💜💜
Kadmo ki aahat ab jab tej sunaai di, to Jeetu ne Janhvi ko apne saath khinch kar andhere me wall se satta diya.
Dono wall se satt kar khade ho gaye to Janhvi ne jhuk kar seedhiyo ki taraf dekhna chaha,
Magar Jeetu ne jaldi se use apna haath aage kar wall se vapas satta kar thode gusse me dheere se kaha : Seedhi khadi raho.
Jeetu ke chhune se Janhvi ke sharir me tej sarsarahat daud gayi. Jeetu ka haath is samay Janhvi ke seene par tha jiski vajah se vo apni jagah par hi jam si gayi.
Usne apne upar niche hote seene par Jeetu ke haath ko dekh Jeetu ko andhere me hi ek nazar dekha to vo thoda sa apna sar jhuk kar seedhiyo ki taraf dekhne ki koshish kar raha tha.
Jeetu ko dekh Janhvi ki dhadkane badhne lagi. Vo ghabra gayi. Aur usne apni saans rok jaldi se Jeetu ka haath apne seene se jhatak diya.
To Jeetu ne use dekh fusfusaate hue pucha : Kya hua?
Janhvi ne jaldi se apna sar naa me hila diya.
Jeetu, Janhvi ko dekhne laga tha ki tabhi dono ke kaano me kisi aurat ki awaz sunaai di.
* Sab so gaye hai, ab jaldi se aajao. Janhvi peeche ke kamre me so rahi hai. *
Janhvi awaz sun jhat se pehchaan gayi par vo kuch kehti usase pehle Jeetu ne uske muh par haath rakh uska muh band kar diya.
Vahi ab us aurat ki awaz ek baar fir un dono ko sunaai di.
Us aurat ne phone par baate karte hue kaha : Bahot tej hai vo ladki. Use lekar yaha se dur chale jaana. Varna pakade jaoge. Aur agar aap pakade gaye to mera sach bhi samane aa jaayega.
Janhvi ne us aurat ki baate sun Jeetu ka haath hata jaldi se andhere se nikal chaand ki roshni me khade hue kaha : Kaun sa sach samne aa jaayega bhabhi.?
Janhvi ki awaz sun Jyoti bhabhi ke hosh udd gaye. Vo ghabra kar peeche mudi thi ki tabhi Jeetu ne harkat me aa jaldi se unke haatho se phone chhin apne kaan par lagaya.
To udhar se kisi ne kaha : Jada darne ki jarurat naa hai. Ab vo ladki mere chungal se kabhi aazad naa ho paayegi.
Jeetu ko phone par aadmi ki awaz kuch jaani pehchaani si lagi thi.
Jeetu ab bhi chup hi tha, ki tabhi ek baar fir vo aadmi bola : Meri madad karne ke liye tera shukriya bhabhi. Mere sasur aur us ladki se meri beijjati ka isase badhiya badala naa hoyega. Apni khubsurati par bada ghamand hai na us ladki ko.
Apne bistar par laa kar uska ghamand chur chur naa kiya to mera naam bhi Param nahi. Aur kal dulhan gayab hogi to mere sasur ki pure gaon me ijjat uchhalegi. Tab jaake mere kaleje ko thandak padegi.
* Ghar ka darwaza khula rakh main aa raha hu use lene *
Param ki baat sun Jeetu ne call cut kar ab Jyoti bhabhi ko gusse me ghura to vo ghabra gayi.
Uske maathe par paseena chhalak aaya. Aur dar ke karan usne apna sar jaldi se hilaate hue kaha : Meri koi galti nahi hai. Ye jeeja ne hi mujhe phone kiya tha. Isme meri galti naa hai.
Jeetu ne Jyoti bhabhi ka phone fek gusse me un par haath uthaate hue kaha : Kitni giri hui aurat ho. Apni hi ghar ki beti ko..
Vo kuch kehta ya karta usase pehle hi Jyoti bhabhi Jeetu ke pairo me gir gayi. Vahi Jeetu ka haath hawa me hi ruk gaya.
Jyoti bhabhi ne rote hue kaha : Naa damad ji. Main nirdosh hu. Mujhe chhod do.
Jeetu ne Jyoti bhabhi ko dur jhatak gusse me kaha : Sochna bhi mat ki main aap ko chhodunga.
Aap ki himmat kaise hui meri biwi ke khilaaf saajish karne ki.
Janhvi jo ab tak hairaan apni bhabhi ko ghur rahi thi. Jeetu ki baat sun ab vo use dekhne lagi thi ki tabhi,
Jeetu ne uska haath pakadte hue Jyoti bhabhi se kaha : Bhabhi maa samaan hoti hai. Par aap to bhabhi nahi ban saki maa kya banogi. Aap ki khud ki bhi beti hai. Fir bhi aap ka dil nahi kaampa ye sab karne se pehle.
