شذرة الشاهين

الشذرة الثامنة والعشرون🩵

حيــاكم الله🩵

(وقفة اجلال)
بدايةً احب اشكر كل فرد من أفراد قواتنا الامنية البطله .. و أگول أحنا شعورنا تجاهكم هو الامتنان على كل ما قدمتوه إلنا من تضحيات غاليه ..
وكنتوا دروع تحمينا من كل غاشم و معتدي على مر السنين ...
وأشكر عوائلكم اللي تحملوا كل الظروف الصعبة من خوف و قلق و تفكير في فترات غيابكم عن عوائلكم الكريمه..
والرحمة والخلود لكل شهداء قواتنا الأمنية الابطال بكل أصنافها وأنواعها والامتنان موصول لعوائلهم 🙏

وبالرجاء قراءة سورة الفاتحة اهداء لأرواحهم الطاهرة و أخص منهم بالذكر الشهيد البطل ( احمد صباح المعموري ) أخي وابن عمي والذي جسد أروع صور البطولة من خلال نجاحه بقتل سبعة عناصر قذرة من داعش و استطاع دحر عمليتهم بالاستيلاء على مقرهم قبل ان يستشهد ويسلم النفس لبارئها..

.....

ما نــاسيك ..
بس والله الظروف هواي..
وأحس بإثنينهن مشتــاگ و مقصــر ..

تعااال الليل ما يعــذر ...
حياتي بدونك تبعثر ..

شلون أنساك.. ليش أنساك..
أحبك من الابهر وأعبد السواك

الشاعر المرحوم ( زيد السومري )

..

ظلام ..
.
لهيب خافت..
.
ظلال متحركة..
.
لغة غريبة..
.
ترنيمة ..
.
تساقط قطرات ماء !

حسيت مي بارد نزل على رجلي
شلت راسي ببطئ أريد أشوف آني وين!

شفت واحد ملثم و يمسح برجلي ما طالعه بس عيونه..

صحت بصوت مبحوح : اااااااه ...

وبديت أگح قوي احس صدري مليان دخان ... ومن أگح أحس بروحي تشوغ من الآلم اللي بكل جسمي ..

رفعت كف أيدي أشوفه كل دم و صخام اسود ...

وهذا بعده مدري شديسوي برجلي .. فجأة حسيت سائل نزل على رجلي حرگني صرخت من شدة الوجع..

هذا الولد اندار عليه وسد حلگي بقطعة قماش يخفي صوتي ميريده يطلع!

صرت أون من أنواع الآلم اللي دا أعاني منها ... وأيده على حلگي يدفع القماش بقوة ميخليني أحچي...

ورجع يفرك برجلي وجسمي مايغطي اي شي ... التفت شفت ملابسي كلهم مكومات بعيد مشگاگات و الدم تارسهن ترس...

رجعت ألتفت على هذا الولد ظهره صاير عليه ويفرك برجلي بقوة تخلي الآمي تزيد ..

أريد أحرك جسمي ما أگدر صعب كلش و الرجفة ما فارگتني برداااان وبس أريد شي يغطيني وأدثر بيه فجأة ألتفت الولد عليه وحط أيده على گصتي ..