سوزان المندلاوي
مرت اليومين بسرعة ىبين ...معهد وبيت ..والكهوة ....
اني
من عندي شي سفر مانام اضل كاعد لو اغفه شويه لو لا ......
كمت الصبح وي عائلتي ..ريوك ..وسوالف ..وكمت حضرت روحي ..ودعتهم ..وطلعت للمطار ...
كملت الاجراءات ....وصار موعد الرحله ...طبعا شكد اسافر لكن ازعج شي عندي الطيارة ...احس روحي كاعد بجدر ضغط ...لحد مانزل اني الف مرة مشاهد ..اكرهه بس ..مجبور ..وسيله نقل ..مريحه ..وصلت لمطار بغداد ..طبعاتاخير بكلشي .وماكو نظام ومدافع ..طلعت اجرت تكسي ورحت للبيت اهلي ..طبيت ..
امي تلكتني من الطرمه
هلا هلا هلا يمه هلا هلا ..
وضلت تبوس بيه ..
شونج يمه وابوس اديها وراسها واحضنها ..
بشوفتك زينه ..
طلعت مرت اخويه سلمت عليها ..
والجهال ..بوستهم
طبيت تعبان بس شوفتهم ..تنسي التعب ..وامي جنها بطيخه ..كوة تمشي سمينه مدحدحه ..كعدت يمي ..وضلت تسولف وتسالني عن زوجتي واطفالي ...
كالت شلون دولمه مسويه الك ...تخبل من ايدي اني بوست ايديها ...
كتلها يمه مهند ماكو ..دارت وجهها وضلت تشوف منو موجود ..بصوت ناصي جاوبت
كالت طالع يمه
وينه مويدري اني جاي ..
قربت عليه ..
يمه اخوك لازم درب موخش
خير شكو اسمع ماريد مرته تدري
شكو دحجي يايمه ..
كالت مدري شمسوي
والتمت علينه الزلم بلباب
وتتعارك وياه
ليش شمسوي
ضلت تفر باديها
جنه مزوج
واكع بمصيبة
لا يمه شيزوج كولي سوالف مكسره
كالت واني شمعرفني بي يطلع ساكت ويطب ساكت
كتله عاد انتي خبلتيني ...وطلعتي متعرفين
كالت دنت يم اذني ...مدايين فلوس ..
وذابهن بلحرام يمكن
اسمع العالم تكوله ..مو تكيت براسنة
بس ربك ستر هل مكرودة جانت يم اهلها
وله لو تدري ..تعوفه هلمصخم الوجهه
طبت مرته استبرق ..امي رئسا غيرت ..
جهالك شونهم
كتلها زينين ..
فرشت السفرة وصبت
كالت يلا ابو ادهم الحجية من الصبح تلف بيها
كتلها ورجلج وينه
كالت ميتاخر هسة جاي
تغدينه الحمد لله
وضلت امي تسولف
تعرفون سوالف العجايز متخلص
وترد تعيد بيها
اخوك مخاوي ...
وموخوش درب ..
لو تلحك اله لو لا ...
اني،شبيدي ..يطب ساكت ويطلع ساكت
عما اجه اخويه امي خبلتني
بحيث بدون سلام جريته وطببته بلغرفه
كتله شمسوي ولك من مكسورة ..
كال شبيك يمعود
شنو شبيه ..وجايه عالم تهد عليك شتعرفنه احنه
مايوم طلع حسنه
وخر مني وكعد كال منو هاي وزتك عليه امي ...
لو استبرق
مهند شوكت تكبر مو تعبنه والله
اهووو شبيكم ويايه
احجي شصار
كال بعت سيارة ...
ورجعوها عليه ..
كتلها هاااا وسيارة تبيع من وراها محل
اهووووو
كلي اكعد وافهمك
راح مد.. راسه...شاف ماكو احد
وسد الباب
كال تعرفت ع وحدة
اي بدة طيحان الحظ احجي
وتورطت وسوها عشاير عليه
كمل واني داينت
من واحد صاحبي وحاصرني عليها
شكد كلي المبلغ
كلي مبلغ جبير
كتله صدك تحجي ..يعني علمود ساعات هلكد تذب
ادري ابويه من سوهه هلخير الي بي مو معناها ...نبذرهه بلحرام ..
عمار دخيلك اسكت ..لا تسمع استبرق وتطلع زعلانه ..
هسه شلون ماعندي غيرك ..ومشاكلك ترة تعبت بطل عاد
وانت موصغير مهند اوعه ع نفسك ..
كتله والله لو ما امي واعرفها تتبهذل لجان ..
خليتك تنسجن..وتخيس ..حته تاخذ درس
بس هاي تتمرض اذا صار بواحد شي بينه
عوفها عليه باجر الفلوس يمك
ضل يبوس واخر مرة وتبت.
.واخر مرة بس طللعني من هل المشكلة
وهلحجي لكل مشكله اسمعه ...طلعني واطلعك وتاليها اتسوي الاتعس ....اخر مرة ماتحمل طيشك بعد
والله تبت ...كتله امشي نطلع ...هسه امي سوت افلام ..
طلعنه كملنه كعدتنه يم امي ..وسوالف وشقه ..
بس اشوف مرت اخويه تحبه ..وتخاف عليه لا من الزعل يزعل ليش هيج يسوي وياها ..لو اني لو هوة ..رديت صفنت كلت شنو اخلي عيني ع اخويه ربي يسعدهم ويعقلة .........
بليل ....اتصل بيه صديقي ..امجد ..
هلاو حبي شونك شخبارك
تمام وانت
الحمدلله ها مجيت
ههه لا ابغداد اني
هاي،شنو مو كلت من تجي تمرلي
ي والله ابالي اكمل كم شغلة واجيك
انتظرك مو تنسى
ان شاء الله
سديته ورجعت بسالفة هذا .....
شسوي بي ....
ضليت بلغرفه اتكلب ..حاير بسالفه اخويةة....سمعت طكطه جوة ...نزلت ..شفت امي كاعدة تقرهه القران ...شافتتي سدته ..
كالت يمه شسويت وي اخوك ..
كتله لا تشيلين هم محلوله ...
هوة انتو بس اثنين منو عندي..غيركم
يمه هذا اخوك ..مو يقسة كلبك عليه ..
يامي انتي خبلتيني ..وهسة تكولين هيج ..
اني خبلتك ...
صفنت شكولج ...لا لا يعني ع اخويه ..
كالت يمه ابوك تعب وسوهه هذا كلة ..
لاضيعون تعبه ...
يعني هاي الاملاك اب عن جد ...كعدت تسولف الي من زمن الباشات ..همه اهل ابويه ملاكه ....
واني سامعها القصه ...
كتلها لا ماضيعه ..ولا تحسبين ابد ..
محلوله وخلي راسج بارد
ليش مانمت ..ههه بطلت انام الليل ....
كالت تعال يمي ......نام ع بحضني ...اني هم رحت ونمت ..ع رجلها ... لعبت بشعري
حسيت روحي طفل ...و.ضلت تقره ايات ...ومحسيت بشي .....
للصبح ...شفت نفسي نايم ...بغرفتها ...
كعدت بدون ..ريوك ..رحت سحبت فلوس ....
ورجعت للبيت بس الازدحام طار يوم كامل ..ومكدرت اروح يم امجد ...رجعت تعبان .والشوارع الازدحام اكلت لكمه ونمت ....
كعدت اتفقت وي اخويه ونطيته الفلوس ...ومقبل اروح ويااا كتله هاي اخر مرة بعدها لا اسحب ولا اوكف الك بمشكله .....مر اليوم عادي ..بين اتصل بعائلتي واطفالي وبين امي واهلي ...واجوي الاقارب يشوفوني ....
ثاني يوم كعدت كلت اروح لامجد لازم ...عيب خابرني ...
طلعت ...صعدت تكسي ..ورحت ..طبيت سالت عنه ...شو محد عرفه.....فتر راسي شنو معقوله غلطت ..بلعنوان ..طلعت ..الموبايل ...دكت عليه...جاوب كتله يمعود اني يمك انت ..وين كال هاي شنو تعال لقسم الموسيقى كبل ..هذول الحراس مطفين .....تعال تعال انتظرك باب القسم ....والله دخت ودنيا حارة ...سالت مجموعه شباب عن قسم الموسيقى ....
اشرولي ...ليجوة ...اني هم مشيت لحد ماقريت القسم ..
طبيت سالت عنه ...محدعرف ..دكيت عليه
كتله متكولي شنو سالفتك انت
ههههه ليش ....
ماكو هياني كدامك ...
اني بتسمت ..ورحت سلمت عليه وحضنته ..
ضلينه نسولف كال تعال تعال بسنتر ..
شويه هوى بيها ...
حنه كعدنه ...
كلي سولفي شصار مصار منك ...
كتلة والله نفس الحال حتى بيت اهلي نفسة لا جديد ...
واملاكم ...
بعدها الحمدلله ...
نعمة من الله لوما هنه احنه نتبهذل ...
الله يزيدك ....
هوة انت جنت الصراف مالتنه ...
ضحكت هااي بعدك تذكر ...
باوع ع الساعه كال يلا موعد المحاضرة مالتي ..
كتله المهم شفتك اترخص اني ...
شنو تترخص امشي ويايه ضيفي انت تعال اعلمك العزف ...
لا خاف ..شتخاف امشي ...
طبينه للقسم طلاب وطالبات ...كعدت
بدة شرح ..اني حسيت بلملل ...بس انتظرهه يكمل اريد اطلع ...
كال ويايه استاذ ..فنان اسمعو منه العزف راح نترك الشرح ..اني خنزرت عليه ..كتله شلك بهلسالفه .هز براسه اعزف ...اخذت الكمان وعدلت كعدتي ...وغمضت عيوني وبديت اعزف ....اسمع صوت احد يصفك ..رفعت راسي ...
اشوف بنيه ...تصفك من دون الكل ..من باوعت عليها ..حست بخجل وكعدت ...لكن منتبهت عليها ..لان بعيدة ...لمحت حمره حمرة ....كمل الدرس وتشكر مني استاذ امجد ..كتله نشاوف غير يوم اني باقي اسبوع..كلي دقيقه ...بس اشوف ...التليفون طلع بلباب
...اجت البنية الي صفكت ...وكفت بصفي وحجت بصوت ناصي ...كالت
انت استاذنا الجديد ...
اني درت وجهي ...
ضليت صافن بجمالها ...العيون الكبار السود وووالحمرة الحمرة ..
عادت السؤال
كتلها نعم ...
كالت انت راح تجينه بدل استاذ امجد راس البامية ...
اني ضحكت ..كتلها هذا استاذج ومحلو تكوليين عليه هيج ..
اي اي ..صح ...اني اسفه ..بس متجينه بعد ..
كتلها لا ..اني ضيف ..
اهاااا ..عبالنه نخلص من الباميا ...ونبلش بلتفاح ...وعافتني وراحت..
اني ضليت صافن ..ع جرائتها الممزوجه بمرح ..وجمال رووح ..صدك تلفت الانتباه ...بكل معنى ..
اجه امجد ودعته وطلعت ..اشوفها باب القسم وي صديقاتها تسولف والشمس ...تعكس ع شعرها ...صار لونه مثل الليل ....وتاشر باديها وكانما طيارة دطير وتضحك ..صوت ضحكتها ...عالي لكن اشبهه بنغمه موسيقية ...ثواني وحسيت ع روحي تعوذت من الشيطان ..وطلعت....
وللحكايه بقيه ..
