شذرة الشاهين

الشذرة الثانية 🩵

طلعت ام شاهين واني بسرعه تمددت ع السرير وغفيت
كعدت الصبح ع صوته يصيح ويكول : وينها طلعوها لا اهجم بيتكم عليكم ...

فتحت البردة واشوفه هو و شاهين متلازمين والناس تفاكك بينهم وصايره هوسة..

سمر: شذرة يمعوده گعدي شبيچ لا تخوفيني عليج شذررررة شذرررة اصحي عاااااد

حسيت ع سمرة تصحيني فزيت واني ارجف من الخوف ظليت صافنه بوجهها وهي محتارة بيه وتحجي شجاج يمعوده شو چنتي حلمانه؟ وتلمس جبهتي تريد تشوف خاف مرتفعة حرارتي .

شذر: اية حبابه انطيني مي بلا زحمة عليج

اية: اشربي حبيبة اشربي هاي شصاير بيج شذرة دا احجي شبيج شنو اللي قلق نومچ خوفتينا عليج بس تصيحين ساعدوني مروتكم

سمر : خاف جاثوم ؟؟

اية: بطلي هاي سوالفج سمرة عوفي الجنانوة بحالهم حتى يعوفونا بحالنا

سمر: تره ما حجيت شي بس دا اكول خاف صاير عدها جاثـ....

همه يسولفون واني ما اسمع بالي كله يم شاهين لازم احجيله ولو شي بسيط من قصتي حتى يساعدني ويخلصني منهم بس ما اسولفله كلشي لا لااا ميصير احجي كلشي شراح يگول عليه عمي اللي يريد يبيعني لواحد اكبر منه لان متراهن وياه بالقمار و اني الثمن لو ع ابنه اللي بس يريد يلگه فرصة حتى يتحرش بيه ...

لو مرت عمي وبناتها اللي يعاملوني خدامة عدهم لا هم الخدامة احسن مني ع الاقل ينطوها مصرف و تاكل وتشرب وتنام براحة ...

لو من بطلتني مرت عمي من المدرسة لان درجاتي احسن من درجات بناتها وخاف الناس تعيرها ...

لو احجيله شلون عمي استولى ع ورثي من بابا و يآخذ إيجار البيت مال بابا لو احجيله كل شهر شلون ياخذ مني راتب ماما التقاعدي بعد وفاتها اوووووف شحجيله شغلة شغلتين

وغير هذا كله اني ما اعرفهم شمدريني ناس غربة همه اللي مني و بيه هيج سووا بحالي عاد الغريب .. الهي ما عندي غيرك يتيمه ومالي أحد بس انت سندي اني طلعت من بيتهم اريد احافظ على نفسي ربي وانت تعلم بحالي تحملت كلشي بس توصل يبيعوني ما اخليهم لو اعرف اكتل روحي ...

اية: شذرة حبيبة وين صافنه مو دا احجي وياج

شذر : هااا .. أأ.. اية حبابة اريد احجي ويه شاهين ضروري

اية: هالوگت !! دشوفي الساعه بيش يا عيني نايم هسه

سمر : شذرة باجر الصبح وسولفي وياه بس هسه نايم تره الساعه اربعه ونص الفجر

شذر : لا لا ضروري الله يخليكم گعدوه لازم احجيله ع شغلة

ظلن وحده تباوع على الثانية اعرف بيهم يريدون يعرفون شنو هذا الشي الضروري ميدرون حايرة بروحي وين انطي وجهي