Paikot-ikot, Patingin-tingin [isang Tulaserye]

TULA 29: Niyakap-yakap, Hinalik-halikan

Nakangiti akong

humarap sa kanya

Tumambad sa akin

ang masaya ring

mukha niya

Ang itsura niyang

hindi nagbago

mula noong

una ko siyang makita

Mabilis pa sa kidlat

bumalik ang nakalipas

Mula noong magtagpo

ang aming mga mata

hanggang ngayon

sa muling pagtagpo

ng mga iyon

Wala nang mga salita

Sapat na ang mga titig

habang humahakbang

papalapit sa isa't isa

Mga titig na nagsasabing

Siya pa rin

Ako pa rin

Siya na lang uli

Ako na lang uli

Kaming dalawa na lang uli

Kaming dalawa pa rin

ang isinisigaw

ng kanya-kanyang damdamin

Mayamaya

hindi ko na

maihakbang

ang aking mga paa

Bumangga na pala

ang mga iyon

sa kanyang

mga paa

Kami ay nagkatawanan

Kapagkuwan

niyakap ko siya

nang mahigpit

Halatang nasasabik

Tulad niya

Pagkatapos

kami ay nagkatinginan

Nag-usap ang mga mata

na tila nagpapahayag

kung gaano namin

kamahal

ang isa't isa

Inilapat ko

ang mga labi ko

sa mga labi niya

Walang pakialam

sa mga makakakita

Gumanti siya

ng halik

Buong-puso

Nararamdaman ko

sa mga kamay niyang

kumunyapit

sa aking batok