قمر الإنتقام

🌟الفصل الأول : العودة 🌟

أنيسة : ما تنسايش طفي الغاز قبل ما ترقدي وتغلقي باب الزنقة مليح والتواقي وما تحلي لحتى واحد من الجيران نعرفهم سامطين يحبوا يسمطوا عليك كي ما نكونش وعيطيلي كي توصي وقبل ما ترقدي
قمرة : ايه ماما والله غير ندير هادوا كامل خليني نروح الطيارة رح يلحق وقتها وعلابالك السركالة تع دوك

أنيسة : ايه خلاص روحي طريق السلامة يا بنتي اتهلاي في روحك وكولي مليح
قمرة : الله يعيشك ليا يا الغالية مام نتوم اتهلاو في روحكم ، خالتو ماني ابقاو على خير
ماني (حمامة): الله يسهل ا بنتي
خالتي ( نهال ) : ابقاي على خير قمرة طريق السلامة
خرجت مالدار اللي هي دوبليكس في باطيمة فيها 4 ايطاج هوما يسكنوا في 4 ايطاج ، بابا كان في الطونوبيل يستنى عندوا شحال بعد ما هبطت الفاليزات تاوعي وحدة كبيرة تع الكادوات وشوية حوايج تع العرس (تاعي وتاع أماني) ووحدة متوسطة تع حوايجي وكابة صغيرة جي مع المتوسطة فيها ماكياج وعفايس تاع كوسميتيك ، ركبت وروشت لماما وخالتي وماني اللي كانوا يطلوا مالتاقة وبعدها ديمارا للمطار
..................... في المطار
منصف :بلا مانوصيك بنتي ونعرفك قادرة على شقاك
قمرة : هههههه تعجبني كي تعرفني شيخ
خبطها لراسها بلعقل
منصف : شحال من خطرة نقلك حبسي جياحة ، وديجا مازالني على ديداني ديجا رجعتيني شيخ ولا لي يدي روترات تسما شيخ
قمرة : خلاص ما قلنا والو ، ايه حقا اعطين مفاتح تع الطونوبيل علابالك بلي راح نسحقها
منصف : معليه هاكي بصح بالاكي برك تدحسي كاش بنادم نعرفك متهورة ومهبولة
قمرة : خسارة عليك شي....بابا بابا خلاص
منصف : مزية فقتي لروحك ، يالاه طريق السلامة
سلمت على بابا وعنقتوا حتى قريب خنقتوا ههههههه بعدها رحت ركبت في طيارتي(كانت الساعة 11:00 تع النهار وكي تلحق على 18:00 تع لعشية ) وبدات مغامرتي الجديدة

في قصر المصطفاوي(الساعة كانت 10:00 وهو يلحق على ال12:00) ، كانوا الخدامات يجروا في كل بلاص يوجدوا اليوم يجي إسلام من تركيا بعد ماراح قبل 15 يوم باش يفري عفايس وثان يكمل الخدمة تاعوا باش يفرغ للعرس تاع ختو الوحيدة هي صح جا ثلاث أيام قبل العرس بصح هاكداك خيرمن تخرجلوا كاش خدمة نهار العرس وهو معروف بلي يحب الخدمة تاعو بزاف ويروح اي وقت يعيطولو فيه وباينة كي راح يجي ما ينساهاش ملي كادوا هي والعايلة الكبيرة ، كانت لالة فاطمة في الكوزينة تدير في الرشتة اللي يحبها إسلام
فاطمة : نصيرة جيبيلي لملح
نصيرة :اتفضلي لالة ، كشما نزيد نديروا
فاطمة : السلاطة تع التون وجدتيها تعرفيه يحبها باردة
نصيرة : وجدتها ايه كيما يحبها
لفوق في شمبرة إيلين كانت تحوس على روبتها ،اليوم جاي حب قلبها اللي مش معبرها خلاص ، كانت يماها نسرين واقفة تشوف هبال بنتها اللي ما تنحاش خلاص سماتوا "هبال اسلام"
نسرين : ما حبيتيش تتبدلي يعني وتحبسي من تبهليلك ، الجري هاذا كامل مع اللخر سلام ما يقولهالكش
إيلين : ماما روحي اخطيني تعيشي ما تفسديليش نهاري
هبطت نسرين وهي تتنهد على بنتها البهلولة كيما تقول انتاجاتها راهم مزوجين وهي تستنى في اسلام ، دخلت للكوزينة تلقى يماها ومعاها نصيرة وحدة من الخدامات يوجدوا في الماكلة وباقي الخدامات يخملوا الدار ويوجدوا واش يخص
نسرين : صباح الخير يما خير ان شاء الله ؟
فاطمة : صباح النور راني نوجد في الرشتة للفطور عابالي إسلام يحبها
نسرين : ما فهمتش انا شغل اول مرة راح يجي للدزاير
فاطمة : بركاي مالهدرة الزايدة وروحي شوفي اذا كملوا التوجاد في الصالون وسقسي أمينة لا كشما خصها
نسرين : ياك وليدها اللي جاي ماشي وليدي (قالتها وخرجت رايحة لبيتها)
فاطمة : ياخي حالة يخي ، سارة بنتي روحي شوفي أمينة كشما تسحق
سارة : كيما تحبي لالة
أمينة كانت في الصالون توجد في الطابلة مع اروى (خدامة ) حتى جات ليها سارة
سارة : مدام أمينة كشما تسحقي نعاونك ؟
أمينة : لالا بنتي يعطيك صحيحتك ، رانا كملنا اصلا ومازال الحال روحي كملي شغلك (راحت سارة) أروى هيا نروحو لبيت إسلام
طلعوا لبيت إسلام اللي جاية مقابلة بيت أماني وقدامها بيت أيمن من بعدها تجي بيت أمين مقابلتهم بيوت تع فيروز وماريا (كاين بيت فارغة لتم راح تكون بيت قمرة كي تجي تبات عند أماني ) وفي الجهة اللي ملهيك تاع الإيطاج(يعني الجهة اليسرى) كاين بيت إيلين مقابلتها بيت رؤيا وقدامها بيت أمير وبيت فراس مقابلة بيت أمير ، في الإيطاج الدوزيام كاين البيوت تاع كبار الدار في الجهة الاولى تع الإيطاج (يعني اليمنى ) كاين بيت أمينة و منصف (الله يرحمو) مقابلتها بيت صفاء و أحمد ، قدامها بيت نسرين وراجلها مصطفى ، مقابلتها بيت كمال وسليمة وفي الجهة الاخرى كاينة بيت فاطمة و بيت سمية (كي تجي تقعد عند فاطمة) وكاينين ثلاث بيوت كبار مخليينهم للولاد كي يتزوجوا (كاين عرش تع بيوت ههههههههه لازم يوجدوا الايطاج اللخر لولاد ولادهم ههههههههه )
نولو عند أمينة وأروى لي دخلوا لبيت اسلام بدلو الغطاء تع السرير داروه رمادي بالكحل والابيض كيما يحبوا ونقات الغبرة ومسحتها وغلقتها وخرجت
هبطت خبرتهم بلي كملت وجدت كلش وراحت توجد روحها وتشوف أماني اذا ناضت
وصلت طيارة إسلام اللي جات من تركيا ، هبط اسلام منها ودا فاليزتو وخرج لقى صاحبو رياض