💜💜
Veer ke call karne par, Jeetu ne call pick karte hue kaha : Ha bhai.
Veer ne Jeetu ki awaz sun kar rahat ki saans lete hue Jeetu se pucha : Kaha hai be? Kab se tujhe dundh raha hu.
Jeetu : Kyu? koi kaam tha. Main kuch kaam se shehar aaya hua tha.
Veer : Nahi. kuch khaas nahi. Tu aaja. Tab baat karte hai. Chote bhi aa gaya hai to jaldi aana.
Jeetu ne ha keh kar phone cut kar diya. Aur fir apne hotho ke bich cigarette daba kar lambe lambe kash lete hue cigarette pine laga.
Subah se ghar me ho rahi jama bheed, sajavat, in sab ko dekh uska dil bahot ghabra raha tha.
Use lag raha tha jaise vo pagal ho jaayega. Isliye vo sab chhod ghar se nikal gaya aur yaha shehar aa gaya.
2 se 3 cigarette pine ke baad vo ab apni bike start kar beman se gaon laut raha tha. To ek baar fir uska phone bajne laga. Usne bike side me rok kar phone nikal kar dekha to ye janhvi ka call tha.
Jeetu ne naa jaane kya soch aaj uska call pick karte hue kaha : Bolo.
Udhar Jeetu ki awaz sun Janhvi ka chehra khil gaya. Aur usne jaldi se pucha : Kaha ho? Itne dino se lagatar phone kar rahi hu. Baat kyu nahi karte. Itna jada gussa ho?
Janhvi ki awaz ko sun Jeetu ka bhi bechain man kuch had tak shaant hua, aur usne Janhvi par narazgi jaahir karne ki bajay bade pyaar se dheere se kaha : Nahi.
Janhvi : To fir. Ab to tumhare man ki bhi ho gayi.
Humari shaadi isi hafte ho rahi hai.
Jeetu ne Janhvi ki is baat par chidhte hue kaha : Bakwas band karo apni. Mera koi man nahi tha tumhe apni berang zindagi me shaamil karne ka. Aur naa hi meri tumse shaadi karne ki dili khwaish thi. Tum bas meri marzi ke khilaaf mere palle bandh di gayi ho.
Jeetu ki baat se Janhvi ka chehra murjha gaya. Aur usne dheere se kaha : Jaanti hu. Par ab to shaadi ho gayi hai. Fir kyu baar baar is tarah ke taane sunaate ho mujhe. Maine to tumse nahi kaha tha mujhse shaadi karne ko. Tumne apni marzi se shaadi ki.
Janhvi ki awaz me aaye badlaav ko mehsus kar Jeetu ko ehsaas hua ki vo naa jaane apne gusse me Janhvi se kya keh gaya.
Jeetu ne apni aankhe bhinch li. Aur fir ek gehri saans le janhvi se kaha : Mujhe tumse milna hai.
Janhvi ne Jeetu ki baat sun apni aankho me aayi numi ko saaf karte hue kaha : Nahi. Mujhe nahi milna. Tum naa jaane kya chahte ho. Kabhi to bahot pyaar se baat karte ho aur kabhi...
Jeetu : Agar nahi mili to main tumhare ghar aa jaaunga. Mujhe koi dikkat nahi hai.
Janhvi ne jhat se mana karte hue kaha : Nahi. Kaisi baate kar rahe ho. Sab kya kahenge humare baare me. Aisi bhi kya baat hai. 2 din baad to main tumhare samne houngi tab baat kar lena.
Is par Jeetu ne pareshan hote hue kaha : Tab tak to main pagal ho jaaunga.
Jeetu ne bike stand par laga kar jaldi se kaha : Acha suno. Tum mat aao. Main aa jaaunga. Tum bas raat me chhat par aa jaana. Kisi ko pata nahi chalega. Aur main tumse mil kar chala jaaunga.
Janhvi ne kuch nahi kaha.
To Jeetu ne Janhvi se minnat karte hue kaha : Please Janhvi. Mana mat karo. Bahot jaruri hai.
Main kuch batana chahta hu tumhe.
Janhvi ne Jeetu ke awaz me aaye bhari pan ko mehsus karte hue kaha : Acha thik hai. Aa jaaungi.
Jeetu ye sun khush ho gaya aur usne kaha : Thik hai. To fir raat me milte hai.
Janhvi ne haa kaha to Jeetu ne jaldi se call cut kiya aur bike start kar gaon ki taraf mod di.
************************
