قمر الإنتقام

🌟الفصل الثاني : العائلة 🌟

"لست مسؤول عما سيحصل بعد الان ....."

قبل دقايق ..... دخلت بطونوبيلتها للساحة الكبيرة وين كانوا الطونوبيلات لوخرين لتم ، هبطت منها وراحت تمشي بثقة وفرحة كي راح تشوف أماني صحبتها وختها وشوية قلق كي راح تقابل عائلة باباها ، إيه قمرة مصطفاوي وحدة من أحفاد المصطفاوي
صونات في الباب وقعدت تستنا يحلولها ، فتحت نصيرة الباب
نصيرة : انعم مدام
قمرة : مساء الخير طاطا انا قمرة صحبت أماني جيت لعندها بصح سوربريز
نصيرة : معليه بنتي اتفضلي
دخلت تمشي وهي مستريسية شوية ماشي ساهل تقابل فاميلتك لي ما تعرفهم ما يعرفوك وما تقولش شكون نتا
قمرة :سوربريز
..........
كانت أماني فرحانة بزاف وناضت تجري ليها عنقتها بعد ما ساغت بإسمها
أماني : قمرةةةةة
ضحكت أمينة بفرحة كي شافتها مام فراس تبسم كي شافها بصح ما يقدرش يقول بلي هادي بنت خويا ما حبش يفسدها عليها ، اما إسلام كان معطيها بظهروا منبعد وقف باش يرحب بيها
أماني : توحشتك يالبقرة (ضحكت وتبعتها قمرة )
قمرة : حبيت نديرهالك سوربريز
أماني : ياعمري ، هدا هو إسلام خويا ، إسلام هادي
إسلام : هي قمرة صحبتك لي تظلي تحكي عليها (قالها وتبسم وهي ضحكت معاه )
قمرة : علا حساب الشوفة تعرفوني بلا ما شفتوني ، متشرفين إسلام
إسلام : الشرف ليا ، اتفضلي اقعدي معانا ،خالتي نصيرة جيبيلها سارفيس
نصيرة : معليه وليدي
قعدت قمرة قدام فراس لي كانت بلاصة قدامو فارغة وزيد قدامها اسلام ثان
فاطمة : مرحبا بيك عندنا بنتي (تبسمت معاها وقمرة ثان تبسمتلها)
قمرة :يزيد فضلك الحاجة ، وقيل نتي مان أماني ؟
فاطمة : انعم انا هي ، تقدري تعيطيلي ماني فاطمة
قمرة : نسيي اذا قدرت بسك عندي ماني تع ماما ما تخليني نقول "ماني " لحتى واحد من غيرها
لي كانوا لتم تشوكاو كيفاه تهدر مع لالة فاطمة هكاك اللي واحد ما يقدر يديرها منهم هي دارتها (معلابالهمش واش راه يستنى فيهم هههههههه)
حطولها تاكل معاهم وهكاك ما قدرتش تاكل بسك مازال ما والفتهمش سي نورمال مي ستنات حتى كملوا وناضت معاهم للصالون ، قعدت قدام أمينة معنقتها وأماني ملهيك قاعدة ، والباقي كامل قاعدين ، كانت فااطمة تشوف فيها بنظرة مقلقة من لبستها وقمرة ماشي معبرتها كامل وقاعدة مع أمينة وأماني تحكي معاهم وتضحك وإسلام وأمير وأيمن وفراس يقصروا مصطفى وأحمد خرجوا للجنينة والبنات إنصاف وماريا مع إيلين يشوفوا لحوايج وصفاء مع نسرين يهدروا على العرس
أماني : حقا ماما وقتاه جي طاطا نايلة توحشتها
أمينة :قاتلي غدوة نجي ، تعرفي كي تروح عند يماها بسيف باه تطلقها
قمرة : شكون هادي ؟
أماني : هادي مرت عمي يوسف بابات أيمن ، كي تجي نعرفك عليها
أمينة : واش راهي أنيسة واش راهي خالتي حمامة ريحت شوية هي ونهال ؟
قمرة :لاباس الحمد الله خالتي نهال برات دوكا وماني راكي تعرفي مع الكبر راهي شوي شوي
أمينة : ربي يطول في عمرها ان شاء الله
قمرة : آمين، ما عرفتينيش على فاميلتك هما عرفوني وانا لالا (ضحكت شوية )
أماني : هاديك عمتي نسرين عندها وليدها أمين وإيلين لي قاعد لهيك بروبا كحلة ، واللي معاها الصغيرة ماريا والكبيرة فيروز بنات عمتي صفاء أيمن شفتيه هاداك وليد عمي يوسف واللي معاه أمير وليد عمي كمال ، عمو مصطفى راجل عمتي نسرين وعمو احمد راجل عمتي صفاء لي راهم برى ، وهاداك عمي فراس اخر العنقود
قمرة : اممم مليح عجبوني (ضحكت أماني وأمينة عليها وزادت هي معاهم لوكان ما يعرفوهاش يقولو صح )
فاطمة :انا نروح نشرب دوايا ونرقد تصبحوا بخير
الجميع : ونتي بخير
قمرة : هاداك هو انا نروح
أماني : وين تروحي وين ؟ ماعندك وين تتحركي تباتي هنا ماما أهدري معاها
أمينة :عندها الحق وزيد تسمع بيا انيسة خليتك تروحي وحدك فالليل تدير فيا حالة ، اصلا بيتك راهي واجدة لفوق
قمرة : خلاص إذا قرار المحكمة خرج ماعندي ما ندير (ضحكوا عليها) بصح لازم نخرج نجيب الفاليزا تع الحوايج والكابة
أماني : خلي الرجال يجيبوهم
إسلام : ايه وريلي برك طونوبيل ونجيبهم
قمرة : معليه خلي نجي معاك مام انا بسك نسيت حاجتي لتم
خرجوا كيف كيف وإيلين قريب تطرطق مالغيرة وأماني تغزل فيها وتزيد
أماني : ماما شفتي شحال توالمو كيف كيف ؟
أمينة : يسمعك إسلام تشوفي
أماني : خليه يسمع علاه راني نكذب أيمن ؟ (ضحكوا معاها كامل غير إيلين لي قريب تنوض ليها تشنشفها تالمون استفزتها وفراس شايد كرشو مالضحك على وجهها )
عند إسلام وقمرة ، هبط الفاليزا الكبيرة وشافها ثقيلة
إسلام : واش فيها هادي ؟ بنادم ميت ؟ (ضحكت قمرة بصوت عالي وشافتها إيلين وتغزلت)
قمرة : هادوا دوزان عرس تاع ختك انا خاطيني
إسلام : ياك شرات كلش واش هاذوا ثان ؟ (قالها بالضحكة تاعو هاديك الشابة )
قمرة : ماعنداك هادوا كادوات تاعي ليها ، ختي تتزوج وما نتفكرهاش بكادوا
دخلوا كيف كيف وتلاقاو بإيلين عند باب الصالون خارجة
إيلين : واش هادي قاع قسرة ؟ رحتوا جيبو فاليزات مالطونوبيل ولا مالمطار ؟
إسلام : إيلين
قمرة : باردون علاه كشما قلقناك ؟
إسلام : خلاص قمرة ماكان والو هيا تطلعي لعند أماني سور راهي تستنى فيك
قمرة : وي عندك الحق (جازت عليها بكل برود وصوت الطالون تاعها يدير في الحس
إيلين : على حساب الشوفة عندي قسرة مع اللالة ، ونتا سي إسلام عجبك الحال
وصلو قدام بيت أماني
إسلام : ماديريش عليها
قمرة : نو ماكانش مشكل عادي (تبسمت معاه ودقدقت الباب وفتحت ) مينوشة اني جيت
أماني : ادخلي ، صحا إسلامو
إسلام : بلا مزية أمونة هيا بونوي
حط الفاليزا والكابة الصغيرة وراح لبيتو وهي غلقت الباب
قمرة : كيفاه جيتك بالروبة هادي ؟
أماني : تهبل وطلع الغاز حتى هههههههه (ضحكوا في زوج )
فلاش باك ، مور ما دوشت قمرة خفيف ظريف فتحت فاليزتها وقعدت تحوس حاجة تلبسها
قمرة : ايفييت (هي تهدر تركية علابيها) دوكا نحوسو عفسة نطلعو بيها لغاز لللالة فاطمة
حوست حوست حتى لقات روبا زرقا فيها نقاطي بيوضا باليدين والظهر شويا عريان
قمرة : ايوااااه هادا واش كنت نحوس
راحت لبستها ودارت شوية ماكياج خفيف لبست صندالة تاعها باج جاتها تهبل ورفدت صاك صغير باج ودارت شعرها ويفي كودشوفال ، رمات بوسة لروحها فالمراية
قمرة : تهبلي يااقمرة يا قمورة
خرجت مالدار وديماارات للقصر
باك
أماني : والله طلعتيلهم كامل الغاز في أول نهار عمتي بنتها سورتو ماني ، ايه اقعدي دوكا احكيلي وقتاه جيتي وكيفاه
قمرة : وصلت مقبيل على 18:00 وجا داني عصام بسك قوتلو حابة نديرلك سوربريز ، منبعد وصلني للدار دوشت بدلت حوايجي وجيت ، وجبتلك واش قتلك
فتحتلها الكابة الصغيرة كان فيها باك تاع ماكياج ماركة مع باك تع كوسميتيك وشوية اكسيسوار
فتحت الفاليزا الكبيرة وجبدتلها الروبة الحمراء تع الحنة
أماني : ايمااا شحال تهبللل ، ياعمري على ختي شخال تعرف تخير (عنقتها ) ايه ونتي روبتك ؟
جبدت روبة باج طويلة فيها شلقة حتى للركبة وشوية فوق مع صندالة تاعها مام روبة أماني
أماني : هادي تطلع الغاز والسكر والملح وكلش (طرطقوا بالضحك منبعد دقدق الباب وتفتح )
فراس :ضحكوني معاكم
أماني : ادخل واغلق الباب فوفو (دخل وغلق الباب )
فراس : بنت خويا
قمرة : فوفو (عوجتو شفايفها كيما البيبي وعنقاتو ) توحشتك ما تعيط ما تسقسي ماتقول بنت خويا تتوحشني
فراس (بالضحك): شوفا سيدي ماشي نورمالمو العكس ؟
قمرة : اسكت اسكت ، ايه عجباتك بنت خوك ؟
فراس : والله خرجتي باندية ، فطوم راهي تقلقت زيدي معاها نسرين وبنتها
قمرة : مازال يزيدوا يتقلقوا ، وهديك السحارة وراجلها وين راهم ؟
فراس : داها تشوف يماها وختها
قمرة : مزية ما شفتهمش ، ديجا نسرين وبنتها بزاف ، المهم هاك الكادو تاعك ما نسيتكش
فراس :امم زعما تفكرتيني ؟
قمرة : ما تتعاشرش نتا نعطيك كادوا تقولي هكا ؟ (ضحكوا عليها )
فراس : خلاص هاتي نفتحو (جبد باطة من ساشي شباب تع كرطون وفتحها لقى ساعة شابة على حساب الذوق تاعو )
فراس : بيييييي عندك واحد القو بومبا ، يعطيك الصحة (عنقها وسلم على جبينها ) انا نروح نرقد بونوي
قمرة ، أماني : بونوي عمو
قمرة : علابالك راني ميتة بالعيا ، نروح نرقد غدوة مور الحنة نقصروا مليح مليح
أماني : باينة بصح بشرط ترقدي معايا
قمرة :اوكي هايا بونوي عروستنا
أماني : بونوي عمري
راحت لبيتها ترقد بعد ما بدلت حوايجها ورقدت ديراكت ، عيات بزاف اليوم
صباح جديد ، كانوا كامل على طبلة تع الغداء ، (كمال ومرتو وبنتو جاو مام نايلة ويوسف )
فاطمة : كي تكملوا غداكم كل وحدة تروح توجد روحها ، نايلة وصفاء نتوم تستقبلوا معايا الضياف اللي رح يجو ، نسرين وسليمة نتوم تبقاو مع أمينة تشوفو كشما يخص معاها ولبنات نسحق كل وحدة في بلاصتها ماتقعدوش دورو من ومن ، وثان ماتخلوا حتى واحد يدخل لبيت لعروسة ولا يدنا لصواحها
ماريا : ما تتقلقيش ماني انا نعس عليها (ضحكوا عليها)
فاطمة : هكاك الشاطرة تاعي ، إسلام نتا ابقى مع عمومك تستقبلوا الرجال وكشما يخص ابعتهم ليا
إسلام : معليه فطوم
كملوا تغداو وناضوا ، كانت فاطمة قالبة وجهها على واش صرى صباح
على 08:00 تع الصباح كامل كانوا في الطابلة بقات غير فاطمة وقمرة باش يهبطو ، تلاقاو سواسوا قدام باب الصالون وين يستقهواو ، شافت فيها فاطمة مالفوق للتحت على لبستها
فاطمة : بنتي واش هاد اللبسة ؟ ما علابالكش بلي كاين العزاب في الدار ؟
قمرة : لالا علابالي لالة فاطمة بصح انا ماراني دايرة والو ولبستي اللي راكي تهدري عليها غير بابا وحدوا لي يقدر يناقشني فيها
فاطمة : راح نسكت على خاطر راكي ضيفة أماني ، سينو انا ما نسكتش
هاد الهدرة كامل كانت داخل الصالون قدامهم كامل شايفين كيفاه النار تخرج من عينين كل وحدة
إسلام : ماني خلاص هيا تاكلوا (قالها إسلام بعد ماشافهم هكاك ما عجبوش الحال ، يعرف جداه كيفاه ما تحبش هاد العفايس ومن جهة صحبت أماني لسانها قاطع ما تسكتش كامل )
قمرة : بصحتكم انا راني شبعانة (خرجت وراحت للجنينة تع القصر وهوما كملوا ياكلوا ساكتين وشافو وجه فاطمة مزير و مشنفة عليهم
باك
فاطمة : أماني بنتي ، صحبتك مابانتش ياك غير الخير ؟ (قمرة خرجت صباح جوايه 11 باش تجيب فاليزا تع حوايجها مالدار بسك راح تقعد يامات عندهم هكا طلبت منها أمينة )
أماني : خير خير ماني ، هي قاتلي بلي راح تفري صوالحها منبعد تجي
عند قمرة خرجت مالريسطو اللي كانت تروحلو مع أماني بعد ما شرات زوج سندويتش مع زوج قرعة جوو ورايحة للقصر بسك اصلا الفاليزا راهي فلامال ، جات تركب حتى شافت رودة تاعها مفشوشة كامل
قمرة : ايواه هدا واش كان خاصني ، زيدي كملي عليا نتي ثان (تهدر مع طونوبيل تاعها )
حطت ماكلتها في الطونوبيل منبعد عاودت دخلت للريسطو وراحت عند واحد جون
قمرة : سمحلي خويا نسقسيك
جون : اتفضلي
قمرة : ماتعرفش كاش ميكانيسيا هنا
جان جون وحدوخر يبان ماشي منا
إياد : واش عمار كاشما خصكم
جون(عمار): الاخت راهي تسقسي على ميكانيسيا
إياد : خلاص تقدر ترجع لخدمتك انا نعاونها ، انا إياد مول الريسطو هادا
قمرة : متشرفين انا قمرة
إياد : تقدري توريلي واش خصك بلاك نقدر نعاونك
خرج معاها وين طونوبيلتها وراتلو الرودة المفشوشة
إياد : نقدر نبدلهالك اذا عندك ماتريال ؟
قمرة ك دقيقة برك دوك نشوف . راحت فتحت لامال دنات الفاليزا تاعها ولقات واش تسحق داتلو الدوزان منبعد راح هو جبد الرودة باش يركبها ، صونا تلفونها فهداك الوقت وكان فجيب تاع السروال
قمرة : وي أمونة
أماني : وين راكي باندا 10 سوايع باش تولي ، باتي لتم خيرلك
قمرة : اصبري نفهمك بركاي مالهدرة الزايدة ، تفشتلي الرودة كي جيت مولية وراه يعاون ففيا مول ريسطو لي كنا نفطروا عندو دايمن
أماني : اه صحة خلاص امالا ما طوليش كثر ، نخاف كشما يزيد يصرا وما تلحقيش راهي ال13:00 ياو باش نوجدوا روحنا كيفكيف وزيد نتي راح ديريلي ماكياج وحدة ما خليتها ديرلي
قمرة : خلاص بلعي برك راني جاية
كوبات عليها ، كانت أماني مع العائلة قاعدة في الصالون قبل ما ينوضو يوجدوا روحهم
أمينة : ايه واش قالت ؟
أماني : تفشتلها الرودة ودوكا راهم يسقموهالها
أمينة : معليه يلاه نوضي
ناضو يبداو يوجدو كيما قالت فطوم . عند قمرة مور ما كوبات شافت في إياد لي ضحك معاها وكان واقف وكمل خدمة
إياد : واقيل تقلقوا عليك داركم
قمرة : هادي غير صحبتي برك ، يعطيك الصحة سلكتني لوكان ماشي نتا ليوم أماني تتبرى مني
إياد(ضحك): بلا مزية مافيها والو بصح ماتنسايش تروحي تسقمي رودة تاعك بسك هادوا مالازمش تطولي بيهم
قمرة : ايه يعطيك الصحة مرة اخرى ابقا على خير
إياد : الله يسلمك ، زورينا مرة اخرى
قمرة : بيانسور هايا باي ركبت وراحت وهو دخل يتبسم وراح باش يغسل يديه
دخلت بالطونوبيل تاعها للساحة تاع القصر ، شاف فيها أيمن وأمير كانوا يسقموا في الطوابل ولي تونت (هادوك الخيمات اللي يجو في العراس ) هبطت مالطونوبيل وراحت لامال هبطت الفاليزا تاعها (شافها إسلام وفراس ) منبعد راحت جبدت صاشي تاع ماكلتها وصاكها وغلقت الطونوبيل ودخلت
أماني : عالسلامة يا لالة
قمرة : روحي اخطي جدي ما تزيدينيش نتي ثان
أماني : خلاص أني نقصر برك ، جبتيلي واحد ؟ (غزرت فيها قمرة وضحكت)
قمرة : راه فالصاشي بصح امشي نروحو لبيتي بسك راح نطيح مالسخانة تع برى
طلعوا لبيت قمرة وحطت فاليزتها وقعدت قدام أماني اللي بدات تاكل عندها شحال
أماني : ايه احكيلي واش صرى يا مغنطيس المشاكل
قمرة : اسمعي اذا راكي حابة تكمل الحنة تاعك على خير شدي فمك عليا (ضحكت أماني ) المهم كي خرجت مالريسطو مور ما شريت الماكلة لقيت رودة مفشوشة وليت سقسيت جون يخدم لتم ابري جا هادا إياد مول الريسطو هدر معايا وقالي بلي مول الريسطو منبعد جا معايا يشوف ادا يقدر يعاوني ومزية قالي جيبيلي دوزان عطيتلو واش سحق وبدلي رودة كي عيطتيلي كان يزير فيها منبعد شكرتو وقالي زورينا وركبت وجيت لهنا . (كانت أماني تشوف فيها تع متحمسة شغل تشوف فيلم)
أماني : ياعمري شحال كيوت عاونك وزيد عرضك باش تزيدي تروحي للريسطو وقيل عجبتيه ياطفلة
قمرة (ضحكت) : انا وين وهي وين
أماني : لالا سيريو علاه ما عطيتيلوش انستا تاعك بالاك تلقاي مكتوبك
قمرة : دوك نضربك بدماغ نوريلك مكتوبي كيفاه جاي ، هايا كملي كولي فالسكات وروحي دوشي باش نجي نوجدك منبعد نوجد روحي انا ثان
أماني : خلاص أني رايحة
خرجت أماني بالماكلة تاعها وراحت لبيتها وقمرة شعلت بيسي تاع أماني عطاتهولها صباح باش تشوف كاش عفسة مابيد تكمل ماكلتها .