انا شاعرك العام والقصيد عيونك

انا شاعرك العام والقصيد عبونك ١٠ ،

انا شاعرك العام والقصيد عيونك ،
'
صقر : عبدالرحمن تكفى لا تقول اني بحلم واذا كان حلم لا تصحيني منه خلني اكمل هالحلم واشوفها معي!
عبدالرحمن بضحكه : بتشوفها بتشوفها لا تستعجل ،
فهد التفت لـ صقر ، صقر ابتسم ومشى لعنده يسلم عليه ويحضنه فهد شد على يده وقرب من اذنه وهمس : مبروك وانا ابوك وكلمتين اقولك ياه حطه باذنك زين يا صقر ملاذ لا اشوفها تبكي او تنزل دموعها بسببك واذا بيوم شفت دمعه منها بسببك ماراح اتركك ، صقر بلع ريقه وناظر فيه واخذ نفس وهمس : عمي اعرف بنتك وتحبها وتخاف عليها اوعدك ماراح اخلي دمعه من عيونها تنزل بسببي او بسبب غيري ،
'
ام صقر ابتسمت وهي تناظر لملاذ الي جالسه جنب امها ،
ام نجلاء ناظرت لرسالة فهد الي رسله : تم الموضوع مبروك،
ابتسمت وهي تقوم تطلع لبرا تتصل عليه ،
ام مشعل : اتوقع انه تم الموضوع وتكلموا ووافقوا ،
ام صقر : الله يسمع منك ان شاء الله بيكون كذا ،
فجاه دخلت ام نجلاء وهمست: مبروك الرجال تكلموا ووافقوا،
ام صقر ابتسمت وقامت والكل قاموا يحضنون بعض ،
ام نجلاء استغربت انها آمال ونجلاء مو موجودين ،
'
آمال : مسحي هالدموع وخلينا ننزل قبل احد يشك بشيء ،
نجلاء صدت : انتي انزلي انا مافيني حيل لشيء ودي اجلس لحالي مابي اشوف احد تكفين ،
آمال : اليوم فرحة ملاذ يا نجلاء لا تخلين هاليوم تعيس ،
نجلاء ناظرت فيها بدموع : ليه ي آمال كل مره انا الوحيده اكون تعيسه بفرحة هالبيت كل مره يصير شي كلكم تفرحون الا انا تعيسه ليه جدي ظلمني مع مشعل ليه سوا كذا؟
آمال : انتي ظلمتي نفسك بنفسك يا نجلاء ما تكلمتي ووقفتي بوجه جدي علطول قلتي انك موافقه ولا حتى فكرتي!
نجلاء بدموع : كنت خايفه ارفض وجدي يزعل مني ما توقعت كل هذا اعيشه يا آمال !
آمال : وش يفرق هالكلام الحين؟ خلاص انتهى كل شيء ! ومشعل راح مو بس من هالبيت من قلبك وحياتك بعد ،
نجلاء : اخاف يصير فيه شي ؟
آمال : خلي يصير يا نجلاء هو ماعاد يعني لك شيء غير ولد عمتك اما خطيبك او زوجك انتهى ماعاد في ويكفي يا نجلاء قومي انزلي صدت عنها وقامت طلعت لبرا نزلت لتحت بهاللحظه ام نجلاء كانت طالعه وشافتها : ويننن رحتوا؟؟
آمال بتوتر : رحت اعدل شعرها و نجلاء مصدعه قالت بترتاح،
ام نجلاء : وش مصدعه! ابوكِ وافق وعطاهم كلمته والكل مبسوطين وفرحانين الا انتم تاركين اختك وجالسين بغرفتكم!
آمال ابتسمت : صدقق وافقو؟ خليني اروح ابارك لملاذ مشت دخلت مجلس الحريم وهي تناظر كلهم جالسين مشت وهي تسلم على ام صقر و ام مشعل ومشت تحضن ملاذ ،
ام مشعل : وينها اختك غريبه ما جت تبارك؟
آمال بقهر : بتجي الحين ،
'
مشعل وقف سيارته وقام بيدخل البيت لكن وقفه صوت شخص والتفت بحده : شتبييي!
خالد : حرك سيارتك من هنا هذا موقف سيارتي قبلك!
مشعل : ليه موقف ابوك وانا مدري! ولا هالشارع شارع ابوك ولا الارض ارض ابوك !
خالد : الزم حدك وحرك بسرعه دام النفس طيب عليك!
مشعل بقهر : ليه وش بتسوي يعني؟ وانا ماراح احرك سيارتي من هنا بتتصل على شرطه مثلًا ؟ ولا تذبحني!
خالد : قد كلامك يعني ماراح تحرك سيارتك؟
مشعل : اي قد كلامي وماراح احرك وعلمني وش بتسوي ،
خالد : اكسره لك عشان كذا حرك ولا اخليك تندم!!
مشعل : سوي الي تبي تسويه ماراح احرك ،
خالد : حلو طيب اخذ جواله وهو يتصل على اصحابه ،
مشعل كان واقف عند باب بيته بهدوء ويناظر ،
خالد كان يكمل يتصل على اصحابه ويجمعهم ،
مشعل فجاه رن جواله اخذه وهو يشوف رقم ابوه تجاهل وحط الجوال بجيبه وهو يناظر ، فجاه وقف كم سياره وكلهم كانو اصحاب خالد طلعوا وهم يناظرون لمشعل ،
خالد : الحين تكسرون سيارته  تكسيرررر.
مشعل مشى وهو يوقف قدامه : هذا حدك تجمع اصحابك ؟ تدري هالحركه اخر مره شفته وانا في المتوسط ؟
خالد التفت لخويه بمعنى امسكه ،
مشى واحد منهم وهو يمسك مشعل ، مشعل دفه بقوه ،
'
ابو مشعل : مدري وين راح ما يرد !
عبدالرحمن : يمكن راح للبيت ؟
ابو مشعل : بس مايرد عالاقل يرد يعلمني مو من عادة مشعل يتجاهل اتصالاتي خلوني اروح اشوفه ، وقفه صوت الجد ،
الجد عبدالعزيز : خله بيجي بنفسه انت اجلس ،
عبدالرحمن : ولا يا عمي انا اروح اشوفه مو مشكله انت اجلس بس عطني عنوان البيت عشان اشوف اذا راح البيت ولا ،
ابو مشعل ابتسم : تمام ياولدي الحين ارسل لك ،
الجد عبدالعزيز مد جواله لعبدالرحمن : تعال هنا طلع لي رقم مشعل خلني انا اتصل عليه يمكن يرد ،
عبدالرحمن مشى اهذ جوال الجد وهو يدور رقم مشعل انصدم من شاف رقم آمال والرقم مو غريب عليه! اخذ جواله وهو يشوف وفعلًا نفس الرقم والجد كان كاتب على اسمها آمال وعرف انها اكيد وحده من بنات فهد الي حاولت تكلمه!
انصدم ولا توقع هالشيء وطلع رقم مشعل ومد الجوال للجد.
'
نجلاء كانت جالسه تبكي قامت مسحت دموعها وعدلت وجهها وشعرها ومكياجها ومشت فتحت الباب ونزلت لتحت توجهت لمجلس الحريم تسلم عليهم وتبارك لملاذ ،
ام مشعل : تشرفتي توك تتذكرين تجين الله اعلم كنتي مع مين كل خواتك هنا الا انتي ،
آمال التفتت لنجلاء الي كانت مقهوره والدمعه بعيونها ،
ام نجلاء : لا بس كانت مصدعه لانها ما نامت زين ،
ام مشعل : ليه ايش عندها ما تنام زين؟ لا اختبارات ولا دراسه ولا زوج ولا عيال ايش الي يخليها تسهر ولا تنام زين؟
ام صقر : يمكن كانت سهرانه مع خواتها ،
ام مشعل : الله اعلم مع خواتها ولا مع مين ،
نجلاء عرفت قصدها وصدت تمسك دموعها وهي مقهوره،
'
مشعل كان واقف ويمينه ويساره واقفين وماسكينه بقوه ،
خالد بحده : هاه تشوف نفسك قد كلامك للحين؟؟
مشعل : اي قد كلامي وماراح احرك سيارتي ، وكان يحاول يدفهم ويطلع نفسه منهم لكن بنفس الوقت مقهور ،
خالد : نصيحه لك استسلم لانك راح تندم ،
مشعل : ندمت كثير ماعاد صار يفرق معي شيء ناوي تقتلني؟ اقتلني ما اقولك لا واذا ناوي تكسر هالسياره ف اكسره لانه بداخله شيء ماودي ارجع المسه وكان يقصد خاتم نجلاء ، واذا لمسته او شفته ف انا الي اذبح نفسي عشان كذا تخلص مني ولا من هالسياره ماعاد يفرق ،
خالد انصدم من كلامه ،
يهاللحظه وقف سيارة عبدالرحمن الي انصدم وهو يشوف العيال متجمعين عند مشعل وفز و ركض له : شصايررر؟؟؟
خالد التفت لعبدالرحمن : اوه شكلك اخوه يلا زين جيت تفاهم معه بالطيب وخله يحرك سيارتي من مكاني ،
مشعل بحده : قلتلككك ماراح احركهه ما تفهممم!!!
عبدالرحمن انصدم ومسك مشعل من كتفه: اهجد!
مشعل دف عبدالرحمن بقوه : ابعددد عنييي انت خلهم يكسرونه ويذبحونييي خلهممم يسوننن الي يبوننن ،
عبدالرحمن ناظر لخالد : انتظرني انا راح احرك سيارته بس خلوه لا تقربون منه ،
مشعل ناظر لـ عبدالرحمن: مالككك دخللل انت تفهمم ولا لا!
عبدالرحمن : عطني المفتاح بسرعه ،
مشعل : ماراح اعطيك ولا راح احرك سيارتي ،
عبدالرحمن : مشعل عطني المفتاح قبل اتصل على ابوك ،
مشعل : روح اتصل عليه ماراح اعطيك ،
عبدالرحمن : شصاير لك؟ توك كنت جالس معانا ومبسوط وتمزح وش صار لك فجاه شفيه وجهك كذا؟
مشعل كان ساكت وواقف وخالد يناظر فيه ،
عبدالرحمن سكت وهو يطالع فيه : تكلم احد مسوي لك شي؟
مشعل تذكر نجلاء لما رمت الخاتم بيده صد ودموعه بعيونه،
عبدالرحمن مد يده لجيب ثوبه وهو يدور المفاتيح ،
مشعل كان ساكت ومنزل راسه ودموعه ينزله سمح لنفسه انه ينهزم حاول يمسك نفسه كثير لكن ما قدر نزل راسه وهو يبكي،  عبدالرحمن مشى ركب سيارة مشعل وحرك وقف لبعيد ونزل وناظر فيهم : خلاص يخوي تقدر تتفضل وتمشي،
خالد كان مصدوم وسكت مشى واصحابه لحقوه ،
عبدالرحمن ركض مشى عند مشعل : شفيك مشعل ؟؟؟ تكلم احد مسوي لك شي ! فيك شي صاير شي؟؟؟
مشعل هز راسه بالنفي وهو يحاول يلقط انفاسه ،
عبدالرحمن بصدمه : مشعل تكفى تكلم قل شي؟؟
مشعل صد : انا بروح ءءالبيت ،
عبدالرحمن مسكه من كتفه : امشي معي ،
مشعل هز راسه بالنفي وهو مو قادر يتكلم اكثر ،
عبدالرحمن مشى سحب المويا من سياره ومده له : اشرب ،
مشعل صد : اتركني يا عبدالرحمن و روح عني ،
عبدالرحمن : اجلس طيب اجلس هنا ،
مشعل سكت وجلس على طرف الرصيف وعبدالرحمن جلس جنبه وهو ساكت ويناظر فيه ، مشعل مسح دموعه بـ كُم ثوبه واخذ نفس وهو يناظر للشوارع بصمت ،
عبدالرحمن : اذا ممكن فيني اعرف سبب هالضيقه؟ اعرف في شي قوي صاير معك وصلك لذي الحاله انك تبكي!
مشعل صد :  مو صاير شيء ،
عبدالرحمن تنهد وهو يناظر فيه بحزن ،
مشعل قام وناظر فيه : عطني المفتاح ،
عبدالرحمن : امشي معي ابوك ينتظرك هناك ،
مشعل بحده : قل له ماني جاي ولا ارجع لذاك البيت وقرب سحب المفاتيح من عبدالرحمن وصد مشى ،
'
الجد سُليمان : ومتى ان شاء الله تسمحون لنا نحدد موعد الملكه والعرس ؟
فهد هز راسه بالنفي : لا ياعمي ماودنا بالعرس خلوه بس ملكه يعني انتم عارفين حالة البنت وماودي شوشره وازعاج وهي بذي الحاله ف ملكه فقط بين الاهل ،
يوسف : الي يريحكم حنا موافقين اي شي تبون تم ،
صقر التفت لعمر : كيف يعني ماراح يكون في عرس!
عمر : غبي انت؟ وشو له العرس وهي ما تشوف شي يعني ما تفرح ولاشيء ف صح كلام ابوها بس الملكه ،
صقر : طب يمكن هي بخاطرها عرس وتلبس فستان ابيض؟
عمر بضحكه : لبسها عندك لما تجيك ،
صقر انصدم وقرب وهو يقرصه ،
عمر ضحك وصد : والله احمد ربك انهم وافقوا بس ،
صقر : وينه عبدالرحمن تاخر؟
'
نجلاء ناظرت لملاذ : تعبتي شكلك اخذك الغرفه؟
ملاذ هزت راسها بـ اي نجلاء قامت مسكت يدها واخذتها ،
آمال قامت لحقتهم و مشو للغرفه ودخلوا ،
ملاذ مشت جلست وهي متوتره طول الوقت ،
نجلاء ناظرت لآمال : بيسون عرس هُم ؟
آمال : الي عرفته من ماما انه بابا رافض مايبي ،
نجلاء سكتت من تذكرت وهمست : تدرين اني خايفه؟
آمال : ليه ؟ لا يكون عشان سالفة مشعل؟
نجلاء : اي خايفه من جدي رغم اني قلت لمش.. سكتت وهي تشوف جوالها يرن مشت ناظرت للاسم وقفلت الخط ،
مشعل كان يسوق ووقف سيارته عند مكانه المُعتاد الي يحبه وكل ما تضايق يجيه البر ونياقه وخويه الي يعيش هناك نزل ومشى بهدوء دخل وهو يشوف خويه واقف عند النياق ،
سالم باستغراب : غريب جاي بهالوقت مو قلت انك بتر..سكت وهو يشوف ملامحه الي ما يطمن وواضح صاير معه شيء تنهد وهمس : متهاوش مع احد؟
مشعل تنهد بضيق : ياليت يا سالم ياليت متهاوش ،
سالم : شكله الموضوع طويل تعال اجلس وقل شصاير معك؟
مشعل فتح يده والخاتم بيده سالم انصدم وهو يناظر فيه،
مشعل جلس بهدوء : اليوم الي خفت اعيشه اليوم اعيشه يا سالم رمت هالخاتم بوجهي وانا كليوم اجيك واقولك ايش ارسل لها هديه و ايش اكتب لها بالكرت بس هالمره جيتك اقولك لم جرح صدري كسرتني يا سالم قسم بالله ضاقت فيني الدنيا يا سالم يا وسع هالدنيا ويا ضيق صدري ،
سالم كان مصدوم وما توقع انها ممكن خطيبته تتركه كان يحبها اكثر من نفسه ويموت فيها !
'
= الكل تجمعوا على العشاء وبعد العشاء تقهوو وكل شخص راح لبيته وانتهى يومهم بفرح الا مشعل الي انتهى يومه بضيق، وصقر الي الان مو مصدق انه فعلًا وافقو وملاذ بتصير زوجته! كان جالس بالسياره ويضحك كل ما تذكرها ،
عمر اخذ الجوال وهو يتصل على سلطان ،
ام صقر بضحكه : عساك مبسوط الحين؟
صقر : الارض مو شايلني من الفرحه يا يمه ،
عبدالرحمن الي كان بعيد عنهم ويفكر ليه بنت فهد راسلته وسوت هالحركه ووش مقصدها من الكلام الي قالتها؟
عمر بضحكه : والله سلطان شكله نام بالمطار ما يرد ،
يوسف : خله يا يبه لا تزعجه خله يوم القصيم ونعلمه ،
الجد سُليمان : كلمتوا الشغاله ترجع ؟
ام صقر : اي كلمتها ترجع وتجهز له فطوره و اكله وتنتبه له،
'
البنات كانوا جالسين بغرفتهم ملاذ كانت منسدحه وتفكر بحياتها الي من هاليوم تبدا تعيشه وتعيش مع شخص ما شافته ولا تعرفه ولا بتشوفه ولا تقدر تكلمه كيف بتعيش معه؟
ونجلاء الي كانت خايفه من ردة فعل اهلها اذا عرفوا عن مشعل والي سوته تنهدت وهي تاخذ جوالها ومتردده تكلمه.
آمال كانت باليوتيوب تدور اغاني تشغلهم بملكة ملاذ كانت بعالم ثاني لكن فزت من وصلت لها رساله من عبدالرحمن ،
اخذت جوالها وهي تشوف راسل : هاه يا بنت فهد شالاخبار؟
فزت وتجمدت بمكانها بخوف : يمه كيف عرف! ركضت بتروح عند نجلاء لكن وقفت وهي تشوفها نايمه ، قامت تكتب وهي متوتره : مين فهد شقاعد تقول؟
عبدالرحمن شاف رسالتها : اوه غريب ما تعرفين ابوكِ؟
آمال بصدمه : شكلك سكران مو بوعيك شقاعد تقول؟؟
عبدالرحمن بسخريه : تقولين لي سيارتي مو موجود بالقصيم؟
آمال بخوف : ما قلت كذا قاعد تجيب كلام من راسك ،
'
فهد دخل الغرفه وناظر لـ لطيفه كانت واقفه عند التسريحه تعدل شعرها وتمسح مكياجها ابتسم ومشى وهو يحط ساعته على الطاوله وهمس : هاه مبسوطه ؟
ام نجلاء التفتت له : مدري للحين مو عارفه شيء ،
فهد : اشوف البنات مختفين صاير شيء؟
ام نجلاء : والله تعبانين ونجلاء مدري شفيها متضايقه واختك ما قصرت فيها قعدت تدقها بالكلام ،
فهد : تدق نجلاء بالكلام! وليه؟
ام نجلاء : تعرف اختك انت تبي نوافق للزواج ،
فهد : وينها نجلاء خليني اش..قاطعتها لطيفه : نايمه خلها،
فهد : انا ابوهااا يجون يكلموني انا مو بنتي!
ام نجلاء : اختك مو اول مره تسوي هالحركات دايم تجي تضايقها بس اسكت عشان مابي مشاكل ،
فهد بحده : انا بنتي ماهي محبوره انها تتحمل كل هذا وتسكت صحيح اختي على عيني وعلى راسي بس كل شيء الا ضيقة بناتي ما ارضى يا لطيفه والمفروض تعلميني!
'
عمر : صدق يبيها تلبس فستان ابيض ،
عبدالرحمن ترك جواله : اجل تلبس ليش لا ،
صقر : والله ودي لو جبتها معي اليوم اوف بس مافيني صبر ،
عمر : البنت بتنحاش منك والله انت ووجهك ذا ،
صقر تنهد : تصدقون اني خايف لو تعالجت وصارت تشوف ف ما تتقبلني وتكرهني؟
عبدالرحمن : اهب وش هالتفكير خل عنك بس وش زينك ،
عمر : والله لو انا اعمى وما اشوف برضوا ما ارضى بواحد زي صقر معليش بس هذا الصدق ،
عبدالرحمن : اقول اتصل على سلطان شف وينها ،
صقر : الحين ليه ابوها رفضت العرس؟
عبدالرحمن : يمكن عشان البنت ماتبي ،
'
ام صقر : ولدك مبسوط الفرحه مو سايعته ،
يوسف ابتسم : الحمدلله وهذا الي نبيه حنا ما قدرت اتحمل وانا اشوف ولدي طايح ويعاني من ورا هالحُب الي ضيعه ،
ام صقر : بس تصدق شفت البنت واحس صعب صقر يعيش معها كيف يتعامل معها هي حتى خواتها يغيرون لها!
يوسف بهدوء : عادي وين المشكله هو زوجها وقت على انه يغير لها؟ واذا هي ما ودها يحط لها شغاله مو مشكله بس اهم شي سعادة ولدي ماودي نروح عن هالدنيا وحنا كاسرين بخاطرهم ودي احقق لهم كل الي بخاطرهم ،
'
سالم بهدوء : انت ايش فكرت؟
مشعل : حاولت نتفاهم اتصل عليها تقفل بوجهي ما تعطيني فرصه حتى ماني عارف يا سالم ،
سالم : بس لو اصرت على قرارها بتتركها صح؟
مشعل : وش اسوي بعد خلاص بنفسي اكلم جدي واحط كل الغلط واللوم علي اهم شي هي ما تتاذى راضي انذل و انهان من اهلي واهله بس هي ما يمسها الضرر ،
'
'