Dating My Ex

Ex.11

Past vs. Present

"Eh baka naman may crush lang sayo.."

Tiningnan ko si Lexy habang pinapatuyo ang buhok niya ng towel sa harap ng salamin.

"Hindi eh. Iba siyang makatingin. Parang kilalang kilala ako, parang si Rye."

"Eh di ba hindi mo nga kilala si Rye, sabi niya! Tsk, wag ka na kasi mag-isip ng kung ano-ano. Magfocus ka na lang doon sa pageant mo. Mamaya matalo ka pa dun, sige ka." Banta sa akin ni Lexy, bigla naman akong nag-alala at kinuha agad ang usb microphone sa harapan ko at pumili ng kanta sa Smule app ng phone ko.

"Ayoko sana, na ikaw ay mawawala.. Sino ba naman ako para pigilin ka.."

Buong puso akong bumirit habang walang tigil sa paghagikgik sa pag-tawa si Lexy, usually may bayad ang performance ko pero dahil sinusuportahan naman ako ni Lexy, maari siyang makinig.

Sa mga sumunod na araw, panay ang pag-eensayo at pagdadiet ko. Hindi ko alam kung sinusuportahan ba ako ni Mikel o sinasabotahe dahil laging merong pagkain sa lamesa ko kahit wala siya sa opisina. Dahil marupok ako sa tukso, kinakain ko naman ang mga iyon saka isa pa, sayang, maraming nagugutom ngayon kaya hindi maganda yung nag-aaksaya.

"O, ayan, hiniram ko iyan sa pinsan kong fashion designer. Ang ganda di ba?" Pagmamalaki ni Kristel sa kulay dilaw na serpentine gown sa aking harapan. Backless iyon at merong makikintab na swarovski crystals sa laylayan na tuwing lalakad ang may suot ay kumikislap iyon.

"Saka yung makeup artist mo, ako na lang ha. Mag-beauty rest ka mamaya kasi baka hindi kumapit ang make-up bukas kapag stressed ang skin."

"Oo na, oo na. Kristel, tiyak kong mananalo ako bukas." Pagpapanatag ko sa kanya. Ako nga ang nangunguna sa Facebook likes dahil pati mga ka-baranggay nila Jax, Kristel, Yuri, Eric at Paolo na nahikayat nilang iboto ako.

"Siguruhin mo! Kapag hindi, sisingilin kita sa serbisyo ko sayo, baka hindi mo alam na kinailangan ko pang magpasoftdrinks doon sa nagpapa-liga sa Purok namin para buksan nila ang Facebook nila at i-like ang litrato mo."

"My gosh! Kaya pala dumami ang friend requests ko."

"Ayan ka na naman, nagpi-feeling!"

Nagtawanan kaming dalawa pagkatapos. Nagpapasalamat ako sa presensya ni Kristel at ng mga bago kong kaibigan. Sa totoo lang, ilang araw na ding nananakit ang ulo ko, hindi ko alam kung dahil ba iyon sa pagbabawas ng pagkain o dahil sa pag-iisip kung sino ba si Victor Lo. Unti-unti ay naniniwala akong pamilyar ang mukha niya, o baka napapaniwala ko na lang ang sarili ko.

Wala akong halos tulog kagaya noong mga nakaraan. Gusto ko mang tanungin si Mikel pero kahit papaano ay dumidistansiya ako dahil ayoko nang maulit ang panunugod sa akin ni Scarlette. Ayoko na ding paasahin ang sarili ko sa kanya.

Dumating din ang araw ng pageant. Hindi regular ang pasok sa DVC dahil merong event ang opisina, lahat kami ay nire-require na pumasok nang alas-kuwatro ng hapon para umattend sa anniversary program ng opisina at sa gabi ay gaganapin na ang Miss DVC. Nag-park ang aking sasakyan sa halos mapuno na parking lot, mula sa labas ay maririnig na ang musika na nanggagaling sa loob ng gusali. Isa nga itong hindi pangkaraniwang araw sa DVC.

Kinuha ko ang box na naglalaman ng gagamitin ko sa talent portion mamaya sa likod ng sasakyan. Ang baton twirling sa saliw ng awiting Halik na ako din mismo ang espesyal na kakanta. Dapat nga ay may fire dancing kaya lang baka daw mag-activate ang smoke detector ng opisina at mabasa kaming lahat, masyado ng giveaway kung may shower scene pa ang talent portion ko.