South Boys #5: Crazy Stranger

Chapter 41

BAKIT HINDI KO MA-CONTACT?

Galit ba siya? Galit ba siya dahil akala niya ay gusto ko lang siyang makasama dahil wala na si Mama? Dahil wala na akong pagpipiliang iba? Iyon ba ang naiisip niya?

Halos maubos na ang kuko ko sa aking kakangatngat. Pabalik-balik ako ng lakad sa sala. Nakailang baba't akyat na rin ako sa hagdan. Naka-leave pa rin ako sa work kaya ito, para akong nababaliw sa kakaisip dito.

Pumunta ako sa bahay ni Tita Judy dahil gusto ko sana ng kausap. Ang kaso, may emergency sa Manila ang tiyahin ko. Ang nasa bahay lang nito ay ang kambal na anak at iyong partner niya at iyong ex niya. Kilala niyo naman na kung sino iyong ex.

Gusto ko pa sanang mag-stay roon kaya lang ay baka lalo ako roong mabaliw. Hindi magkandaugaga ang dalawang lalaki sa pag-aasikaso ng bahay at sa kambal, dahil yari silang dalawa kapag umuwi ang aking tiyahin na hindi nila nagampanan nang masyos ang kanilang gawain. Nagmamakaawa pa nga ang mga ito na 'wag muna akong umuwi, pero bahala na sila sa buhay nila, tutal desisyon naman nilang gustuhin ang tiyahin ko.

Gabi na ay panay pa rin ang check ko sa phone. Nang mag-beep iyon ay nagmamadali kong dinampot. Notification sa social media ang naroon.

Carlyn Marie Tamayo sent you a friend request!

Ang profile photo nito ay candid photo ng isang lalaki habang kumakain ng icecream. Nakilala ko agad, dahil wala namang gaanong nagbago sa itsura nito maliban sa nag-matured nang kaunti at mas gumuwapo. Kaklase ko noong high school, our top 1, si Jordan Moises Herrera.

Sandali ko pa lang naa-accept ang friend request nang makatanggap ako ng message mula kay Carlyn.

Carlyn Marie: Hi, Lai! Still remember me? Iyong pinakamaganda sa Gov dati tapos medyo mabait?

Kaka-PM pa lang nito ay may kasunod na agad.

Carlyn Marie: Are you busy? Invite sana kita ngayon sa PK2. Birthday ng anak nina Isaiah at Vivi. Dito si kalbo.

Nang mabasa iyon ay napatayo agad ako mula sa pagkakaupo. Nagtipa ako ng reply habang palakad papunta sa closet ko. Pagka-send na pagka-send ng reply kay Carlyn, ay naghagilap na agad ako sa damitan ng susuutin.

Skinny jeans at manipis na cream knitted short sleeved top ang isinuot ko, at sandals sa paahan. Ang buhok ko ay aking itinali paitaas at nagtira lang ako ng kakaunting mga nakalawit na hibla sa gilid ng aking mukha. Nagpabango ako, kaunting pulbo, at tanging manipis na liptint lang sa aking mga labi.

Nagpa-special na ako ng tricycle patungo sa Brgy. Pasong Kawayan Dos. Lampas iyon sa dati naming school sa may Brgy. Pinagtipunan. Alam ko ang compound ng kaibigan ni Asher na si Isaiah, kaya madali ako roong nakapunta. Madali ring makita ang compound dahil may ilang tent at mga sasakyang nakaparada sa labas. Bukas ang gate at maririnig sa loob ang videoke.

♫ ♬ Kinokompleto mo ang araw ko, sa tuwing inaaway mo!

Nabosesan ko ang kumakanta. Isa sa tropa nila. Si Michael Jonas Pangilinan o Miko.

♬ Paggising sa umaga mukha mo ang nakita, wala pang nagawa nakasimangot na

At pagsapit ng gabi tampo lalong lumalaki, ang gusto ko lambingan ngunit may unan na namamagitan

Ang almusal ay sigawan, ang hapunan natin ay tampuhan

Ang merienda pagdududa, pero mahal kita, wala ng hahanapin pang iba