وردة يعقوب🌹مكتملة🌹

🌹الجزء 38🌹

❄🌺قصة : وردة يعقوب🌺❄

🦋البارت : 38🦋

قريب من الدار في راس الشارع واقفين لي جايبين الفطور لعروسة كايتسناو في الدقايقية فين دايرين معهم لابسين مكشطين ومقادين حتى وصلو الدقايقية و بداو طرحهم و هوما محركين بالشوية للفيلا و الناس كيصفقو و يغنيو معهم كلشي ضاحك وفرحان محيحين

بعيد شوية عليهم كانت واحد البنت كتجري و شعرها الاسود كيطاير و كتشوف موراها بحالا شي حد تابعها وقفات كتنهج مفقوصة و كتنفس بالجهد ضرها جنبها بالجري هزات راسها منين سمعات صوت الغنا و ابتاسمات بفرح منين شافت الناس و الدقايقية فهاد البلاصة المقطوعة مشات كتجري تخشات وسطهم و بقات غادة معهم و حاضية هادوك جوج دراري لي كانو تابعينها بطنوبيل باينة ديال لكري غاكارينها حلفو لا بعدو منها حتى طلع معاهم يديرو كافي ولا تعطيهم نمرة شوفة فيهم تعرف سوقهم خاوي وكيقلبو غا على صداع تابعينها كيقلبو عليها زادت تخشات و تخبات وسط الناس وبدات تشطح معاهم وتغني معاوانهم وفرحانة كاتموت على لعرسات و النشاط دخلت معهم للفيلا تا هي وغادية بكل تيقة كتشطح تقول داخلة لدارهم

لداخل غير سمعو لغياطة ولحيحة وشطيح خرجو البنات بقفاطنهم و الدراري تا هما كيطيرو تلاقاو معهم قريب الباب ديال برا كيشطحوا ودخلو حتى هما معاهم مكاين غا الله يعطيك الصحة تا هوما محيحين مامقصرينش حتى خرجات عائشة وخديجة ومامات وصال وياسين سميرة كانوا عائلة عائشة و صحاباتها و جيرانها عرضات عليهم كاملين حيث حتى هما مكيفتوهاش اي مناسبة كيعرضو عليها

لداخل كانت شمس لابسة و مقادة طلعات فنة طايح عليها السر منورة لبسات قفطان فالأبيض جاها ملبوس وغزاال مع طايتها لي حوتة وشعر مطلووق على طولتو كايطرب في فخيداتها دايرة إكخون ومسكارة وايلاينر مع قلام ابيض في لعينين وكلوس خفيف بلغوز مزينة وديناتها بطوانك صغار ديال ذهب وبراسلي خفيف ايضا ذهب وخاتم زواجها وفي رجيلاتها صندالة ديال كالون سانبل بدهبي مبينة رجيلاتها لحومر جات كاتحمق بزين ومع مطيبزة ولحنيكات كتبان بحال شي وريدة كتطل من ورا لخوامي ديال لبالكون ديال بيتها على الفطور والناس و عينيها كيلمعو ببراءة و زادت فرحتها منين قشعات ماماها كاتشطح لابسة حتى هي ومقادة بدات ترمش ببراءة وتفرنس توحشاتها بزااف وخا غا نهار باش جات

على برا هيشام و ياسين عاطينها لشطيح بلارج وجارين عائشة وسميرة معاهم مدورينهم كايشطحو
ملاك كاتشطح وتصفق : اااايواااا ولي ماعندها مزون تسلفو ولي ماعندها ترمة تكمش
وصال : وعلى تي كتكسابيها ؟؟
ملاك : لا غا كنلوز لي بغاني يبغيني مسلوتة

البنت شافت راسها بوحدها لي لابسة سروال دجين و قاميجة قصيرة بالاسود ماكرهاتش كون لبسات شي قفطان تفكرات شي حاجة بزربة جبدات لكاغطابل من ظهرها حلاتو لقات كولشي فبلاصتو عاد رتاحت وزادت مكملة شطيح وهي غا تبعاهم