No, But Yes

CHAPTER 6

"WAG mong igalaw ang kamay mo. Baka itaas mo 'yan a, mahawakan mo 'to. Bahala ka dyan."

"Ang dami mong sinasabi. Bilisan mo na. Kadiri naman kasi 'yang ihi na mo."

"Bakit mo kasi hinawakan ang tayom?"

Hindi kumibo ang dalaga, tinakpan niya ng isang kamay ang mga mata niya habang mahigpit ang pagkakapikit. Naiisip niya pa lang kung gaano nakakadiri ang gagawin ni Jegs, nakakaramdam na siya nang pagbaligtad ng sikmura. Maraming pananakot na ginawa si Jegs, kaya napapayag siya nito na ihian ang palad niyang natusok ng tayom. Ngayon niya lang narinig ang ganitong klaseng bagay, kaya hindi niya sigurado kung pinagloloko lang ba siya ng binata o totoo na mawawala ang matulis na bagay na nasa palad nya.

"Ayan na... ayan na... ahhhhhh!"

"What the bur! Bakit ka umuungol?"

"Umuungol talaga? Hindi ba pwedeng umiihi lang?"

"Tapos na ba?"

"Oo tapos na."

Hinila ng dalaganag kamay niyang basa ng ihi ng binata. Tumalikod din siya para hindi niya makita ang nakadungaw na alaga nito. Hindi siya interesado, kaya wala siyang pakialam sa lalaki.

"Yuck, kadiri talaga." Hindi maipinta ang mukha ni Iza nang makitang basa ng ihi ang kamay niya, inilayo niya rin ito sa mukha niya dahil sa pandidiri.

"Yuck, yuck, yuck!" Iwinasiwas ng dalaga ang palad niya at napatakbo sa loob. Si Jegs naman ay tinawanan ito habang nakatingin kung paano ba mandiri ang dalaga.

"Akala mo ha, arte-arte ka pa." Umalog ang balikat ng binata.

Pinagpatuloy ni Jegs mag-isa ang pagkuha ng mga shells, habang tinatawanan ang dalaga. Ilang sandali lang din nang marinig niya ang makina ng bangka, napatingin siya sa gawi kung saan nanggaling 'yon. Nakita niya ang isang babae na bumaba mula roon. Nakasuot ito ng mahabang tela na tinatakpan ang mukha sa init ng araw.

"Sino 'yon?" tanong ng binata sa sarili. Kasunod nito nakita niya ang kaniyang ama at si Parshang na bumababa ng bangka. Hindi muna lumapit ang binata, pinagmasdan niya ang mga ito na papasok sa loob. Nagtataka siya kung may turista na ba, hindi naman din iyon kasing katawan ni Sandra, kaya malabo na ina ito ni Iza.

Bago sumunod sa loob, hinugasan muna ng binata ang kamay niya sa dagat. Ang tingin niya ay hindi maalis sa babaeng bisita nila. Wala naman siyang ibang kilala, kaya paano napunta ang babae na 'yon kasama pa ang kapatid at ama niya.

"Tay!"

Sa pagtawag niyang ito, napukaw niya ang atensyon ng tatlo. Natigilan din sila sa paglalakad. Sa puntong humarap sa kaniya ang babae, doon niya lang napagtanto kung sino ito.

"Valen?"

Ang pagtataka sa mukha ng binata kanina ay napalitan ng ngiti. Ibinaba niya rin ang timba na hawak niya at lumapit sa babae. Ang kaninang nakataklob sa ulo ni Valen, ay nagawa na rin niyang alisin.

"The one and only!" Inilahad ng dalaga ang dalawa niyang palad na para bang binibigyan ng titulo ang sarili niya.

"Uy, kamusta ka na? Anong ginagawa mo rito?" Lumapit ang binata para yakapin ang kaibigan.

Kababata ni Jegs si Valen, dito rin sa isla noon nakatira ang dalaga kasama ang kaniyang ina, pero noong sumapit ng sekondarya ang dalaga kinailangan nilang umalis sa isla para sa pag-aaral nito. Noon, tuwing bakasyon ay nasa isla ang dalaga para samahan si Jegs, ngayon na lang ulit siya nakapunta rito dulot na rin ng pag-aaral niya ng kolehiyo.

"Nakita namin siya kanina sa bayan, kaya inaya na naming sumabay. Mukhang dito rin naman ang punta," anang matanda.

Bumitaw sa pagkakayakap si jegs. "Dito ka muna ulit?"