نيران أبو ذيبه

بارت 33

نيران ابو ذيبة "
بقلم : نبأ السلطان
الحلقه .. ٣٣
غضب : طلعت الكرسي وكعدت بالحديقة
اباوع بأركان البيت واحسه ضيك علية
شوية وطلعت حبوبتي
قسمة : غضبان يمة
غضب : ها يمة
قسمة : يمة باجر خميس ونريد نسوي ثواب لاخيك، سوده علية، صرت اثوب اله ولاهليته ولابوك،
غضب : صار باجر من الصبح اروح للسوك واتسوك
قسمة : الله يرضى عليك وليدي
غضب : تحجي بعبرة باوعت عليها شفتها تمسح عيونها بشيلتها
اغدي فدوة لعيونج الحلوة سباحة گلبي
..
بست ايديها وكعدتها على الكرسي وكعدت كبالها
هاي العيون ما اريد يبجن مفهووم
حسن راح والبجي ما يرجعه وداعتج ومن هالشارب لأخليج تهلهلين وثارة يردلج..
قسمة : غضبان سالفة الثارات بطلها خلي الله قبيله وبعدين نتحاسب بالاخرة
غضب : الله كريم حبوبة الله كريم
احجي والحرگة تطحن بروحي
قاطعنا صوت الباب يندك رحت فتحته
ابو عايد : السلام عليكم
غضب : وعليكم السلام يا هلا تفضل
ابو عايد : زاد فضلك ابني
غضب : دخل وامشي وراه
شعنده هذا جاي وهسة الا ذكرنا
ابو عايد : شلونج يالبركة
قسمة : ول لا بارك الله بيك هسة تذكرت عندك ام
ابو عايد : وداعتج ملتهي بهالدنية
قسمة : انه گايلتها ولكم وروح خيون ما تتوفقون وتضلون طول اعماركم بذل دامكم هيج
ثلاث اويلاد عندي محد كلف نفسه يدك باب ويكول اميمتي شتاكل شتشرب ميته عدلة
ابو عايد : حقج حجية حقج وروح اخوي اركض والعشة خباز
غضب : اباوع واسمع شلون يمثل دور المسكين وكأنه فعلا هوه المسكين
قسمة : وروح ابوي متبرية منكم انه ماعندي ويلاد بس خيون وخيون راح.
ما اريدكم ولا اريد شوفتكم
غضب : تحجي بحرگة كلب وانفعلت كلش
طلع ابو عايد ووصلته لخارج البيت
ابو عايد : مكرهينها بينه ولكم
غضب : ؟؟ العفو يابة على اساس انت يومية داك بابها وتسأل لو شايلها لطبيب بمرضها
لو تغطيها من تبرد
جان استحيتوا على انفسكم. انت عمي واكبر مني ما اريد اسيء الآدب وياك خليك باشغالك والحجية بأتم حال يمي ما محتاجة طلتك الجميلة
ابو عايد : الله كريم يصير خير
غضب : ادري الله كريم جا ابو كريم مثلا صارلكم عمر لا ذمة ولا ضمير
دار وجهة وصعد سيارته وراح
نسرين : من عملة ابوي السواها وياي گمت حتى ما احط عيني بعينه ولا احجي وياه بكلمة
نفسي مشمئزة منه
اشتاقيت لشمس اووفف والله العظيم احس روحي متكطعة
شمس : صار اليوم خميس وغضب مسوي ثواب لحسن وكالعادة الطبخ علينة اني وعمتي حياة
شوية واجت نجاة خالة غضب هي وبنتها فاطمة
سلمن وكعدن يم النسوان
معصومة : يلا شمس طلعي مواعين صغار
وانتي قمر سوي. زلاطة
شمس : اگلجن انتن شنو ماعدجن دوام شو ما رحتن
قمر : لا ولج غضب رايح للمدرسة وطالب اجازة النه
فاطمة : سلام
شمس : هلا بيج فطومة شونج
فاطمة : هذا لوني انتي شونج شخبارج من جنتي فصلية ههههه
شمس : حسيت كلامها بي شماته بس بلعتها ومشت الآمور الحمدلله
معصومة: شبيج فاطمة شنو هالحجي
فاطمة : اسفة ما اقصد شي بس حبيت اسأل عليها لان شمس عزيزة علية
شمس : لا عادي ما صار شي الحمدلله تمام ماشي الحال
فاطمة : اكول اشو غضب ماكو ماشفته
قمر : تريدينه يجي يسولف وياج مثلا اكيد ملتهي ويا الناس
فاطمة : اي صح
قمر : طلعت وراحت لمكانها
انتبهت للبسها جسمها مبين ذاك هوه والشعر طالع من الحجاب
معصومة : يربي ليش هيج تسوي ليش دائما كل ما تجي تحير شتحط على وجهة من مكياج وتحير شتلبس
تعوذت الشيطان وكمت اشتغل
كركان : غضب يكسر خاطر الما بگلبه رحم
كاعد وحاط ايدي على خدي واباوعله شلون يجر جكارة بعد جكارة وعيونه حمر
صار العصر والكل تجمع وكمنة نوزع للجيران والفقراء
غضب اخذ بسيارته حافظات اكل واخذها يوزعها لناس حالتهم تعبانه هو يعرفهم
شمس : اووفف متت تعب رجلية صارن يوجعني
غضب : ورثت جكارتي وسحبت نفس طويل ونفخته بالهوى
الجو بارد صار بس النار التسعر بگلبي ما تهدئ
طابك سيارتي قريب على الجامع
وعيني على الناس التدخل وتطلع
لاحظت حجي جبير بالسن متقدم بأتجاهي
ابو علي : الله يساعدك عمي
غضب : يهلا بيك يساعد بختك
ابو علي : طبعا اني اسف ممكن يكون عندك شغل بس باوعت عليك من بعيد وما كدرت اروح بدون ما اسلم عليك
غضب : ركزت بي حسيت بي بركة من الله وجهة يدخل السعادة للروح
:- كفو منك يابة آمرني محتاج شي
ابو علي : عيونك تتلامع بوية بيك شي
غضب : جريت حسرة وما جاوبت
ابو علي : حقك ما تنلام بس ثق وآمن بالله الكريم
كل عاصفة الها هدوء وكل شدة تزول وكل ليل نهايته صبح يعني دام حياتك عبارة عن ليل الله يمهل لك الصباح بأقرب وقت
غضب : استمع بكلامه ومركز كلش بي
الله كريم عمي كل قوي للزمان يلين
ابو علي : لا وداعتك هذا مبدئ الضعفاء
كل قوي من الله يستمد قوته
دام انك عندك ثقه بالله الكريم وصبور راح تكدر لكل شيء
هاي انا كدامك مواليد 1940
مريت بالحروب وشاركت بكل الحروب وتأسرت وتغربت ما يوم ضعفت لكن خانت بية الصحة وصابني عجز كلوي
غضب : انتم نعمة بهذا الكون الله تعالى خلكم مميزين حتى تميزون العالم وياكم
نتعلم منك اكيد يابة بيك الخير والبركة
ابو علي : الآسم الكريم
:- غضب
ابو علي : عاش الغضب اني عمك ابو علي
غضب : عاش ومهيوب عمي ابو علي
فتحت باب السيارة وطلعت حافظة انطيتها له
:- تفضل عمي هذا ثواب واقرى الفاتحة على روح اخوي الشهيد حسن
اخذها من عندي وراح
ارتاحيت هواي لكلامه دخلت الجامع توضيت وصليت
ارتاح جسمي وراسي المصدع شوية خف
معصومة : غضب راح وطول شنوو معقولة هلكد تاخر
صحت لشمس تخلي احد يدك علي
شمس : ولجج وين اطلع غير زلم
معصومة : جا انه هم شون اطلع غير انتي الجبيره
شمس : باثناء ما نحجي دخل عايد
عايد : شبيجن صاير شي
معصومة : صارت الصلاة وخلصت وغضب بعدة ما اجه
عايد : هسة ادك علي
رفعت موبايلي واتصلت عليه
دك دكتين وجاوبني
غضب : كملت صلاة وكاعد مرتجي على الحايط
شلت الموبايل شفته عايد يتصل
شمس : يحجي وعينه عليه
حاولت اكون طبيعية شوية وسداه
عايد : يكول هسة اجي ما اطول
شمس : عينه ما شالها عني متقصد يسوي هيج اشياء
عفته دخلنه جوى اني ومعصومة
عايد : عيونها صايرات حمر اغدي فدوة لعيونها
شيصبرك يگلبي
خبلة وخلتني مخبلها
قمر : رحن النسوان وبقت خالتي نجاة وبنتها
وفاطمة وضعها ما عجبني بس تتلفت
فات غضب واحسها فزت من مكانها
كامت رأسها سلمت عليه وباسته من خده وهو يتخبل من البوس هسة يعيط بيها
غضب : دخلت للبيت تعبان وحيلي مهدود
اجت علية فاطمة جفتتني باستني شنو يربي عايز لعبان نفس اني
غلست ومشيتها
كعدت يم حبوبتي صحتها تعبانه كلش وضغطها مرتفع
قسمة : ها يبعد امك طولت
غضب : جان عندي شغل يمة
قسمة : اوووف خلصت حياتك شغل بتعب بشغل ارتاح يا يمة ارتاح
غضب : بستها براسها
هي هاي الدنيا يا بعد كل شي حلو بهاي الدنيا
قسمة : ههههه يااا اني شون بية بهذا حجيك المعسول
غضب : ابتسمت لضحكتها
جا شعندي غيرج اني احبل افرخ
معصومة : غضب يشاقي بحبوبتي وامي وهن ساعة يبجن وساعة يضحكن
صار الوقت متأخر والكل راح لغرفته وبيت عمي امير راحوا لبيتهم وشمس ضلت يمنه
شمس : ضليت يم البنات
واكفة على السينك اغسل مواعين وانضف
عايد : احبه النضيف
شمس : باوعتله ورجعت كملت شغل ما جاوبت شي
عايد : احب العنودي
شمس : عايد شرايد
عايد : اريدج اني وعيونج الحلوة متبذهل بدونج
شمس : ومن جنت متبهذلة ليش ما ردتني
ليش دفعتني وصرت نكره يمك
عايد : خل ننسة كل شي
شمس : اي صار شتريد انسة بالله عليك
انسة دمعتي الحركت خدودي
لو انسة وكفت الغريب وياي وانت اول الناس وكفت ضدي
شنسة هااا
صرت احجي بحركة كلب ودموعي تجري
ما اعرف منين اجتني هاي الجرئة
دفعته وكعدت على الكرسي
عايد : بس انطيني
شمس : رفعت ايدي قاطعته
رجائا كافي كلش روحي تعبت منكم وبالأخص انته اطلع يلا لا يجي احد
شفت عيونه غوركن طلع من يمي واني شعوري متناقض بين الندم والراحة
احس راسي راد ينفجر اجت معصومة وتباوعلي بصدمة
معصومة : رحت لغرفتي ريحت شوية وبقت شمس هي تكمل الباقي اجيت اساعدها لان خطية تعبت عيونها صايرات حمر وتبجي
شمس : مسحت دموعي ودرت وجهي اغسل بالصحون
معصومة : انتي ليش مدوخه روحج عود
شمس : لا رد
معصومة : ترى جاي تأذين نفسج وتزيدين التعب تعبين
شمس : كلام معصومة صح بس ما اعرف شسوي اكثر بعد احس روحي تايهة
اغسل وطك الصحون واصل لسابع جار
معصومة : اي اي ذبي حركتج بالمواعين