Paikot-ikot, Patingin-tingin [isang Tulaserye]

TULA 10: Pare-pareho, Panga-pangako

Tinitigan ko siya

sa kanyang mga mata

pagkatapos sakupin

ng mga labi ko

ang mga labi niya

"Patutunayan ko sa kanila

kung gaano kita kamahal.

Pag-ibig ko sa iyo'y magtatagal."

"Gaano mo ba ako kamahal?"

"Kasinlawak ng langit.

Kasinlapad ngdagat.

Kakayanin ko ang lahat.

Hahamakin ko ang lahat."

"Paano

ang mga magulang ko?"

"Alam ko,

noong ipinakilala mo ako,

naramdaman ko

na hindi nila ako gusto.

Ang totoo,

hindi ka rin gusto

ng mga magulang ko.

Nalaman ko,

ang mga pamilya pala natin

ay magkaaway

mula pa sa ating mga lola't lolo."

"Para pala akong si Juliet.

At ikaw si Romeo."

"Parang paulit-ulit

na eksena sa teleserye.

Parang gasgas

na plot ng telenobela.

Parang kapareho

ng kuwento ng drama sa radyo

at ng pelikulang sinabi mo."

"Pero epektibo pa rin

sa paghadlang

at pagpasakit ng damdamin."

"Ngunit

Hindi natin sila hahayaan

na tayo ay kanilang pigilan."

"Hindi natin hahayaan

na damdamin natin

ay kanilang saktan."

"Kailanman

ay hindi ko hahayaan

na tayo'y maghihiwalay."

"Makakaasa ka

na hindi ako bibitaw

sa iyong kamay."