نيران أبو ذيبه

بارت 30

" نـيـران أبـو ذيبـة "
بـقـلـم : نـبـأ السـلـطـان '
الحـلقـة الـ ٣٠
‏"لماذا تريد مني أن أخوض معك الأيام وكأنها معركة، لماذا تصرّ على أن يخسر أحدنا الآخر بينما كنت أنتَ إنتصاري الوحيد؟"
...........................
معصومة : صار الصبح اخذوا الجنازة للتشييع بعد ما ودعناه وما قبلوا نسوان تروح
غضب : شلنا النعش على كتوفنا شيعناه
عايد : بعد ما صار التشييع وشدينة الجنازة على السيارة
شفت غضب ركض على السيارة وحضن التابوت
غضب : هااا يلااا اكعد اكعدد شووفني حاجيني
بعد ياهو اليگلي انتبه لروحك
ياهو اليگلي انتبه لا تجيك طلقة
ياهوو الينزع قمصلته وينطينياها يخاف لا اتمرض من البرد
شووف هذا حالي 
عايد : حاولنا ويا غضب ما قبل يبتعد
غضب : ولكم عوفوني اريد اشبع منه عوفوني
كركان : كوة اقنعنا غضب ينزل وانطلقنا للنجف
شمس : فزيت على صوت رمي جاي من صوب اهلنا
استغفر الله يربي شكوو بس لا احد صار بي شي
صار بالي كلة يم اهلي وعايد
رحت لغرفة الحجية لكيتها كاعدة
هاشمية : ها يمة شبيج
شمس : حبوبة تسمعين صوت الرمي
هاشمية : سترك ربي اي يمة مو شي جديد
اكيد حرامية
شمس : لا حبوبة والله هذا جاي من صوب اهلي بس لا صاير بيهم شي
هاشمية : كولي يا الله بنيتي هاج دكي على محمد
شمس : اخذت الموبايل منها اتصلت على محمد
اتصلت مرتين ميجاوب اكيد نايم
اتصلت النوب جاوبني صوته مبين جان نايم
محمد : الو
شمس : الوو ها محمد انه شمس
محمد : هلا هلا شبيج صاير شي
شمس : لا بس سمعنة صوت رمي جاي من صوب اهلي وحبوبتي كالت دكي على محمد
فدوة شنو صاير شي
محمد : ما ادري والله انه مو بالناصرية
هسة شوية اشوف واخابركم لا يضل بالكم
شمس : نهيت الاتصال منه وضليت كاعدة
شوية ورجع اتصل
محمد : ها شمس بعدج كاعدة
شمس : اي محمد فدوة شصاير
محمد : حسن استشهد
شمس : حسن يا بسس لا حسنّة
محمد : اهدي بوية الحمدلله على كل حال وهوه شهيد
شمس : احجي بدموع والحجية تسألني شبيج
محمد فدوة بداعة الحجية تعال اخذني
محمد : كولي يا الله هسة دنيا ليل تصير الصبح واجي اخذج
شمس : محمد الله عليك تعال هسة
محمد : تمام اني راح اجي
هاشمية : شبييج ولج ياهو المات
شمس : حسن استشهد حبوبة ابن عمي خيون
هاشمية : ياااع حسن المگيريد هنيالك يحبوبة الله يرحمك  راح بطل شهيد يمه لا تبجين
شمس : حضنت الحجية وابجي بحضنها
بيها حنية الما شفتها عند امي
غفيت واني دموعي على خدي
ما حسيت الا واحد يندهني
محمد : يلا شمس اكعدي نروح
شمس : اي اي
رحت لغرفتي بدلت ملابسي وطلعت
محمد : ليش ما اخذتي ملابس وياج
شمس : اني العصر وراجعة مو لأن خالتي كريمة متقبل اكيد
محمد : روحي جيبي ملابس وياج معليج باحد
شمس : رحت جبت ملابس وياي
محمد : يلا مشينة
كريمة : وين مولية المسعدة
محمد : يمممة محد اله شغل بيها انه رجلها وراح اخذها
كريمة  : وين تريد بيهة
محمد : لبيت اهلها عدهم فاتحة
كريمة : وهاي الفاتحة ما تصير الا بحضورج
محمد : كافي رجائا. مو وكت كلامج يلا شمس امشي
شمس : طلعنا اني ومحمد صعدت بالسيارة واتوجهنة لصوب اهلنا رجعت بية الذكريات وشلون اول مرة اجيت بهذا الشارع كل شي ما متغير
فزز صفنتي محمد
محمد : شبيج صافنة
شمس : ها لا ما بية شي ودنكت راسي
محمد : شمس هاج هذا الموبايل وبي سيم كارت ورقمي شنو تحتاجين اتصلي علية
شمس : اخذته منه صدك جنت بحاجة الموبايل
شكرا محمد ما انسى وكفتك وياي
محمد : بعدج ما شايفة شي وثانيا لا تنسين انتِ بحسبة اخواتي والما اقبله على اخواتي ما اقبله على إي بنت مهما كانت
شمس : ما عرفت شيقصد بـ بعدج ما شايفة شي
وصلنا للشارع اليطلع لبيتنا مسافة عن البيت صرت اشوفه
محمد : يلا انزلي منا روحي
شمس : فهمت قصدة لبست بوشيتي ونزلت وتوجهت لأهلي واني دموعي تنزل عشرة عشرة
افتريت من ورى بيت عمي خيون ودخلت للبيت
اوووفف
معصومة : دخلت بنية لابسة بوشية الشكل مو غريب علية
صاحتني
معصومة : رحت علينا رفعت البوشية عن وجهها
اخذتها للغرفة وسديت الباب حضنتها ونبجي سوية
شمس : اووفف
معصومة : منو جابج
شمس : محمد وصلني
معصومة : يلا عوفي ملابسج هنا وخلي نطلع
شمس : طلعت وركضت لأمي وحبوبتي ابوس بيهن احس روحي طير وكل ما اتذكر هذا الشي مؤقت ينقبض گلبي
كركان : وصلنة النجف ودخلنا لحضرة الآمام علي عليه السلام
غضب : يبو الحسنين شووف لخاطرك اخواني وربعي واهلي ودنيتي لاا تخليني وحيد
صبرني يداحي الباب صبرني
عايد : غضب يحجي بصوت عالي ويرجف
الكل يبجي على منضر غضب
توجهنة للمقبرة ودفنناه قرب قبر والده وامه وعمي خيون
غضب : رحت لقبر ابوي
بوية حسن صار يمكم ديروا بالكم علي
عمي ابو حسن وليدك خطارك اليوم مو تخلونه وحده
عايد : رجعنة للناصرية والتعب والكسرة طاغية علينة
معصومة : اجوا من النجف والكل جان بأنتضارهم
امي وحبوبتي تخربطن كلش وتعبن
دخل غضب وعيونه صايرات دم باجي هواي
حضنته اني وقمر ونبجي بحضنة
غضب : مسحت دموعهن وبستهن
:- امي وين
معصومة : تعبانه كلش هي وحبوبتي وخليتهن بالغرفة يرتاحن
غضب : سويلي طريق اشوفها
معصومة : دخلت سويت طريق ودخل غضب للغرفة
غضب : لكيتهن نايمات
لزمت ايد امي وبستها
حياة : غضبان ها يبعد هلي
غضب : اششش يمة عوفي البجي
حياة : شلون ما ابجي يبعد امك شلونن والعزيز صار جوه التراب
شمس : كمت من يم امي و دزيت طفل على ابوي يصيحه
شوية واجه
امير : ها بوية شتريدن
شمس : ما اشتاكيتلي
امير : يا بعد طوايفي يا بوية
شمس : حضنته حيل حيل متغير والشيب تارس راسه
مشتاقتلك بابا
امير : يا عيون ابوج وعلي روحي مشتعلة عليج
شمس : نبجي سوية وحاضنته حيل اريد اشبع منه قبل لا اروح
اووفففف
امير : ياهو الجابج
شمس : محمد جابني
امير : جزاه الله خير
يلة بوية انه اروح انتبهي لروحج يا بعد هلي ولا تروحين بدون ما تكولين لي
شمس : صار
مشتاقة لكل شي وبالأخص ابوي وعايد
ولكل شي
لسة ما شفته ملتهي
غضب : تمت مراسيم العزاء
والناس كلها تتجمع اباوع بالوجوه ادوره بين كل الناس
شمس : صار الليل وكلنا تعبانين اجيت لكيت محمد متصل علية مرتين
اتصلت علي
محمد : هلا شمس شلونج
شمس : الحمدلله انته شونك اسفة والله بس مو يمي الجهاز
محمد : لا عادي بس حبيت اكلج ضلي اليوم اني ما اكدر اجيج
شمس : تمام ان شاء الله
نهيت الاتصال منه ورحت اساعد البنات
شغل علينة ومواعين
غضب : صار وقت متأخر بالليل والكل راح لبيته
عايد : غضب
غضب : هلا
عايد : روح ارتاح يلا انته تعبت هواي نام
غضب : ما جايني نوم
عايد : تضل بهالتتن والسهر يرجع الراح مثلا كوم يخوي كووم ارتاح يرحم والديك
غضب : كمت وتوجهت للبيت تفاجئت بوجود شمس
شمس : دخل غضب علينة وكأنه عمي خيون الله يرحمة تعبان كلش والشيب براسة صاير
عيونه حمر دم
غضب : ها شموسة شلونج بوية
شمس : هلا يا بعد شموسة شلونك
غضب : هذا لوني
شمس : انعصر كلبي ما اعرف شكول وبيش اواسيه
شوية ودخل عايد
احس گلبي طفر كل شي بي متغير وكبران
عايد : بعد ما جيكت كل شي دخلت للبيت
سمعت غضب يسولف وي البنات واجاني اسم شمس
فتت للمطبخ واني اشوفهة كبالي
شمس : دنكت راسي وعيوني كامن يخرن دمع
عايد : حجيت واني احس غصة ببلعومي
ش شمس شلونج
شمس : الحمدلله انته شونك
عايد : الحمدلله
رحت للغرفة واجه غضب وراي
غضب : شبيك ولك
عايد : غضبب ولكك شووفها شلون متغيرة يعني مرتاحة بغيابي غضبب
غضب : صوتك ابن يا خرة شبيك تصيح
عايد : يعني شنوو راحت موو غضبب لا تخبلني
غضب : اكل هوى وانجب مو وكت كلامك هذا
صم حلكك شنو مرتاحة يعني حكمت على شكلها من شفتها
عايد : لا اله الا الله
غضب : نام ورانا شغل مو مال سوالف زعاطيط
عايد : طلع غضب من يمي واني ضليت الوب
حاولت انام ما كدرت
شمس : خلصنه كل شي وكل وحده راحت لفراشها نسوان عدنا هواي
حاولت انام ما كدرت
عايد : صارت ساعة 12 بالليل طلعت برة بالحديقة احس نفسي مخنوك الجو بارد وهوى عالي شوية
ورثت جكارة وكعدت على الكرسي
سرحت بالذكريات ويا حسن
كل ما اذكر شي غصة بگلبي تصي.
فزز صفنتي صوت شمس
شمس : عايد
عايد : كمت على حيلي وباوعت عليها
شمس : ما اعرف افسر نضراته شنو
عايد : شلونج بزواجج مرتاحة موو
شمس : زواج شنو عايد شبيك
عايد : مدري عنج جا شلون فصلية ويخلونهة تجي لأهلها اكيد يعني صار كل شي رسمي
شمس : لا عايد والله مو مثل ما تفكر
عايد : اشششش راح يصير سنتين واني اجالع مثل الموسس بالبلعوم لا اني اكدر اعوفج ولا اكدر اتصرف غير تصرف
شمس : دموعي نزلن بغزارة حجاياته شعلن نار بكلبي يعني معقولة هيج يحجي وعباله اني عايفته
لك عايد والله ماكو شي وداعة ابوي
عايد : لاا تبجين رجائا مو بكل مرة تبجين واضعف مثل الحمار وادوس على كلبي في سبيل ما تبجين
روحي يرحم اهلج ما اريد اضعف مرة ثانية واتراجع البية مكفيني والله
شمس : عافني ودخل ليجوى
ما اعرف شسوي الله ذب علية بس البجي
شفت شحاطات هواي بالأستقبال دخلت لكيتهم نايمين وابوي يمهم نايم
رحتله كعدته وعيوني يصبن دمع كعد شاف حالتي وحجه بصوت ناصي
امير : انا غلام ابوي شبيج يبا
شمس : حجيت بهمس. تعال بابا
طلعنة للحديقة صايرة ورى البيت
امير : شبيها شمسي ليش تبجين ولج
شمس : ماكو شي بسس
امير : احجيلي بنيتي صاير بيج شي احد مأذيج
شمس : لا بسس مشتاقتلك وما كدرت انام
امير : جذبي علية جذبي
شمس : ابتسمت بين دموعي حضنته حيل
امير : مو تنفرين بعلباي
شمس : هههههه لا لاا
امير : اكلج شوو احس نزل علية متني شي بارد
شمس : هههه يااا لا والله
امير : شلون عايشة هناك
شمس : حجيتله كل شي وشلون الحجية هاشمية تدافعلي ومحمد كذلك
امير : جزاها الله الف خير انتبهي لروحج وصيري سباعية
شمس : انشالله
امير : يلا روحي نامي الوقت تأخر
شمس : اي صار
رحت من يم ابوي وشوية مرتاحة تمددت بفراشي ونمت رأسا لان نعسانه
غضب : كعدت بـ 4 الفجر والدنيا ضلام
شغلت الاضوية وكعدت الولد يجهزون كل شي
كعد عمي امير وعثمان
عثمان : ها الذيب شخبارك
غضب : بخير دامك بخير
بدوا الولد يحضرون الماي والكراسي وينضفون الى ان طلعت الشمس
بدوا الناس يجتمعون
مر يومين على الفاتحة وانتهى كل شي
كلمن رجع لحياته وعمله بس ناري تطحن بية
خلصت واني بعدني على امل يعود
نسرين : رحت لبيت الحجية مشتاقتلها ومشتاقة لشمس هواااي
دخلت للبيت لكيت محمد يغسل بسيارته
محمد : هلا بالحلوة
نسرين : موو عيب انته متزوج حمدمد
محمد : بس بالأسم بابا شنو متزوج
نسرين : والله مدري بيكم بعد شمس وين
محمد : ما موجودة
نسرين : ليش تجذب ما راح اكلها ندري حلوة
محمد : بكيفج
نسرين : اكيد جذاب ووييعع
محمد : ههههههه خوش
نسرين : دخلت لغرفة الحجية
هاا يحلوة.
هاشمية : يمة هلة
نسرين : حضنتها وبوستها بس حسيتها مو تمام
هاشمية : شلونج يمة
نسرين : الحمدلله حبوبة بس شبيج تعبانه صاير بيج شي
هاشمية : لا يبعد امج بس شميسة راحت لهلها
وبالي يمهة
نسرين : ياااا ليش راحت
هاشمية : عدهم فاتحة غير ابن عمهة استشهد
نسرين : ايي واني اكول الرمي شنو هذا
ضجت حيل من سمعت كلامها
هاشمية : هاج هذا جهازي واخذي رقمهة من محمد ودكي عليها
نسرين : اخذته ورحت اله
حمادة حموود
محمد : وسم شبيج ولج
نسرين : انطيني رقم شمس لحبوبتي تريد تدك عليهة
محمد : لحبوبتج لو الج
نسرين : هههههه اثنينة
محمد : سجلي يمج
نسرين : ما شاء الله حافظة على كلبك
سجلته واتصلت عليها
متجاوب اتصلت النوب هم متجاوب
شمس : كاعدة يم البنات وسمعت موبايلي يدك رقم غريب عفته ما جاوبت
دك 3 مرات ما جاوبته عفته
شوية ودك هم شفته المتصل محمد
نسرين : ثكيلة متجاوب الله يسلمها
محمد : انه ادك عليهة عوفي
:- دك محمد وانطانياه
شمس : جاوبته بس ما يحجي
الو محمد شبيك
نسرين : ما لزمت نفسي ضحكت
شمس : ياااا هاي انتيي جا ليش ما تحجين
نسرين : حقيرة تروحين بدون متكولين
شمس : والله بساع بساع وبعد تعرفين فاتحة ماكو وقت
نسرين : سولفت وياها وحجت وياها الحجية
نهيت الاتصال منها ورجعت الموبايل لمحمد
يتبـبع ...
#_نبـأ _السلطان
توقعاتكم للقادم ..🍬💐