الي مخوفني اذا هي الي مخطوبه ؟
عبدالرحمن : مدري والله يخوي ماني عارف شيء ،
صقر بهدوء : لو طلع مشعل خطيبها ؟ عبدالرحمن سكت وناظر له كمل مشعل : تدري وش بيصير بقلبي؟
عبدالرحمن : ليه قاعد تدمر نفسك عشانها؟ ولا همها ،
صقر : افكر ليه كانت تطالع فيني كذا يا صقر نظراتها لي ذبحتني حطيت عيوني بعيونها وانا اطالع فيها وهي ساكته !
عبدالرحمن : يمكن كانت مصدومه طيب؟
صقر هز راسه بالنفي : ما ظنتي يا عبدالرحمن ،
'
= عند البنات =
'
طلعو متوجهين للمول مع السواق نزلو من السياره وهم يدخلون المول ام صقر كانت ماسكه يد ملاذ والشغاله معها ،
والبنات قدام نجلاء وآمال و ريما دخلو المول مع بعض ،
نجلاء التفتت وهي تناظر : وش هالزحمه ياويلي ،
ريما ضحكت وصدت وهي تمشي مع آمال نجلاء لحقتهم ،
ام صقر كانت وراهم مع ملاذ والشغاله معها ،
ريما : ندخل هالمحل؟
نجلاء : لا واضح مافيه شي حلو امشي قدام ،
امال : والله انكم فاضين سحبت شنطتها وهي تطلع السماعات وتشبكهم بالجوال وتسمع اغنيتها المُفضله ،
وهم يمشون بالمول ويناظرون للناس الي جاين و رايحين ،
'
العيال طلعوا كلهم للحوش وهم يجلسون والرجال داخل يطبخون والشياب بالمجلس ،
صقر جلس جنب عبدالرحمن وهو يسمع سوالفهم ،
عمر : والله انه مافي احد منهم فنان بالطبخ ،
سلطان : ما يفرق معم اي شي تبلعه انت ،
مشعل بنعاس : والله ميت نوم ،
عبدالرحمن حط راسه على كتف صقر : مالومك الدنيا برد ودك تنام هنا ،
عمر : شرايكم اغني لكم ؟
مشعل : اسكت بالله مو ناقصين صوت النشاز ،
عمر : الشرهه على الي يبي يروقكم ،
سلطان : ماعليك حنا مروقين بس اكرمنا بسكوتك ،
عبدالرحمن التفت لصقر الي كان ساكت ويناظر للعيال ،
فجاه دخل يوسف : يلا تعالو المجلس الاكل جاهز ،
عمر : الله يرحمنا ويرحمكم برحمته مقدمًا ،
سلطان : اقول وصيتي ولا ما يحتاج؟
عبدالرحمن : تصدقو عني بعلبة تونه راضي ،
صقر ضحك وهو يقوم : ابشرو بس يلا سمو بالله نمشي ،
دخلو المجلس وهم يشوفون ابو مشعل قاعد يرتب السفره وصحن الرز بالنص والمويا وكل شي مرتب الكل جلسو وبداو ياكلون وفعلًا كان الطعم حلو ،
فهد : الله يخلي اليوتيوب الي انقذنا ،
'
نجلاء مشت وهي تناظر للفستان : شرايك ريمو؟
ريما هزت راسها بالنفي : مو حلو دوري غيره ،
آمال : شوفي الفستان الاحمر عاد ذوقك ،
نجلاء وهي تصد : ماما تذبحني كل دولابي احمر ،
ريما : شرايكم ناخذ اغراض المزرعه ونجلس هناك كم يوم؟
آمال : اييي كنت ابي اخذ قفص لشيهان ،
نجلاء : وانا بخاطري اخذ جاكيت جديده ،
فجاه مشت عندهم ام صقر وبيدها فستان ابيض وعليه خطوط اصفر : شرايكم لملاذ؟
نجلاء : تجننن بتطلع حلو عليها ،
ام صقر : انتم خلاص اخذتو وخلصتوا ؟
آمال هزت راسها بالنفي : ما عجبني شي باخذ لي مناكير موفي وودي ناخذ ملابس الشتاء من مول ثاني ،
ام صقر : ابوكِ توه اتصل يسال عنكم قلتله طلعتهم للمول يغيرون جو وقال انهم بيرجعون بعد شوي يلا اخلصوا ،
'
سلطان كان جالس ياكل بعد دقايق خلص وقام فجاه رن جواله استغرب ومشى غسل يدينه واخذ جواله وهو يرد : ياهلااا ،
مصعب : وينك فيه لا حس ولا خبر ؟
سلطان : والله في المدينة ليه عسى المانع خير ؟
مصعب : والله فقدتك يا رجال متى راجعين ؟
سلطان : كله كم يوم بنرجع انت علمني اخبارك؟
مصعب : يا انه طاح قضيه في يدي ودي تمسكه عني ،
سلطان : ليه وشهي ؟
مصعب : عنف اسري البنت رفعت قضيه على اهلها ،
سلطان : وليه ما تمسك القضيه انت ايش عندك؟
مصعب : والله زوجتي تعبت وولادتها قريب ف صعب ،
سلطان تنهد : خلاص مو مشكله ارجع بعد كم يوم واشوف ،
سلطان : تمام على خير ،
'
= تاخر الوقت والكل قامو يودعون بعض ويمشون لبيتهم =
الجد مشى لعنده وهو ماسك قفص شيهان : نسيته ،
عبدالرحمن ابتسم وهز راسه بالنفي : ما نسيته والله ،
صقر كان واقف وهو يفسخ الجاكيت عن نفسه مسكه وهو يناظر فيه وقرب حطه على الكرسي ونزل راسه لثوبه وهو يسم العطر و ريحة الدخان وفعلًا طبع ريحة العطر على ثوبه ابتسم بدون شعور ومشى عند العيال وودعو بعض والكل مشى ،
'
البنات رجعو من المول وتجمعو بالصاله وكل وحده تشوف اغراضها آمال كانت جالسه تحط من المناكير الموفي ،
نجلاء لبست فستانها وهي تناظر بالمرايا : شرايكم؟
ريما كانت جالسه تلبس الكعب : حلو بس ليتك اخذتي كعب،
ام صقر كانت واقفه تلبس الفستان لملاذ وهي مبتسمه ،
آمال تركت المناكير وهي تناظر : نجوله ليه ما اخذتي الي ورتيني؟ كان لونه احلا من هاللون ،
نجلاء : ما حبيته كان كبير علي حسيت ومشت تغير ،
ريما بضحكه : فستانها زي وجهها بس نسلك لها عاد ،
فجاه انفتح الباب و دخل الجد عبدالعزيز وفهد ،
ريما ابتسمت ومشت تسلم عليهم وهمست : بابا جاء؟
فهد : اي يا بنتي واقف ينتظرك برا ، ريما مشت تتجهز ،
فهد جلس وهو يناظر للاغراض : ما شاء الله ما تركتو شي ،
ام نجلاء ابتسمت والتفتت له : هاه كيف كان المزرعه؟
فهد التفت لآمال : جدك غدر فيكِ يا بنتي ،
الجد فز والتفت لفهد : انا غدرت فيها؟
فهد : شيهان طار من المزرعه ماعاد فيه ،
الجد تذكر وسكت وناظر للارض بصمت ،
آمال بصدمه : كيف طار؟؟ لا يكون خليتوه يهرب؟
فهد : لا والله ما هربه الا جدك بيده ،
الجد : بنجيب غيره ،
آمال : فهمني يبه شسالفه وكيف طيره بيده؟
فهد : حفيد سُليمان اخذ الصقر للقصيم ،
آمال انصدمت وهي تناظر : جدي صدق؟؟؟
الجد : يا بنتي هو كان خاطره فيه ماقدر.. سكت وهو يشوفها صدت وقامت مشت لغرفتها تنهد والتفت لفهد : ليه علمتها؟
فهد : والله وصرت تغدر ببناتي عشان احفاد سُليمان ،
نجلاء التفتت لآمال الي دخلت والدموع بعيونها : بسم الله شصاير؟ آمال صدت وهي تمسك جوالها وتطقطق فيه ،
نجلاء : شصار لا يكون بابا عصب اننا رحنا المول؟
آمال صدت : لا مو صاير شي خليني بحالي ، نجلاء قامت نزلت لتحت باستغراب : شصار وليه قاعده فوق تبكي؟
فهد التفت للجد : عجبك الي سويته؟
الجد : ياولدي كنت امزح معه قلت ابيعه وطلع خاطره فيه ماقدرت ارده ، وبنجيب واحد ثاني لبنتك ،
نجلاء : ما شاء الله جدي احفاده صارو اهم مننا واضح ،
الجد بضحكه : لا يا بنتي وش هالكلام قولي لاختك تتجهز الصباح بنروح للمزرعه بعد صلاة الفجر الاجواء هناك حلوه ،
نجلاء هزت راسها ومشت ناظرت فيها : تجهزي بنروح للمزرعه
آمال صدت : خليه ياخذ احفاده للمزرعه ماني برايحه ،
نجلاء : هالله هالله ترا ناوي يجيب لك شيهان جديد ،
آمال : ماعاد ابي واحد جديد يا يجيبه لي نفسه يا لا يكلمني،
نجلاء بصدمه : تخيلي يروح يقول له رجع لي الصقر ؟
آمال : عادي وهو بعد ما يستحي يروح يشتري ليه ياخذ حقنا؟
'
عمر بضحكه : والله يا يمه ليتك ذقتي طبخ ابوي ،
سلطان : ما شفتيه وهو يقطع الدجاجه ،
ام صقر ابتسمت والتفتت لـ يوسف : طلعت طباخ ،
يوسف : افا عليكِ اذا تبيني اعلمك ماعندي مشكله ،
ام صقر : لا ما يحتاج تعلمني خلني انزل اشوف العيال ذولا الاثنين وينهم ومشت طلعت لبست عبايتها وطلعت من جناحهم ومشت لجناح العيال وهي تدور صقر وعبدالرحمن ،
التفت ناظر كان عبدالرحمن منسدح وصقر جالس جنبه ويدخن وساكتين ، استغربت ودخلت : شتسون هنا؟
عبدالرحمن فز والتفت لصقر : ولاشي نحاول ننام ،
ام صقر : ليه ما تنزلون تحت كلنا جالسين مع بعض ،
عبدالرحمن ناظر لصقر الي كان ساكت بصمت ويدخن وقام عدل جلسته : ولاشي بس جالس مع صقر نسولف ،
ام صقر جلست وهي تناظر : في شي تخبونه عني؟
عبدالرحمن : لا يا يمه شدعوه مافي شي ،
فجاه دخل الجد وهو يتعوذ من الشيطان : ما نمتوا؟
عبدالرحمن : لا ننام الحين كنا ننتظرك انت وعمر وسلطان ،
ام صقر وهي تقوم : يلا انا رايحه تحت وناموا انتم ومشت ،
صقر التفت للجد الي مشى سحب السجاده وهو يصلي الوتر،
عبدالرحمن ناظر فيه : تكفى كلمه وخلصنا ،
صقر رمى الدخان من الشباك ومسح على وجهه ومشى بهدوء وجلس على سرير الجد ، والجد قدامه يصلي ، بعد دقايق خلص وسلم والتفت لصقر وصد : عبدالرحمن في ناس غلطانين بالسرير الظاهر كلمه انه سريري ماهو سريره ،
صقر بهدوء وهو يناظر بالارض : اعرف سريرك بس اسف سامحني اذا شلت بقلبك عني او زعلتك ،
الجد وهو يصد : عبدالرحمن كلمه وقل له مو منتظر اعتذاره.
عبدالرحمن : يبه خلاص عاد هو عرف غلطته سامحه ،
الجد التفت لصقر : متاكد انك عرفت غلطتك ولا جاي عشان مصلحه ولا شي؟ ما اشوفك من قبل قد حسيت بغلطك وجيت تعتذر؟ اذا في شي قل اسمعك ما يحتاج تعتذر وتنازل عن كبرياءك هذا انت صقر ماعمرك اعتذرت من احد ،
صقر كان ساكت ويناظر بالارض : مافي شيء ،
قاطعهم عبدالرحمن : الا في يا صقر تكلم ،
الجد : اذا انت تعرف ف تكلم لا يكون مسوين شي من ورا ظهري؟
صقر تنهد وهو يقوم ويجلس جنبه بالارض : مو مسوين شي،
الجد انصدم منه : طب تكلم شصاير وانا ابوك؟
صقر بحزن : يبه ابي اطلبك شي اوعدني ما ترفضني؟
عبدالرحمن تنهد وهو يناظر فيهم بصمت ،
الجد بخوف : تكلم شصاير؟
صقر ناظر لعبدالرحمن وهو مافيه القوه يتكلم ،
عبدالرحمن تنهد بضيق من حالة اخوه ويعرف مايقدر يتكلم ولا عنده هالقوه وهمس : يبي يتزوج ،
الجد انصدم والتفت لعبدالرحمن و رجع ناظر لصقر ،
وكمل عبدالرحمن : من بنات فهد ،
الجد انصدم وهو يناظر لصقر وعبدالرحمن : شعرفكم ببناته!
عبدالرحمن وهو يقوم ويمشي لعنده : يب..ماكمل كلامه الا والجد قرب من صقر وعطاه كف بكل قوته : تكلمممم ،
عبدالرحمن انصدم وناظر لصقر الي فز من قوة الكف ،
الجد بحده : كنتتت اشوفكككك وانت تشمشم جاكيت البنتتت حسبيي الله على. هالتربيه وقام شال السجاده و رماه على الارض ، صقر ما تحرك من مكانه وجلس ساكت بالارض،
عبدالرحمن ركض مسك جده : تكفى جدي اسمع منه!
الجد التفت لصقر الي كان ساكت ولا تحرك من مكانه فز قلبه من منظره وهو يشوفه ولا تكلم بحرف رغم انه ضربه ، و ضربته كانت قاسيه وهو حس بقوة يده لما رفعه صد وهو يجلس بهدوء ويصد وجهه عنهم ، بهاللحظه دخلو عمر وسلطان مصدومين وهم يناظرون ،
عبدالرحمن التفت لهم : اجلسو ولا تتكلمون ،
سلطان باستغراب : شصاير طيب ليه صقر كذا؟
عبدالرحمن : قلتلك اجلس هناك وناظر لعمر انت بعد ،
سلطان وعمر انسحبو ومشو جلسو على السرير بصمت ،
صقر : ادري انك فكرتني واحد خبيث يوم شفت حركاتي بالمزرعه بس جدي والله واحلف لك بربي اني ما تعمدت هي بنفسها وقت العزيمه جت قدامي كنت بالحديقه ادخن وهي جت قدامي وربي يا جدي اني ما اكذب هي الي جتني ،
سلطان فز وهو مصدوم ويناظر وعمر مو اقل منه ،
عبدالرحمن : وصقر الى الان ما تواصل معها ولا كلمها يا جدي والله ولا حتى كان ناوي يعلمك انا الي طلبت منه يعلمك ،
الجد بحده : انساها فاهم!! صقر انصدم وهو يناظر ،
عبدالرحمن مشى جلس : جدي وشفيه طيب اذا رحت وطلبت يد بنتهم له؟ كذا ولا كذا الاثنين مردهم يتزوجون ف ليه توافق انه يتزوج مع وحده بخاطره؟ وش الي بيغير يا جدي؟ مو انت تقول اننا حنا الاربعه اهم شي بحياتك؟ ليه تكسر بخاطر واحد مننا؟ قسم بالله يا جدي ان كسرت خاطر صقر ف معناته كسرت خاطرنا كلنا ، طالع بعيونه وشفت الامل الي بعيونه وهو جاي لعندك لا تخيب هقوته يا جدي لا تخيب ظنه فيك ،
الجد سكت وهو يناظر بصمت : كلمتو امكم!
عبدالرحمن هز راسه بالنفي : لا جينا نشوف اذا انت موافق ولا لا لانه رضاك اهم شي عندنا واعرف امي وابوي هُم بعد يمشون على رايك و رضاك ،
الجد : اي وحده تتكلمون عنها امكم قالت ما لقت عندهم بنت مناسبه لكم اخر وحده فيهم صغيره واتوقع الكبيره مخطوبه والثالثه مريضه لا تشوف ولا تتكلم شتسوي فيها؟
صقر فز وقف وهو يناظر لعبدالرحمن الي انصدم وناظر لصقر وهمس : ما تشوف! ولا تتكلم!!
الجد تنهد : اي ما تشوف ولا تتكلم خلقه من ربكم ،
صقر كان واقف مصدوم ويحس رجوله مو شايله من الصدمه ،
'
آمال سحبت الشال من الكنب وحطتها على كتفها تدفي نفسها ومشت اخذت كوب الشاي ونزلت لتحت لبرا الحديقه مشت وجلست بهدوء عند الباب وهي تناظر للسماء ،
ابوها فهد كان طالع يتوضى لصلاة الفجر وقف وهو يشوفها وعرف انها متضايقه مشى جلس جنبها بصمت ،
آمال عرفت انه ابوها وصدت وهي تناظر بالارض ،
فهد : زعلانه من جدك؟
آمال : مو زعلانه ولو هو همه زعلي ماكان باع خاطري لاجل احفاد صاحبه ،
فهد تنهد : شيسوي طيب ماكان بيده ؟
آمال : حتى ولو يا يبه هو يدري اني احبه و اروح المزرعه بس عشان اشوفه وقد طلبت منه اجيبه للبيت و رفض ،
فهد سمع صوت الصلاة بدا تنهد وهو يقوم : طيب خليني اصلي وارجع ونتفاهم ، بهاللحظه الجد بعد طلع واستغرب وهو يناظر : ليه جالسه هنا؟ قومي تجهزي بنمشي ،
آمال قامت وناظرت لابوها الي اشر لها بمعنى لا تقولين شي وسكتت ومشت لداخل ، طبع فهد يكره اذا شاف بناته يطولون لسانهم او يردون بوجه جدهم ما يحب هالحركه ،
طلعو توجهو للمسجد ،
'
ام نجلاء قامت من النوم ومشت توضت وصلت ونزلت لتحت مشت لغرفة البنات وهي تناظر آمال ترتب الاغراض بالشنطه
ونجلاء جالسه تاكل لملاذ الاكل ابتسمت : يلا اخلصوا ،
نجلاء : يمه تعالي كلي معانا ،
ام نجلاء : لا يا بنتي شبعانه والله كلو انتم بالعافيه ومشت ،
نجلاء ناظرت لملاذ : خلاص شبعتي؟ ملاذ هزت راسها بايه،
آمال مشت جلست وهي تاكل بعد دقايق خلصت ،
نجلاء : ما تكلمين جدي؟ آمال صدت وهي ساكته ،
دخل فهد كان توه راجع من المسجد : هاه ي اميراتي خلصتو؟
والتفت لملاذ وابتسم : هاه يا ملاذ مبسوطه للمزرعه؟
ملاذ هزت راسها بـ اي وابتسمت ، فهد ضحك ومشى جلس جنب ملاذ وهو يمسح على شعرها ،
البنات تجهزو وخلصو ، فهد قام والجد كان بالمسجد يقرا القران بعد دقايق خلص وطلع وهو يشوف فهد يحط الاغراض بالسياره وابتسم ومشى ركب ،
'
'