الخازوق الأسود

الخــزق الـتـاسـع

#الخَـازوق الأسـود

ذكرى.

لا تنسون التصويت والتعليق بين الفقرات 🤎.

استمتعوا....

____________________
____________

هَرم

لاحظت أن الموت وحدة الي يگعد مشاعرنا الداخلية من صدگ !

أي شي مريت بيه بحياتي جانت مشاعري عادية، بس من شفت منظر راحيل بأيد جرح حسيت بشعور حياتي كلهة محاسة بيه..

هدا هو شعور فقدان أقرب وأعز الاشخاص ؟

شعور غريب أول مرة أمر بيه، غريب لدرجة موجعة لگلبي !

حطيت راسي على الجامة وانا اباوع على الطريق الكلة قبور، تقريباً جان وقت أذان الفجر واحنة بالطريق للمغيسل.

جنت صاعدة وية خالي ومرتة وأمي جانت بصفي، جانت گاعدة وتلطم على رجلهة، ملخت روحهة من وقت طالعين من البيت لحد هسة.

بوقتهة جرح جان شايلهة والسجينة جانت بنص گلبهة والدم ينگط منهة وشفت آثار اعتداء عليهة ورسومات على صدرهة ورقبتهة خلتني انهار !، منظرهة مدا يروح من بالي أبد !!!

رحت ركض عليهة وحضنتهة حيل لصدري ماعرف شجاني حسيت بشعور يكولي روحي حضنيهة بعدة جسمهة دافئ قبل ما يبرد حضنيهة !!

مقبلت اعوفهة الا من جرح اخذهة من أيدي وطلع برة وانا صياحي ملئ البيت ودمهة صار علية، ردت احضنهة اكثر واضمهة لصدري اكثر واحس بدفئهة !!!

اخذوهة للمستشفى واكيد سوولهة الاجراءات الكاملة ومنطونة جثتهة بنفس اليوم...

طبگنة السيارة ونزلنة احنة وشفت ورانة سيارة أبوية هم طبگت بس أبوية مجان بيهة.
نزلو جرح ومُعقب وبرهان ثلاثتهم منهة وجانو حاطين التابوت فوگ السيارة.

شالوهة ثلاثهم وحتى مقبلو ولد خوالي يساعدوهم بس همة الثلاثة شالوهة وودوهة للمغيسل وهم مقبلو أي أحد يفوت يمهة بس انا وأمي ومرية الي تغسل.

نزعت عبايتي ومگدرت اتقرب منهة گعدت بالگاع وگمت ابجي وأمي حاضنتهة وتبجي وتصيح.

بدت المرية تغسلهة وتشهد وانا گمت من مكاني واخذت من أيدهة الطاسة مال ماي وگمت اذب عليهة وانا اكول.
-طيرة من طيور الجنة انتِ راحيل.