الخازوق الأسود

الخــزق الـسـادسـة عـشـر

#الخَـازوق الأسـود

ذكرى.

لا تنسون التصويت والتعليق بين الفقرات 🤎.

استمتعوا....

____________________
____________

جموح

من شفت الكـابر نزل من السيارة وهو عاقد حاجبة حسيت كل اطرافي تجمدت، تقربت بسرعة من خاتون وانا اتختل ورة البنات.
-خاتون هذا الكـابر !!

باوعت علية مصدومة ودارت وجهة وشافتة من بعيد جان يفر راسة كأنو يدور علينة، بسرعة هي هم نزلت راسهة وتختلت ورة البنات نفسي.
-مشافنة همزين لان ديدور علينة.

جموح: نووح !!!!

اندارينة ثنينة سوية وشفنة نوح ماكو، تنهدت براحة وهي رفعت راسهة.
-امداه والعباس الا اطيح حظة جلطني، لو هسة الكـابر شايفة جان شسوة بينة !!!!

مرديت عليهة باوعت على الكـابر وگلبي بعدة جان يدگ بخوف وتوتر، لو الكـابر شافني يم نوح ماعندة مانع يذبحني هنا بمكاني.

طلعنة من بين البنات ورحنالة وهو بس شافنة ضغط على اسنانة وكل بغضب.
-وين رايحات صارلي ساعة ادور عليجن !!!!

خاتون: شوية تأخرنة بالطلعة، هسة شبيك صاير هيج عصبي ترة..

قاطعهة وهو يفتح الباب مال سيارة: غضب الله صعدي وانتِ سادة حلگج، ترة عفت الشغل مالي واجيت وابو فاضل اذا ممجاوبات ادگجن بالنعال.

صعدنة وراه واحنة ساكتات ثنينة، بدة يسوق وباوع علينة من المراية الگدامة.
-شو خايفات ! ممجاوبات مو ؟؟

حمحمت انا: ها لا زين الحمد الله جاوبنة..

هز راسة: اليوم جان رياضيات، الأكـبر بالبيت همزين هو يشوف.

من كل هيج اصلاً يا نوح يا صخام، الخوف الحقيقي هسة بدة..
وصلنة للبيت ونزلنة من السيارة وانا وخاتون وحدة تباوع بوجه الثانية، دخلنة جوة وصدگ جان متربع ودياكل تمر وية لبن.

رفع راسة النة واشر براساً بدون حتى سلام.
-الاسئلة وين ؟؟

خاتون: نسيناهة بالمدرسة.

باوع على أيدي ورفع حاجبة: ناسينهة مو ! چا هذا الي بأيد جموح شنو ساطور حمدية ؟