طلعنه من العيادة واني ممهتم ..للدكتور وكلامه ....
ومتأكد اني مو مريض بس اريد فترة حتى اثبت صحه كلامي ....مهند جاب علاج الي ...كومه حبوب وادوية ..
قريتها كلها حبوب ..حاله نفسيه ...بعد فترة ...بديت ادور ع سهر ...اول شي ..ادك ع امجد ماكو ..مغلق ...
...طلعت رحت ...للكليه ...
سألت عنه ..نفس اول يوم من رحت ...محد يعرفه ...
زين شون استاذ ...وماكو ...كلبت الدنيا بس الاجابات دائما مجهولة ...حتى سهر ..ماكو هيج طالبه ...
بديت اتعب ...رحت للمصور ..كتله بهيج يوم طكينه صور يمك ..كال اذكرك انت وبنيه ...اني ماطك صورة لشخص ..اذا ماذكرهه ..كتله اي اي اريد ...الفلم اروح الك فدوة شغله حياه او موت ...
كال ..اخي انتو ورة يومين سحبتو كلشي حته الفلم ..
اني
ماذكر منو ..
بس حته الفلم انسحب ...
وكعد يدور كال صح ماكو حتى الفلم ...
بعد ماكدر اسمع شي ولا كاعد افتهم ..اني مخبل ..لو عاقل .ونصب عليه ..
رجعت ...
وكمت اكتب كلشي يصير ويايه حتى لا انساه ...
هنا كمت اشك بروحي مريض ...وهذا وهم ...
وهم طلعت ادور ...رحت ..للسيد بس مالكيته ...لان لا اعرف اسمه ..ولا شي ...والبنايات تشابهه
هناك واني امشي طبيت ع ابو الذهب كعدت يمه ...
بس مو هوة الي باع النه ...
كتله احنه قبل مدة اشترينه منك ذهب ...
وواكيد الوصولات يمك...
كال اتفضل ...
انطيني اسمك ..
والتاريخ ...
كعد يدور ..
انطاها الي ...
صح مشتري اني بس الوصولات بأسمي ماكو شي يثبت وجودها بس دماغي ...
كلي تعال باجر ..صاحبي يجي ..واساله
طلعت منه ..تعبان كلش ...
هم .صار المرقد بوجهي ....
كلت خلي ازور ...مشيت ..سلمت الفون ..
وطبيت للتفتيش ...
ومشيت ...بلحضرة ..لحد ماوصلت ...
قريب...
اول مصار الضريح ..بوجهي بجيت ...
والناس تباع عليه ...
وصلت ...للشباك..
ضليت لازمه واشكي ...
يارب ماريد شي ..بس اريد ..ارجع لعقلي راح اتخبل ...صدك ...
ضليت لازمه وابجي ..بصوت عالي ...اجه ..رجال جبير ..كلي ابني الله يفرج عنك ..انخه ابو الرضا مايرد احد ...
على كلامه كمت ابجي اكثر ..مضل شي اسوي غير ..الدعاء ..طفت ...الحضرة ...
ومشيت شويه ..وكعدت اصلي ...
وادعي ربي ياخذ حقي من الي دمرو حياتي ...ان جانت موجودة ..او اذا لا ..الله صدك اريدة يشفيني ...
قبل لا اطلع هم رجعت زرت ..حسيت روحي ارتاحت ...
رجعت للبيت ...
حجيت لامي شون زرت ..وارتاحيت ..هناك ...
اجه مهند طلعت الوصولات ..كتله شوف اني ماكذب ..
كلي وشفرق هسة ..سهر وينها ...كافي عمار ..
ادور انسى .الي راح ..وانت بديت ترجع لصحتك ..عمي حتى الفلوس منريدها طبها مرض ..ماتحمل اشوفك هيج ضايع ..بوهم اسمه سهر ...
ماكدرت اجاوب ولا انفعل بشي ...
كمت اخاف لا انشمر ..بلمصح العقلي ...
هزيت براسي اي ...
محد بقى يمي ...بس امي ...الي وكفت وياه ..
زينه كسبت ..دعوة الطلاق ...
شكد حاولت وياها ..مقبلت ...
واخذت الاطفال مني ...حتى شوف ماشوفهم ...
بيتي الي بلخارج العراق وكلت مهند وباعه ...
وزينه رجعت يم اهلها ..بعد ماخذت مبلغ ..مني ومن مهند ..حتى تعيش حياتها ...
مرت فترة ...واراجع .الدكتور ..ويغير بلعلاج ...لان بديت اقنع اني عايش ..قصه من خيالي وماكو صحه لوجود سهر ...
مشت الايام ...
اني ضايع ...هاي الفترة ...بين حب ..وبين ...جنون ...
اريد انزل للكاع ..بس اعرف اني عاقل ..لو مخبل ...لازم اكو دلليل ...هاي الفترة اصعب شي مر عليه ...
احجي محد يصدك ..لا قيمه ولا قدر ضل عندي ...
بقيت اني والجكارة والكاس ...ضعت ..ضعت..يوميه اشرب ...لحد ما افصل ..وياريت لو اشرب ..وانسى لا شكو ...ذكرى تصير كدامي ...شكو كعدة وسالفه وي سهر تمر بعيني واتخايلها يمي وتحاجيني ...وفز واشوف روحي وحدي ...
فديوم ...اجه مهند وشافني اشرب ...
مهما يكون اخو الجبير اني ميكدر يسوي شي ...
كال اصحى ..وين وصلت روحك اصحى ...ع نفسك ..انت ضعت ..واني من باجر ..طالع من هذا البيت . امي تمرضت من وراك ..اطفالي يخافون منك ...مرتي ...تخاف ..حتى اني كمت اخاف ..كوم ..لا ضل هيج ..سكير راح تموت عمار ..حجايه مني ومنه ..ضربته ...
من ضربته طلعت امي واستبرق ...مهند مسوهه شي اخذ مرته وجهاله وطلع من البيت
امي ضلت تلطم ...وتبجي ....يمه ولدي ضاعو ..يارب دخيلك ..الطف بينه ..اني هنا صحيت ع نفسي ..رحت يم رجل امي كتلها يمه صدكين بيه..كعدت يمي بلكاع كالت اي يمه ..ليش هيج عمار..
كتلها اني زوجت سهر ...
كالت ايي .
وينها ..
كتلها باكتني ...ونهزمت ..اكيد ..
يمه عقلي ..مديصدك اني مريض ..ذبوني بشارع ..بمصح ..ماكدر اصدك ..حضنتني دخيلك يارب ..يارب الطف بينه بعد ماتحمل ...راح اموت ربي ..
ضلت تعيط ..اني ابجي ..
كمت كسرت الشرب ..والكلاص ...اني مريض صح ...
بس مو انفصام ..
اني مريض بسهر ...
احبها افتهموني ..احبها ..وكعدت اضرب ع راسي . اريدها ..احبها ..ضعت ..بدونها ..ماعرف اني منو يمه ....جيبيها الي واخذي عمري كله ..اخذو فلوسي ..ماريد شي .
اني مريض ومرضي اسمة سهر ....
وللحكايه بقيه ..
🌹😘
