حكايات من بيت جدي

٢١

وليد: تنهيده طويله احس جسمي ميحملني هلكد اني ضعيف بحبها شنو الي بيها ما لگيته بغيرها شنو الي جابرني اتحمل لوعة قلبي جان بداخلي احساس يخليني اشتهي اصعد  اطلع روحها حتى انهيهها من حياتي بس الي خفف ناري الضعف والالم الي جاوبتني بي دكات قلبي سريعه ووسواس دمرني اريد اروح اكسر راسها   بدون ميرف قلبي عليها ،شلون خليت قلبي
ينذل وين عقلك جان وانت تعرفها وتعرف عنادها وراسها الگوي
يا الله احس دماغي راح ينفجر شنو الي يشفي غليلي بيها مشيت كم خطوه بتثاقل احس جسمي ينفض نار ورجلي مخدره
ذبيت ثقل جسمي على المرجوحه اريد استوعب الي سمعته منها والموقف الي خليت نفسي بي استغفر الله يعني من دون الناس احب وحده مخبله ما براسها عقل ولا ذره دماغ ،،بس الي شفته بعينها حب وجرح ودموع
ابتسمت تأخرتي لحد ما اعترفتي جنتي منتظره اتنازل وتنازلت وهم ما ريحتي قلبي ولا ريحتي قلبج حق عليج العقاب بدون ما قلبي يأنبني اتحملي الي راح اشوفي والي خليتيني اعيشه سنين  راح اشوفج قسوه بحياتج ماشفتيها مني ما انتهي منج ولاقلبي يرتاح الا يشوفج تتعذبين وتنگلب  عليج الايه بعيني يا مريم
كمت مرتاح لان عرفت الي راح اسوي واخذ بحقي منها على الي حجته هسه والله لا اطلع روحج مثل ما مطلعه روحي دورت عليها جوه ماكو صعدت دكيت باب غرفتهن
فتحته عذراء شفت مريم دتبچي، بقلبي حلو ،عذوره انزلي اريد احجي ويا مريم شفتها تمسح بدموعها .
مريم : ماعندي حجي وياك .
عذراء : حسيت الوضع متوتر  طلعت من الغرفه ونزلت قبل ما افتهم الي صاير .
وليد: لا عدنا حبيبتي انت تحبيني مثل ما اني احبج ولاتنكرين حالج يثبت كلامي وهالدموع اكبر دليل
مريم : بقيت ساكته احس ما بقى عندي عقل ولا اعرف اجاوبه
اريده يرجعلي وادري نهيت اخر امل استسلمت لكلامه ،شتريد مني فهمني .
وليد: اريدج تطلعين احلى وحده بيوم خطوبتي اكيد راح تحضريها لان محلوه بحقج يگولون ما حضرت مقهوره لان عافها وخطب غيرها
مريم : احس الدموع نزلت نار وقلبي يرجف من قسوته مستحيل هذا يحبني لو شكد ااذي يأذيني اكثر ) تدري شكد اكرهك .
وليد: ادري قلبي اني هم اكرهج ومره قبل سنين گتلجياها ، هسه اخذي راحتج سديت الباب وتوجهت لغرفتي اعرف الي بيناتنا انتهى بس ليش فرحان واحس مرتاح (هذا الي جنت تريده تعرف هي تحبك بنفس الدرجه وشنو الفايده انتهى كلشي كبريائي وكبريائها خسرنا  حب سنين حسيت على قلبي هالمره ما ضعف ولا انقهر من شاف دموعها ،يعني بيك امل تنساها  قابل الي خلقها ما خلق غيرها على گولت سلوان الگلب  الي يحمل وحده يحمل الثانيه
طفرت سحبت جكاره وورثتها   كعدت ادخن ما بالي اي افكار راسي فارغ ما ادري شكد مر عليه وقت واني بهالصفنه لحد ما انتبهت على النفاظه مليانه واني اطفي اخر وحده جانت بأيدي رحت تمددت على فراشي احس  بتعب وراسي ثگيل فاقد الاحساس بجسمي غمضت عيني وسحبت نفس مهموم وزفرته لدرجه حسيت بدوخه  وكلشي صار اظلم الم براسي قوي فتحت عيني غواش كأنه دا افتر لو الغرفه تفتر بيه رجعت غمضت واتنفس بتسارع گمت من فراشي بصعوبه نزلت ناديت على عذراء تجيبيلي
حبايه وجع راس لزمني صداع قوي
عذراء: اخاف ضغطك مرتفع خلي اقيسه اكعد بالهول بين ما اجيب الجهاز
وليد: يله انتظرج .
عذراء: مدا ايدك خليتله الجهاز لكن باين من وجهه تعبان
؛ما اكدر اسأله اكو شي بينك وبين مريم خلاك تصير عصبي   استحي منه ؛
ضغطك  مرتفع يمكن تعبان لو بسبب التدخين وانت عندك مشكله بالجهاز التنفسي تأثر عليك انتبه لا تدخن اليوم هسه اسويلك عصير ليمون حتى ينزل  تمدد هنا دخلت امي
سعاد: شبيك ماما
وليد: مابيه شي بس مصدع تمددت على القنفه .
سعاد: من ورا الچكاير وانت عندك ربو والله راح تخبلني انت
صغير متعرف مصلحتك  ابني فدوه لعينك بطلها مو شلعت قلبي
محاسن : شيبطل شبيك بيبي
سعاد: ضغطه صاعد .
محاسن : بيبي انت ليش ما تسمع كلمه كم مره الدكتور ينبهك
على سالفة التدخين يعني انت هيج عنودي ومتسيطر على نفسك  صاير عندك ادمان متكدر تبطلها هسه هي شنو بيها فايده اريد اشوف وانت مجلب بيها  والله جدك اذا يدري بيك ميقبل
وليد: ابتسمت، حسونه يدرون هو وابويه  ادخن من وراهم  بس
مغشمين نفسهم لان يعرفون استحي ادخن كدامهم .
سعاد: عمه ميفيد بي الحجي .
عذراء: هاك اشرب  هسه تصير احسن .
محاسن : روحي بيبي افتحي الباب هاي هويده وسلوان يمكن رجعوا  لو عمج سعد ومرته ،هذا اني اوگف على راسه (يله اشربه كله )
وليد: هاج لخاطرج شربته .
محاسن : بيبي بطل عصبيه بس انت طلعتلي على جدك
مو ذولي ولد عمك مستهدين .
وليد: دخلت مريم حجت ويا بيبيتي ولا كأنه صاير شي اخ يابه شكد گويه ولا ينكسر خشمها خبلتني  گعدت گبالي تگلب بالتلفزيون
سلوان : هلو شكو .
هويده : هلو ...
وليد: لاتبدل امشي نطلع
سلوان : يله امشي سنان رجع لوبعده مرينا  اني وهويده جبناله كيكه
محاسن: اي اخذه بيبي  خلي يغير جو،،لا اخوك اليوم يم اهل مرته معزوم .
مريم : اتونستي .
هويده : اي والله مكانج انت وعذراء خالي سألوا عليكم البنات
عذراء: اي والله اني من تخرجت من المدرسه انقطعت علاقتي بيهن ان شاء الله نعزمهم يمنا بالبيت فد يوم العصر ورا الامتحانات .
مريم : اي  حتى اني هم اعزم صديقاتي .
شهد: صباح الخير
سنان : صباح النور
شهد : حبيبي شكو عندك باجر التزام
سنان : ماعندي ليش
شهد: مو اهلي گلولي خلي سنان يجي يتغدا يمنا
سنان: لا ماعندي شي وحتى لو عندي لخاطرج اعوف الدنيا واجي .
شهد : والله اني هم لو بيدي ما افارگك دقيقه .
سنان: ما بقى شي وتجين يمي واصبح بهالضحكه .
شهد : صدك اليوم اني وعذراءما نرجع وياك بالخط لان اتفقت وياها هسه تجيني نطلع محتاجه كم شغله
سنان: اي عادي اني اجي وياكم حتى ارجعكم .
شهد: لا حبيبي انت روح ارتاح واني ارجع وياها يمكم للبيت
انطيت خبر لابويه وانت ترجعني لبيتنا  العصر
سنان: ابتسمت ما طول بيها تجين يمنا روحي براحتج
شهد: طلعنا اني وعذراء للمنصور اشتري هديه عيد ميلاده
عذراء: شنو مخليه بالج تاخذيله
شهد: والله لحد هسه ممقرره گلت افتر واشوف شنو يعجبني اخذه بالاول نروح لمحلات الملابس الرجاليه .
عذراء: دخلنا بقينا نتفرج على الملابس شفت شهد رفعت  علبه بيها كفلنك ودبوس رباط التفتت مبتسمه
شهد: شوفي هاي حلوه
عذراء: كلش حلوه احسن اختيار
شهد: لعد راح اخذها حتى نرجع تعبتج ويايه عذوره
عذراء: بلا هالمجاملات انت اختي وهو اخويه وثنينكم أعزاز على قلبي اني راح اخذله   ساعة هديه  لان الصدك  ما اخذتها گلت اخاف انت مخليتها ببالج مردت اخرب هديتج بس ماطول اخذتي هاي العلبه  اني اخذله ساعة .
شهد: رجعت ويا عذراء بديت احس بهالبيت واهله قريبين عليه
بمحبتهم وترحيبهم بيه ومشاعرهم الصادقه
ابقى بداخلي احمد  الله الف مره مو بس على سنان وعليهم لان راح يصيرون  اهلي جدو يبقى يسولف ويايه اني وعذراء ويخلوني ويا البنات
اتصرف براحتي كأنه وحده منهم والولد يشاقون وروحهم حلوه ويداهرون  سنان كدامي اما هو يبقى متواصل ويايه بالنظرات من هم موجودين
لكن من نبقى وحدنا اسمع منه احلى الغزل ومشاعر متجدده
جان عاجبني احتفل وياه بعيد ميلاده وحدنا فكرت اعزمه بيتنا
وافاجئه ثاني يوم رجع ويايه لبيتنا
بقى ويا ابويه يسولف بعد الغده بقينا وحدنا
اترخصت منه رحت دخلت الكيكه والهديه خليتهم على الميز الوسط وشعلت  الشموع طلعت ناديته
سنان تعال نكعد بالصاله  اول ما دخل اتفاجئ بالكيكه والشموع وتفاجئ اكثر من قبلته  من خده (كل عام وانت بخير ) ابتسم
سنان: وانت بخير حبيبتي حضنتها هسه عرفت عمري قبلج  خساره .
شهد:  اني هم عمري قبلك خساره يله طفي الشموع حتى تفتح هديتك .
سنان: خليت ايدي على كتفها تعالي نطفيها سوا .
فتحت الهديه عاشت ايدج،التفتت عليها  يعني طلعت البارحه جانت بسبب
الهديه .
شهد: اي صح وجنت مقرره اسوي بين اهلك لكن  خجلت وعرفت مراح اكدر اهنيك كدامهم مثل ما هسه سويت لذلك ردت نحتفل وحدنا سنان شكد احاول اوصلك محبتي لك احس ما اوفيك حقك احبك لدرجه  ما تغمضلي عين الا ورا ما تتصل واسمع صوتك لو هلكانه من التعب كلامك يريحني .
سنان:ابتسمت ، اليوم تغردين حبيبتي شو من اجيبج يمنا تگضيها ويا عذراء وخدودج حمر من الخجل راح اگلب اني بعد اجيكم حتى ابقى اسمع هالكلام الحلو .
شهد: ابتسمت بضحكه يمكم  احس كل الموجودين منتبهين  عليه ويحسون بنظراتنا فالتهي عنك ويا عذراء حتى اخفف من ارتباكي .
سنان: كلك على بعضك حلو والاحلى الخجل الي بعيونك   هاي الاغنيه انكتبت على وحده مثلج رفعت ايدها قبلتها  هالسنه عيد ميلادي حلى بيج ان شاء الله من نتزوج تشاركينا   احتفالنا بعيد ميلاد كل واحد من عدنا بليل نلتم كلنا بالهول الفوك يفاجئون صاحب العيدميلاد بكيكه وبالهدايا من ارجع للبيت اليوم يحتفلون .
عذراء : لليل الكل التم بالهول الفوگ ننتظر سلوان ووليد الى  ان اجوي
سلوان : ها ساعة ١٢ الا ربع ومرتي كاعده لعد يوميه اسوي لواحد منكم عيد ميلاد
مريم : والله بقت تغفي على القنفه وكل شويه تثاوب .
هويده: ضحكت ،ها بديت تذمر والله من قبلما تاخذني  تدري بيه بعد ساعة عشره ما اقاوم  بس بيوم عيد ميلاد واحد منكم اجبر نفسي شربت گهوه يم بيت جوان لان ادري ورايه سهر
سنان: يله لعد جيبو الكيكه حتى  تروح تاخذ راحتها .
وليد: امممم  والله شكلك بعد متعترف بكيكتنا اظاهر اكو ناس اليوم مسويلك عيد ميلاد ودتجاملنا تريد أتفضها .
عذراء: راح انزل اجيب الكيكه .
هويده :  بعد ما انتهينا من عيد ميلاد سنان وقدمناله الهدايا ،كعد بصفي سلوان .
سلوان : اليوم ماكو نوم بداعتي خلي نسهر  على فلم وباجر نضرب الدوام 
هويده : لعد خلي انزل اسويلي گهوه حتى اصحصح .
سلوان : اني هم سويلي وياج .
هويده : ورا ما كل واحد راح لغرفته نزلت سويت گهوه وصعدت لگيته فاتح مجر الميز يقلب بالكاسيتات  ،خليلنا  فلم حلو ما بي دم ولا اسلحه  ابتسم
سلوان : عبالي اطلعلج القلب الشجاع
هويده : حتى اروح انام .
سلوان : لا كذب اختاريت هذا
(My Best Friend's Wedding) بطولة جوليا وكاميرون وديرموت
جان اختيارغير  موفق ما ادري بقصته رجل بين امرآتين يحبون البطل لكن هو معتبر وحده صديقه ويحب الثانيه
من سمعت تذمر هويده مقهوره على البطله لان البطل بتصرفاته خلاها تتعلق بي وقلبه ويا غيرها
اتضايقت احجي  ويا نفسي (بس اني احب هويده ما كاذب عليها )
هويده : وين صافن يله قلبي كوم شيل راسك من رجلي خليني اروح انام
سلوان : خليج شويه بعد ويايه، هويده شكد تحبيني .
هويده : ما اعرف بس صرت اقرب واحد الي حتى من امي وابويه  واخوتي .
سلوان : هويده انت تحسين اني بعيد عنج ولهذا  متفكرين بأمور تقربنا مثل هالكعده .
هويده : احجي الصدك اني ادري انت عندك علاقات ولا تتصور  ما اغار عليك بس اعرف اذا احجي واغث نفسي ميفيد اذا مو من ذاتك تترك هالامور لذلك عايفتك براحتك اگول بلكت نتزوج ساعتها تتغير و تكتفي بيه
سلوان : اتفاجئت والمفروض ما اتفاجئ لان اعرفها ذكيه ومتنطي بنفسها يمكن اليوم تأثرت  الفلم وحجت هالكلام
راح اكلج شي ماكو وحده غيرج بعقلي وقلبي انتِ ظالمتني يمكن قبل لا جان عندي بس هسه  مبالي هالسوالف سحبت كف ايدها اقبله  عندي مره حلوه وادري ما بقلبها غيري لج بابا انت النفس الي اتنفسه كعدت جريت راسها على صدري وخليت ايدي على چتفها اللعب بشعرها تدرين انت الوحيده الي ما اتحذر بالتعامل وياها وعندي  ثقه عمياء  بيها  انت تربيتي جوه عيني
ومن احنه صغار قريبين على بعض لان واحد يفهم الثاني هويده نمتي
هويده : مغمضه بس دا اسمعك حضنته يله كمل لاتسكت لحد ما اغفى وخر ايدك خلي انام على چتفك
سلوان : گومي نامي كافي تعبتي ادري بيج .
هويده : احجي الصدك ومتزعل بعد مدا اشوف من النعاس .
سلوان : ههههه نيالج هويده هذا دليل انت مريحه راسج وما بالج هم ولا تفكرين بشي .
هويده : اذا افكر بس اتعب لا فدت ولا استفدت لذلك ما ادوخ روحي
باجر فدوه لعينك لحد يكعدني الا اني اكعد اعتمد عليك ماتخليهم يصيحوني
سلوان : لا ما اخليهم بس يجوز اني ما اتحمل اشتاقلجواكعدج
هويده : لا متسويها قلبك مينطيك حتى اسهر وياك يوم الخميس، اشبع نوم الظهر واكعد اكابلك الليل كله .
سلوان : يله روحي تصبحين على خير .
هويده : وانت من اهله انت هم روح نام بطل سهر .
مريم : مرت الايام وتحدد موعد المشيه بيومها من هلكد  ما قلبي محروك ودموعي ما وگفت من عرفت راح للحلاق  دخلت لغرفته لگيته معلك القاط الشيطان لعب بعقلي شفت بالنفاضه گطوف جگاير اخذت وحده نزلت جبت الجداحه وشغلت الجكاره وخليتها على ردن الستره انزرفت صح المكان ميبين لكن ارتاحيت من خبثت اتوقعت بيومها مراح ينتبه لكن من رجع وصعد يغير ملابسه جنت واگفه باب المنور سويت نفسي طبيعيه بس بداخلي دا احترگ احس روحي راح تطلع خلص ماكو اي رجعه  بعد النا ولا اكو امل يرجعلي حالة القلق تخليني لا اراديا اطلع حرگتي بالاكل
جنت واگفه على الطباخ  ما حسيته الا واگف ورايه
وليد: جان المفروض تزرفين كل القوط حتى ما تخليني اروح ( التفتت )
مريم : يا قوط
وليد: ابتسمت القاط الجديد مو انت الي زارفته  ترى حافظج واعرف سوالفج بس بعد ميفيد كله من ايدج لا تغيرتي ولا راح تتغيرين واني متفيدني غير انسانه قويه لا تفكر بكبرياء ولا بعناد لاخر لحظه اتنازلت وانت نهيتي كلشي بيناتنا ماكو داعي هلكد حاقده عليه المفروض اني الي احقد لان اذيتيني .
مريم : انت هم مقصرت  روح الله يسعدك ..
وليد:  تنهدت ان شاء الله بس تبقين انت بت عمي وعزيزه عليه حتى اذا مصار نصيب بس اكو دم يربطنا .
مريم : طفيت الطباخ وطلعت من المطبخ وصعدت للغرفه
ما اريد اشوفه ولا اشوفهم من راح يطلعون الغريب لان عرفت بي ما فرحان  حتى دموعي ما نزلت من عرفت طلعوا  بقيت افكر بكلامه واجاوب نفسي
صح اني الي وصلته لهذا الطريق و صح اني عنوديه ومو قويه
حبه جان مصدر قوتي وهسه احس نفسي ضعيفه اني غبيه واستاهل الي دا احس بي  على الاقل احاول ابين نفسي طبيعيه .
وليد: كل العالم بيوم خطوبتها أضوك طعم الفرحه والراحه الا اني من ليلة البارحه لليوم  مشايف النوم مدري انقهر  على نفسي الي اتمنيتها مصارت الي ،ما ادري افكر بيها شلون راح تتحمل الموضوع ،بعد ما تأكدت  من حبها الي احس روحي ميت ما اله رجعه للدنيا  دنيتي هي وسنين عمري وفرحتي كلشي صار صعب لا اكدر اخذل البنيه الي فاتحتها بموضوع الخطبه واتراجع ولا اكدر ارجع عن قراري لان ساعتها اعرف لازم ابقى اتنازل العمر كله
وهالشي ما اكدر عليه لان اعرف بت عمي واطباعها حتى لو اخذها مراح نرتاح على هالمشاكل وماكو توافق بيناتنا كل واحد شخصيته تختلف يمكن وصلنا لطريق مسدود قبل ما نرتبط افضل مما نرتبط وننفصل ،ماكدرت ابقى بالبيت بقيت طول اليوم برا الى ان صار وقت طلعتنا رجعت صعدت ابدل لبست قاطي
وگفت كدام المرايه امشط من رفعت ايدي شفت الردن مزروفه نزعت الستره أتفحصت الزرف مجوي ب چكاره على كد الضيق الي جنت احس بي
لكن ابتسمت عرفت هي الي حارگته المفروض انغث منها لكن حسيت بألمها ردت اهون عليها وعلى نفسي الموقف طلعت شفتها مو بالغرفه يم البنات
نزلت واعرف راح الگاها تلهي نفسها بالاكل كالعاده من تكون مغثوثه
لكيتها بالمطبخ مثل ما اتوقعت حجيت وياها قلبي يگلي ارجع وعقلي يذكرني بالعالم البرا  وبالعالم الي تنتظرنا طلعت يم جدي وعمامي بس فكري يمها .
سلوان : ها عريس شبيك معقوج .
وليد: مابيه هم يله ،وصلنا الكل مندمجه تسولف وتتعارف الا العريس شارد الفكر وصدره مهموم فقدت كل احساس بعد ما قرينا الفاتحه اختنگت اريد اطلع وارجع احس مشتاق اشوفها ، لكن صعب عليه التقي بيها بعد ما تمت الخطبه قررت ارجع ويا ولد خالي لبيت بيبيتي ابقى يمهم على الاقل التهي وياهم لليل جبرت نفسي اتصل بلارا كأي خطيب لازم يتواصل ويا خطيبته الو
لارا : هلو ولودي
وليد: يا الله حتى ولودي هم اتذكرني بيها .
الحمد لله انت شلونج
لارا: الحمد لله هسه امك اتصلت وأتفقت ويا امي على موعد النيشان وهالايام گالت نطلع ناخذ الذهب
وليد: ان شاء الله، المفروض اني اجي وياكم؟ ترى ما افتهم بهالامور
لارا: ميخالف وجودك مهم الي بعدني مماخذه  على اهلك انت تكدر تساعدني اختار براحتي بدون ما اخجل .
وليد: ماشي ان شاء الله اجي بعد شكو ماكو .
لارا : هههه ماكو شي سلامتك شو صاير رسمي اليوم ويايه متعلمه عليك تشاقى وتضحك ارجع ولودي  صديقي انسى انت خطيبي بلكت تفك .
وليد: ابتسمت يمكن خجلان ههههه .
لارا : المفروض اني العروس اخجل بس دا اتعامل وياك كصديق بين ما اتعلم عليك صرت خطيبي وهاي مال خجلان ما تدخل عقلي ما ادري بيك
خجول صار كم سنه ما شفت خجل .
وليد: ههههه غير ماخذه عني فكره ، لارا ما تريدين لفه فلافل .
لارا: ههههه هسه رجعت صديقي لا عيب  لازم ابيع نزاكه بعد كدامك مو مال اكثر العمبه شويه السالفه واگفه مابيها نزاكه .
وليد: وينه اشور هسه ويسمعج حتى يبطل يسميج ابو لارا صاحبنا الثالث .
لارا: اسكت قبل كم يوم من رحت للجامعه شفته  زعل گلي جنتوا تستغفلوني اكو حب وعلاقه واني ما ادري
حلفتله والله ما ادري بوليد مخليني بباله، ترى صدك انت فاجئتني .
وليد: كلشي قسمه ونصيب هسه بعد اتعلمي صرتي خطيبتي يعني راح اشوفين غير وجه هههه ترى جنت فري وياج لان حكمج يم اهلج هسه بعد
لازم واحد يتعلم على طبع الثاني راح ابدي احاسب على اللبس .
لارا : لا مو خوش بدايه شكلنا راح نتخارب من اولها لان اني عنوديه وانت متسلط مبين .
وليد: لا مو متسلط بس بعد تنحسبين عليه وما اتقبل استعرض خطيبتي كدام الناس يعني لبس ضيق  ما مقبول وعلاقتج بولد الشعبه تقلليها من انداوم بس اشور عادي لان اعرفه نظيف ومعتبرج مثل اخته .
لارا: اي ابو خالد بعد اوامر ثانيه
وليد:  ابتسمت لا سلامتج من اتذكر انطيج خبر .
لارا : صار احترم وجهة نظرك ما اخليك عرضه لنقد من احد بس انت  هم لا كلش اتصير نحس .
وليد: والله ما اوعدج اختي وبنات عمي متعلمين على نحاسيتي يعني انتي راح تتعلمين عليها شويه شويه .
لارا: والله عاجبني اتعرف عليهن من هلكد ما جنت تحجيلي عنهن احس اعرفهم من سنين .
وليد: ان شاء الله يله اخذي راحتج راح اطلع ويا ولد خالي دينتظروني
من سديت الخط
بقيت اتصل على البيت بلكت هي الي اتجاوب طلعلي
سنان  :هلو ابو خالد ..
وليد : هلو سنان يمك سلوان .
سنان: دقيقه هسه اصيحه .
سلوان : الو ها ولك لازم اشتاقيتلي .
وليد: اگلك شنو وضع الي بالبيت .
سلوان : ابتسمت قصدك بيبيتي لو امك .
وليد: يويل الا  افشلك واگلك اخت مرتك .
سلوان : احترم نفسك لك بعد خطبت شكو تسأل عليها .
وليد: اتنازل شويه عن كرامتك وجاوبني اعتبرني دا اسال على بت عمي .
سلوان : هي هاي المصيبه وله لو غير واحد ادخلك من التلفون امردك
وليد: بداعتي ريح قلبي .
سلوان : انت ريح قلبك وكافي تكمز عادي مابيها شي طبيعيه ما انتبهت عليها لان قبل شويه يله نزلت اتعشت ويانا وصعدت عادي
وليد: هويده محجتلك شي .
سلوان : وليد هويده خو ما تحجيلي عن اختها ووضعها فرحانه لو مغثوثه ما بيناتنا هيج مواضيع .
وليد: ماشي اكلك تعال ابقى ويانا لليل وارجع تتونس .
سلوان: اتونس لو اخفف معاناتك .
وليد: دولي صوجي محترمك
سلوان : هسه ابدل واجيك وضعك قلقني ادري بيك تايه بليايه .
وليد: يله انتظرك ابو قلب رهيف اداوي جروحي .
سلوان : بالخدمه ليش ما اخذك يم فائز ينسيك .
وليد: هههه لا حبيبي خليني صاحي دربكم هذا ما الي بي .
سلوان : براحتك ابو خالد بس وضعك بعده بأوله راح تبدي بالايام الجايه تحس على روحك اسأل مجرب .
وليد: تنهدت لا تخاف بديت ، ما تشوف مكدرت ارجع للبيت  .
سلوان : بس اذا ردت تقنع عقلك وقلبك بلارا اتسيطر وتمشي حياتك لان تلتهي وياها قربها منك بسلا تستعجل بالعقد الا اتشوف نفسك مقتنع تكدر تكمل و ترتاح وياها .
وليد: ان شاء الله يله انتظرك
بعد ايام رجعت بعد ما امي اتصلت عليه وطلبت مني اجي للبيت لان تحتاجني علمود ترتيبات النيشان صح رجعت لكن طول اليوم برا البيت
تالي الليل افوت اصعد انام وبيوم بليل رجعت كلهم نايمين بس ميثم هو الي فتحلي الباب صاحني اتفرج ويا فلم اكشن صعدت ورا للهول نتفرج الفلم
التفت عليه حسيت عنده شي لو بي شي سألته (شبيك) ابتسم
ميثم : اول البارحه هويده عزمت صديقاتها ووحده منهم جايبه اختها اسمها نوران اني فتحتلهم الباب شو اول ما شفتها انعجبت بيها وبعدين جرجرت مريم بالحجي عرفت اسمها
وليد: انعجبت بيها وصارلها يومين على بالك لا قيم الركاع، هههه اجاك السره يا مكرود .
ميثم : ههههه والله يا ابو خالد بقيت مرابط بالباب انتظرها تطلع ومن طلعت صارت عيني بعينها تخربط وضعي ردت استشيرك شلون اكدر اوصللها .
وليد: هههههههه لك والله ضحكتني طلبت الاستشاره من الشخص الغلط يجوز ابو السوس يفيدك عنده خبره بهيج امور يكدر ينصحك اخيك فاشل بالحب تريد نصيحتي انسى شفتها لان تتأذى اذا تعلقت بيها ومصارت الك .
ميثم : لا مو شغلة حب مجرد اعجاب .
وليد: واضح ،من هاي صارلها يومين على بالك ،لك من وجهك عرفت عندك شي ان شاء الله يطلع بس اعجاب، عفيه عائله قلبها مشتغل رماش بس يلتقط اشاره  يچلب   ويرف وارثين الحنيه من ياسر .
ميثم : هههههههههه  الحجي مناضل منا لحد ماماخذ بيبيتي .
وليد: لعد اني من اگلك كلها طالعه عليه غير ادري بقصته والله يا ميثوم سالفتك هم خربانه اروح انام احسن ورايه كعده وودي وجيب اسم الله عود عريس .
ثاني يوم توقعت ما تحضر الحفله ببيت البنيه  لكن من   كعدتني عذراء
نزلت  اتريك  شفتهم بالبيت مشتلين دينظفون كملت رحت للهول ويا الولد لمحت مريم بالگراج دتنظف خطفت من يم الشباك، بعدها طلعنا اني وسلوان تغدينا برا كملنا كم شغله يله رحنا للحلاق من رجعت
ما لگيت بالبيت بس عمتي أمال لان محجبه ما رايحه وياهن للصالون ردت اعرف مريم وياهم لو بالغرفه ؟
صعدت سبحت ونزلت بقيت بالهول  يم جدي والولد وعمامي وابويه .. انتظر يرجعون واشوفها وياهم، اتأخروا صعدت لغرفتي ابدل جيكت القاط هالمره قبل لا اللبسه ، احجي ويا نفسي (المشكله عذراء ماموجوده واروح اتحجج اريد منها شي حتى ادك الباب اشوف مريم بالبيت لو ياهن بالصالون
ما ادري ليش احس بقلق ،لبست القاط اخر شي واگف دا ارش العطر سمعت صوتها هي وعذراء
فتحت الباب بسرعه ما لكيتهن نزلت لكيت بيبيتي وامي وعماتي ينتظروني جوه
اول ما وصلت باب الهول تلكني بهلهوله اخاف اني ما دايخ وراسي صاير طبل فضيتها وياهن بسرعة
(يله خلصتوا) امي نادت  على البنات يله انزلوا راح نتأخر وياريتنا متأخرين  ولا نازله خلت قلبي يدك متلهف والله شوفتها عمر وتردلي الروح
جنت مضيع عيوني ولگيتها حسيت على روحي من لمحتها  ابتسمت
اويلي شلون تستفزني فلا تستحقين الرحمه مريومه  حقدت عليها اكثر من
انثبرت    تنادي على هويده (يله راح نتأخر ) اخ شلون عگربه تلعب عليه  مشكلتها تنسى هي مفضوحه كدامي حافظ حركاتها وتصرفاتها
جاوبتها(اي  والله مريومه استعجليلياهم خطيه لارا هسه تقلق عليه )
رمقتني بنظره صفح ( بداخلي اريد اطگها بضحكه  بلحظتها اجتي فكره براسي ) ثكلت وجهي يله فضوها اتأخرنا طلعنا وصلنا لبيت لارا
اول ما دخلت اتفاجئت بيها شكد طالعه حلوه.