شذرة الشاهين

الشذرة السادسة🩵

مجاعة شوگ بيــّه ..
وعطش ملگــه
و طف حنين
و تعب مگيــود بسبِــيّ
گِلّــي يا حــوت شدعيـت والله ســدّ جوعك نبـّي

( للشاعر المهم / حسين علي المطوري).

شاهين : ناعور الوكت يفتر ببطىء واني عطشان على شوفتهم ... و عربيد القلق يزحف لزوايا عقلي ويطرد النوم من جفوني .. الحيـرة و الأرق محتفلين بأنتصارهم على ارادتي .. تعبت ؟ ... نعم أعترف لكن راحتها و استقرارها تستحق كل قوتي ..

شلونها؟ بشنو تفكر؟ اجيت على بالها لو اصلا ما طريت ؟ هم تشتاقلي مثل ما انعصر شوگ الها؟ أكلت ؟ شربت؟ ضايجة؟ خايفة؟ ضايعه مثل ما اني تايه بدونها؟ كلها اسئلة تدور بعقلي وما الگالها جواب يخفف من نار مشتعلة بصدري و مترضى تطفى الا ببحرعيونها ..

يگولون البعيد عن العين بعيد عن الگلب .. چذابين بعيدة عني صح بس تارسة روحي شوگ و حنين

ومرت خمسين يوم وصار موعد جلسة المحكمة وبلغت المحامي سابقا تصير الجلسة سرية لان الموضوع حساس وممكن يجرح مشاعرها و متأكد من تعب روحها ونفاذ طاقتها بتحمل كل هاي الظروف اللي مرينا بيها ..

اعرف بيها تخاف من المطر اذا جاس خدها الترف وما تثق بأي بشر بسبب ظلام سنين حياتها ودروبها الصعبة لكن راجعلها بحيل الله و أسگي روحها وترجع تخضر من جديد

وصلت قاعة المحكمة واني بكل روحي أدور عليها بس اريد ألمحها ادري بيها موجودة بس وينها ؟ ماكو بين هاي
الناس الحاضرين وتمنياتهم بخروجي من هاي الأزمة بالسلامة ..

الشرطة داير مدايري فتحوا سلاسل ايدي وتوجهوا بيه لقاعة المحكمة و دخلوني بقفص حديد واني عيوني تبحث عنها اهلي كلهم موجودين ويسلمون من بعيد لحد ما شفتها گاعده بين ليث وفهد وعيونها... اااااخ عيونها العلعلتني ولعبت بحالي ..

شفتها ضعفانة و متغيرة و الهم مرسوم على جفونها .

افتتح القاضي الجلسة بحضور محامي المدعي اللي قدم طلباته بعريضة الدعوى و بعدها بدا المحامي عني بالكلام وتقديم اوراق طلب الزواج المقدم من قبلها دعاها القاضي للوقوف أمام عدالته

تقدمت تمشي بهدوء و رزانه وراسها مرفوع ..روحي رفرفت عليها

القاضي: بنتي سولفيلي الصار؟

شذر: سيدي اني ذاكرة كل التفاصيل بالإفادة كل هاي الدعوى صارت بسبب شهامته و تقديمه يد العون والمساعدة وهذا ان دل على شيء يدل على أصالته و رجولته . سيادة القاضي اني وياه متفقين على الزواج فـ الي اطلبه منك هو ان توافق على اكمال اجراءات الزواج

القاضي: انت تريد تتزوجها شاهين؟

شاهين: اتمنى

القاضي: انت عندك علم انه لازم زواجكم يستمر ٣ سنوات وميصير تطلقها بدون سبب او بدون موافقتها لان اذا طلگتها بدون سبب تنعاد عليك الدعوى؟