قمر الإنتقام

🌟الفصل السادس : الحقيقة 2🌟

".... كل شخص لديه فصل لا يقرأه بصوت عال .."

قمرة تخلطلها كلش ، مافهمت فيها والو واش راهي تخلط  هاد لعجوزة الخارفة ... شافت فيها والنار تخرج من عينيها بصح ما هدرت والو ودارت خارجة هكاك بلا والو لا بوشات لا تلفون لا شال
كانوا رح يتبعوها حتى حبسهم إسلام
إسلام: انا رح نشوفها
راح موراها وكانت هابطة فالدروج
إسلام: قمرة حبسي ،قمرة
هي كملت هبطت وخرجت مالباب ولحقها وشدها من يدها
إسلام: اصبري نهدر معاك
قمرة : واش تهدر معايا واش تسحق ؟(قالتها بشوية عياط )
إسلام: كيفاش  واش نهدر معاك ، ليوم بعد شحال ونتي معانا نعرف بلي بنت عمي و  صديقة طفولتي   قدامي وانا ما علابالي بوالو

قمرة : بكل جدية  هدا واش همك ؟ تسما انا حالتي كيفاش راهي ما تهمكش يهمك كي خبيت عليك ؟(ضحكت بقلقة )
إسلام: إيه تهمني كي خبيتي عليا وحالتك لي راكي فيها نتي درتيها بيديك
قمرة : إسلاااام
إسلام: واش إسلام؟ لوكان ما خبيتيش عليا وانا لي كنت نخمم فيك لوكان ماصراش واش صرى لوكان راني منعت واش صرى بصح نتي مالأول ماكانتش نيتك أصلا تولي منا
على هدرتو لخرة عطاتو سقلة سكتاتو بسك حست بلي راهو غير يخلط فالهدرة ولوكان يكمل هكا ماراحش تفرى بيناتهم
قمرة : شكون نتا باش تحاسبني اه ؟؟ شكون ؟ بابا ؟ راجلي ؟ خويا ؟ شكون نتا ؟
إسلام: أنا شكون إمالا ، أنا كامل هادو لي فاتو (قالها بعياط بسك كانو في زوج مقلقين وصح كانو غير يخلطو فالهدرة )
سمع فراس العياط وفاق بلي تخلطت على واش كانت هبط لعندهم وتبعاتو أمينة  وأمين ...  راحت للطونوبيل تاعها فتحتها مالقاتش مفاتح
قمرة : اعطيني مفاتح عمو فراس
فراس : خليني انا نسوق ونوصلك وين حبيتي
قمرة (عيطت) : اعطيني جد لمفاتح
فراس(عيط): غير انساي ...... لمفاتح وقوليلي نوصلك
شافت فيه مشنفة والدموع حاصلين في عينيها ، راحت ركبت وغلقت مالداخل مالقفلة وحوست في القجر تع طونوبيل وين مخلية نسخة لتم بصح جاية مخبية ن نوضت الطونوبيل وهو يعيط وأمينة تعيط عليها باش تحبس وتبكي ، هي ما سمعت لحتى واحد وديمارات مخلية لغبار  موراها
أمينة : فراس إسلام روحو موراها والله كشما يصرالها أنيسة تهبل ، خفو
ركب فراس طونوبيل تع إسلام وأمين راح موراه وإسلام لتم قعد يتنفس بليناغ وأمينة سقساتو
أمينة : واش صرى بينكم وليدي ؟
إسلام: اومبعد يما
عند قمرة كانت تسوق تجري مقلقة وتزير على الفولون تع طونوبيل منبعد بدات تبكي كي طفلة صغيرة وتشهق ، بقات تسوق ماعلابالهاش وين تروح ، لوكان تروح لدارهم يتبعوها وهي حابة تبقى وحدها  .... خممت مليح حتى تفكرت دار مانها حمامة لي جاية في فوردلو على لبحر راحت ديراكت لتم . كان لمفتاح في محبس تع الورد حفرت التراب جبداتو مسحاتو وفتحت بيه ، كانت الدار شوية مغبرة بسك عندهم شحال ماجاوش ليها منهار طلعت يماها لدبي ... دخلت وراحت للصال دو بان شافت فالمراية ولقات المكياج سال على وجهها غسلاتو مليح وحكمت شعرها طمطومة وراحت لبيت يماها جبدت جبة من تاوعها نحات روبتها ولبستها لبست بليغة تع يماها وراحت للكوزينة جبدت قرعة ماء مالفريجيدار هدا واش كاين اصلا وكاس مالبلاكار وقعدت تشرب منبعد تفكرت واش صرا بدات تبكي وتنازع مالوجع تع قلبها رفدت روحها للبيت وتكسلت على البونك وعنقت المخدة ورقدت مالعيا ورأسها لي كان يوجع وزيد قلبها كان يوجع مالتقلاق الزايد  ودواها لي نساتو .
عند أمين وفراس حوسو عليها مالقاوهاش في دارهم في الفيلا... كيما دارو ما لقاوهاش وزيد ماعلابالهمش وين تقدر تروح وهي ماعندهاش صحابات من غير أماني وجداها في دبي (نساو دار جداها) أما باقي العايلة تع مصطفاوي ولاو للدار وفاميلة عصام لدارهم
كانوا قاعدين كامل فالصالون ، أمينة تبكي ونايلة وهلال يصبروا فيها ، إيلين فيروز ماريا رؤيا أمير أيمن  مازالهم مصدومين ما قدروش يستوعبو....سمية ونسرين سليمة يشوفو ساكتين ماكانوش يستناو فيها ديرها ، صفاء قاعدة مع يوسف وكمال وأحمد ومصطفى ثان معاهم ....كانوا يسييو يهضموا الحقيقة لي رماتها عليهم فاطمة  اللي كانت تشوف فيهم بكل برود وإسلام قاعد مقلق ووجهو مزبوط
دخل فراس و أمين  ووجهم عيان وززعفان كي مالقاوهاش ، امينة وقفت وراحت عند إسلام
أمينة : وين راهي ؟ لقيتوها ؟
فراس  :مالقيناهاش حوسنا كامل وين تقدر تروح والو
قعد فراس ودار يديه على رأسو مقلق على بنت خوه لي كي بنتو وأمين  كيفكيف
أمينة دارت مقلقة تشوف في فاطمة ، كيفاه عطاها قلبها تواسي لبنت وليدها هكاك ..... بصح واش كانت تستنى من أم حاوزت وليدها
أمينة : عجبك الحال ؟ بردتي قلبك في الطفلة ؟ اللي ما قدرتيش ديريه في يماها درتيه فيها ، ماكفاش واش عانات ، ويماها وباباها اللي عاناو بسبتك دوكا قلبتيها على بنتهم .... بصحك ديري في بالك انا راني معاها وواقفة في ظهرها وواش صرى الليوم لا قمرة ولا منصف وأنيسة راح يسكتو عليه كي يسمعوا..... مام انا مانسكتش على الظلم هدا
فاطمة : أمينة اعرفي  روحك معامن راكي تهدري وواش تهدري  نتي عروسة برك فهاد الدار ما تنسايش روحك
إسلام : ماني (قالها بحدة)
أمينة: إسلام ....... ماتخافيش لالة فاطمة علابالي مليح واش راني نهدر ومعامن وعلابالي شكون انا الحمد الله جامي نكرت حقيقتي
طلعت لبيتها وخلاتها زاد إسلام لحقها مع نايلة وهلال
فاطمة : هيا كل واحد لبيتو ، انا نطلع نرقد
طلعت وخلاتهم وكل واحد راح لبيتو ، فراس ماهدر والو بسك علابالو بلي كي يتقلق ما يولي يشوف والو قدامو وماحبش يخسر الهدرة مع يماه تسما خرج مالدار وراح كمل يحوس على قمرة
الخدامات كانوا يدخلو فالفاليزات تع كل واحد ودوزان قمرة اللي جابوهم ملاصال وداروهم في بلايصهم
إسلام : خلاص يما حبسي لبكاء راكي غير تقلقي روحك
نايلة : صح أمينة وليدك عندو لحق
أمينة : ما راحش تفهموني نتوم ، قمرة كي بنتي لي تضرها تضرني يماها كي ختي وخلاتها أمانة عندي ودوكا ماقدرتش نحافظ على الأمانة تاعها كيفاه نقابلها انا
هلال : طاطا ما تتقلقيش كلش يتسقم
نايلة : هيا نوضي بدلي حوايجك ، هلال بنتي روحي جيبيلها دواها
هلال : معليه خالتي (راحت جابت كأس ماء مع دواها )
نايلة : إسلام وليدي روح تريح نتا  وغدوة ان شاء الله ربي يفرج
إسلام : معليه تصبحو بخير
خرج راح لبيتو ماقادر يخمم فوالو من غير قمرة وواش صرى بينهم  ؟ ...... بدل حوايجو ورقد ديراكت
عند فراس كان يدور مقلق .....حتى تفكر دار جداها وين جاية
فراس : كيفاه ما خممتش فيها باينة راهي لتم
دار رايح لعندها كانت الساعة 05:00 تع الصباح ، قمرة كانت تطل مالتاقة عالبحر بعد ما ناضت صلاة لفجر كي أذن وبقات فاطنة طار عليها النعاس . وصل للدار وشاف طونوبيلتها تنهد تنهيدة طويلة وهبط ....قمرة سمعت صوت طونوبيل راحت جبدت مكحلة تع جدها الله يرحمو وراحت تفتح الباب تشوف شكون جا ليها . فراس جا يدقدق حتى تحل لباب وشافها رافدة سلاح في وجهو
فراس : وشبي جدك نتي هبطي سلاح
قمرة : هادا نتا ؟ واش جابك  ؟
فراس : هكا تهدري مع عمك ، بعدي خليني ندخل (بعدتلو ودخل ) علابالك بلي أمينة راهي مقلقة عليك
قمرة : راني قدامك مكالاه تتقلقوا
فراس : يرحم باباك البرود تاعك هاد مين جبتيه ؟
قمرة : من عندك عمي لعزيز
دخلت ترجع المكحلة لبلاصتها وولات ليه كان قاعد فالصالون منحي لفيستا ، قعدت مقابلاتو
فراس : وشبيه وجهك صفر ؟ قوليلي لقارص فاميلتك ؟
قمرة : وي ولاد عمي لي مازال ماشفتهم (شافت فيه وتغزل هو منبعد ضحكوا)
فراس : ديريلي قهوة رأسي راه يوجع ليل كامل وانا نحوس عليك
قمرة : ماكان والو فدار ، بصح تحب تروح تشري ماعنديش مشكل حتى انا حابة نستقهوة هيا
كيما كان لحال خرج يشري غير لتم قريب للدار ، عيطلوا إسلام
إسلام : صباح الخير
فراس : صباح النور ، وقيل شفتني في منامك ؟
إسلام : واش كاش جديد لبارح ماوليتش وراهي 06:30 وين راك هايم
فراس : راك تشوف دصارة زايدة ولاد خويا نحاولي قاع الهيبة تاعي ، المهم ياسي إسلام نتا كي كنت راقدة انا كنت نحوس على بنت خويا ولقيتها
إسلام : وين راهي ؟
فراس : رانا في دار جداها دوك شويا هكا نبعتلك لبلاصة وقول ليماك توجدلها شوية حوايج 
إسلام  :خلاص دوك كي تنوض نقوللها ، هيا اومبعد
كمل فراس يقضي للدار ، منبعد جاز للمخبزة جاب باتيسري تع القارص بسك يعرفها تحبها ومعاها كرواسو وبريوش تع شيكولة وراح للدار . راحت قمرة تفتح الباب
قمرة : لوكان بقيت برى خير هدا وين  ؟
فراس  :شدي عليا وبلعي  ،يديا تقطعوا قضييتلك كامل واش تسحقي وزيد راح نبقى معاك ليوم
قمرة : هات لهنا وادخل
دخلوا للكوزينة حطت الصاشيات فوق الطابلة وبدات تفرز فيهم كل حاجة في بلاصتها هو جبد القهوة ودارها تطيب والحليب ثان  ،جبد  زوج طباسة واحد دار فيه باتيسري ولوخر كرواسو وبريوش
قمرة : اوهههه تهليت لعزيز (باستو من خدو وتعلقت فيه فوق ظهروا) على هادي نحبك
فراس : خسارة عليك ياو انا لي كبرتك ، وعلى حساب الشوفة التعلاق تاعك هدا ما حبيتيش تحبسيه
قمرة : الله غالب لقيت واحد طويل عليا نحب نتعلق بابا تعرفو مايقدرش يرفدني تسما كاين نتا
كملوا يوجدوا قهوة وحليب وراحوا غسلو وجههم وفمهم وولاو  يشربوا قهوتهم حتى سمعت دقديق
قمرة : شكون جا ثان
فراس : هادا إسلام جا ، وجابلك حوايجك
قمرة شنفت  مافهمتش علاه ، فتح فراس لقى أيمن استغرب بسك هو كان هدر مع إسلام
فراس : أيمن صباح الخير
أيمن : صباح النور العم بعتني إسلام قالي عندو شغل هو
فراس : ادخل ادخل
دخل بلعقل ودخل معاه فراس داه للكوزينة وقفت هي كي لقاتو أيمن وتبسمت معاه
أيمن : صباح الخير
قمرة : صباح النور
قمرة  :  اتفضل اقعد معانا
قعد معاهم وبدا فراس يحكي وقمرة تضحك معاه وأيمن  ثان شغل ما صرى والو
أيمن  : هاداك هو نروح نخدم انا ، إذا كشما خصكم عيطولي
فراس : خلاص إمالا
قمرة  :سلم على طاطا أمينة قوللها كي نريح راني نجي عندها
أيمن : يبلغ ان شاء الله 
راح أيمن  وقعدوا غير قمرة وفراس
فراس : انا نروح نشوف تي في
قمرة : انا راح ندوش  وبركى ما تقول للناس وين راني
فراس : علاه ليمن قلت ؟ أيمن وإسلام  ناس ؟
قمرة : نتا فهمتني ، وخمل طابلة في طريقك
ناضت راحت جابت الكابة الصغيرة اللي جابهالها أيمن وداتها للبيت جبدت حوايجها سروال جين مع تريكو بيض وباسكات بيضاء حطتهم ودات سربيتة ودخلت تتدوش . جازت نص ساعة خرجت لبست حوايجها ودارت سربيتة على شعرها ولبست تقاشر بيوضا وبليغة وراحت للكوزينة  ، كان فراس فالصالون يشوف tv ..
قمرة : واش ندير فطور فراس ؟
فراس : ديريلنا سباغيتي صوص حمراء توحشتو
قمرة : هايا خلاص
بدات توجد ، جبدت طنيجرة باش تعمرها وتحطها تغلي حتى حست بدوخة ونغزة في قلبها ومافاقتش كيفاش طاحت . فراس سمع الحس تع طنجرة كي طاحت عيطلها ما جاوبتش راح ليها وشافها طايحة مور الطابلة تخلع
فراس : قمرة قمرة راكي تسمعي فيا ، قمرة (كان يسيي ينوض فيها بكفوف بلعقل منبعد كي ما فطنتش رفدها يجري وخرج ركب طونوبيل وطاار للسبيطار . وصل دخلها يجري للإسعافات وقعد يستنى برى . جازت ربع ساعة وخرج  الطبيب
طبيب  : نتا لي جبت الانسة ؟
فراس : ايه انا عمها ، تقدر تقولي وشبيها دكتور
طبيب : الأنسة تعرضت لضغط وهادا خلا قلبها يتضرر ويمنع وصول الاكسجين للرئة تعها وزيد ما شربتش دواها  ، الأحسن تشوف الطبيب تاعها المسؤول عن حالتها الصحية رح يعطيك معلومات اكثر على المرض تاعها
فراس : يعطيك الصحة دكتور نقدر نشوفها
طبيب : ايه  وكي يخلاص سيروم تقدر تخرجها ، بالشفاء عليها
راح الطبيب وفراس قعد مشوكي ، قمرة مريضة وهو معلابالوش ؟ وقتاش صرى هاد الشي كامل
دخل عندها لقاها راقدة قعد قدامها واستنى حتى جازت ساعة باش فطنت  وخلاص سيروم وخرجها وراحو . فطريقهم للدار شاف فيها
فراس : واش حكاية مرض تع قلبك هادي ؟ وعلاش ما علاباليش ؟
قمرة : كي نروحو للدار نحكيلك خليني دوكا نتفس هواء نقي
وصلوا للدار دخلها بالعقل وقعدت في الفوتاي وقعد مقابلها
فراس : ايه يا لالة احكي
قمرة : قبل 6 سنين يعني مور ما جبت الباك تاعي مرضت ودرت عملية على قلبي  (ماشي عفسة كبيرة بسك لكبيرة راح تجي مع الحكاية ) وقعدت بالدواء لمدة 3 سنين منبعد كي تحسنت شوية  حبستلي طبيبة دواء والعام اللي فات برك رجعت نشربو ، هدا مكان  ولبارح كي صرى هداك الشي اللي زادلي
فراس : تسما هاد الشي كامل صرى وانا ماعلاباليش ، يعطيك الصحة يا لالة تسما لوكان ماشي طحتي ليوم ما كنتش راح نعرف انا ..... شوفي ماليوم رجلي على رجلك وديجا عشية نروحو للطبيبة تاعك ونشوفو كيفاش  راكي منبعد نديك للدار
قمرة  :غير هاديك الدار لي مانوليلهاش لوكان نعرف روحي نموت
فراس : صحا نجي نقعد معاك هنا حتى يولو داركم ، ديجا لاه دوك نعيط لمنصف
جا يجبد تلفون راحت تجري نحاتهولو
قمرة : تعيطلوا والله غير نروح ريحتي ما تلقاهاش
فراس  : صحا إمالا راني قاعدلك هنا حتى يجو داركم
قمرة : اقعد كيما تحب دار دارك بصح حاجة وحدوخرة واحد ما يسمع من هاديك الفاميلية بلي راني مريضة
فراس : مام أمينة ؟
قمرة : طاطا أمينة علابالها بصح مالازمش تسمع واش صرالي ليوم مام أماني ما تقوللهاش ماكالاه تتقلق طفلة
فراس : خلاص تفاهمنا ، بصح عشية نروحو للطبيب
قمرة : مكالاه بسك اصلا غدوة عندي كونترول تسما نروحو كيفكيف ، نروح نطيب  لفطور
فراس  :ريحي بلاصتك انا نطيب
قمرة(ضحكت): اوه تسما كاين شاف فراس صغير داخلك
فراس : اضحكي اضحكي على كبري وليت مربي اطفال (شاف فيها شنفت بدا يضحك تيرات عليه مخدة ) ودوكا نروح نديرلك فطور مخك يحبس
قمرة : يرحم باباك ديرلي فطور يخلي كرشي تشبع هادا واش نسحق
فراس : طوال لسانك علابالك ، امشي قدامي توجدي سلاطة نتي واقيل عمبالك روبو ندير كلش وحدي .
راحوا للكوزينة قعدت فوق الكورسي باش ما تعياش بعد ما لبست جبة وحدوخرة جاتها شابة وحكمت شعرها بالبانس  وراحت للكوزينة
فراس : علابالك جبة كيفاش جاتك ، بييييي لوكان ماجيتش عمك لوكان راني خطفتك صافي شحال
قمرة(ضحكت): صار هكا لوكان تسمعك مرتك المستقبيلة تغير
فراس : خليها تجي برك منبعد ادا حبت تغير تغير
قمرة : زعما ماكانش ؟
فراس  :والو
بدات تقطع كومومبار وطوماطيش والخيار والسلاطة وشويا فرامج وحدوخرين  وهو يطيب فالسباغيتي كيما كان متشهي ، صونا تلفونو وكانت أمينة ريبوندات قمرة
قمرة : صباح الخير لعمر ديالي
أمينة : هكا يالمهبولة هكا تخليني مقلقة  طلعتيلي لاطونسيو ، لوكان كشما صرالك ؟ وواحد ما معاك اه واش نقول ليماك وباباك لي خلاوك أمانة عندي ؟ ماخممتيش فينا ؟
قمرة : ما نزيد نعاودها يا طاطا  ما تزعفيش برك
أمينة : كي تجي نوريلك
قمرة : مارانيش جاية رح نبقى في دار ماني  وفراس راه معايا كي يهبطوا ماما وبابا نولي لدارنا
أمينة : وانا تخليني وحدي ؟
قمرة : تعرفيني  بلي نحبك بصح الله غالب ، اذا دخلت لهاديك الدار راح يكون علاجالك برك بصح ماشي دوكا
أمينة : كيما تحبي يابنتي ، المهم راني جاية عشية تحبي نجيبلك كاش حاجة ؟ متشهية حاجة ؟
قمرة : يا طاطا والله لوكان تجيبيلي كيش كيما كنتي ديريهولي في الصغر مانقولش لالا
أمينة : مايكون غير خاطرك
قمرة : وجيبيلي جبة تاعك هاديك الزرقة عجبتني (قالتها وضحك أمينة عليها)
أمينة : معليه حاجة وحدوخرة ؟
قمرة : هادا مكان الله يخليك ليا سلطانتي
غلقت التلفون وكملت توجد لفطور . راحت أمينة لبيتها جبدت جبتها كيما قاتلها ودارتها في صاشي شابة تع كرطون شغل ، منبعد هبطت للكوزينة
أمينة : نصيرة يعيشك وجديلي دوزان تع لي كيش رح نديرهم لقمرة
نصيرة : معليه
بدات تجبدلها اللحم ولبصل ولي تسحقهم باش دير لافارس (يعني الحشوة تع لي كيش) وجدت كلش ودارتهم يطيبوا وراحت دير لعجينة ، دخلت عليها سمية
سمية : اوههههه  أمينة راكي شاطرة ليوم ، واش راح ديريلنا ؟
أمينة : لوكان غير تتعلمي شوية (بوممممم والقصف هههههه)(نصيرة ولبنات بداو يضحكوا بالتخبية وهي تنارفات) بصح لا حبيتي تعرفي راح ندير لي كيش لبنتي قمرة تشهاتهم ومانقوللهاش لالا
سمية : علاه لقيتوها  ؟ يادرا وين كانت هايمة 
أمينة نفضت يديها مالعجينة وراحت وقفت قدامها : اسمعيني مليح واش راح نقول ما نعاودش هدرتي زوج خطرات هدرتك هادي بالاكي تزيدي تعاوديها خاطرش ما نظمنلكش واش ندير مرة الجاية وماشي موحال لوكان تسمعك هي لي دير ماشي انا وزيد قمرة مربية عليك ألف مرة تسما هدرتك الزايدة خليها ليك ، قمرة خط أحمر علاجالها ندير كلش تسما غير بعدي عليها
ولات لشغلها  كلي ماكان والو وطيبت وكملت دارتهم فالبايط وخلات طبسي لإسلام تعرفو يحبهم وراحت تدوش ولبست و وبقات في بيتها حتى لعشية باش ماتتلاقاش مع سمية ولا ختها تتقلق منهم
لعشية ، كانت توجد الطابلة للعشاء وفراس دخل يدوش  وهي كملت وراحت لبست جبة وحدوخرة ورفدت لحوايج موسخين(حاشاكم) مع تع فراس حطتهم فالماشينة لي تغسل باش غدوة ديرهم يتغسلوا . سمعت دقديق راحت تفتح وقاتهم
قمرة : على سلامتك
اعلن رسميا انو وليت نحب الجبات 😍😌 واحد الراحة كي تلبسوهم ياجدك ، تحيااا  الجبات )