حكايات من بيت جدي

تكمله ج٦٠

سلوان : ان شاء الله يله گومي لا شيطانج يكعد وتبدلين عليه
اول ما حضنت بناتي وتذكرت الايام الي جنت عايشها وياهم بنفس الغرفه والبيت طول الوكت الي اني متواجد بالبيت هم حولي
حسيت بهالنعمه الي نفتقدها والي كان سببها طيشي ونزواتي الي ما حصلت منها غير الندم والتعب اتمنيت يرجع بيه الزمن وأبدي ويا هويده من جديد امحي كل يوم اذيتها وخنتها وماجنت حاسس بقيمتها بحياتي ... حتى هيام الي كدام عيني طول النهار بالدوام تعودت على وجودها وصارت شي عادي بالنسبه الي صار تفكيري كله يم الي خسرتها
اريدها ترجعلي بأي طريقه لأول مره احس هي الانسانه الوحيدة الي حبيتها حب صادق وموكادر ابتعد عنها او أفرط بيها
حنّيت اخذها بحضني .... افضفض عن المشاعر الي كاتمها الها بقلبي وتصدگها
رفعت راسي وهمست هدهد نايمه
هويده : نام سلوان وامشي على الي اتفقنا عليه
سلوان : ابتسمت زين انام بس تعالي نامي على أيدي مشتاق
للشعر الأحمر
هويده : كتمت ابتسامتي ولفيت وجهي على الجهه الثانيه
حتى تعابير وجهي تأخذ راحتها ما ابقى امثل الا اباليه
جاوبته هيج مرتاحه
سلوان : بداعت بناتج انت مرتاحه بعيد عني
هويده : بداخلي لا والله اكذب على قلبي اذا اوهمه أكرهك بس انت تريدني أصير هيج
جاوبته لا تسألني بشي انت خليتني بي انت الي اختاريته فتحمل نتيجته
سلوان : صح بس ذاك سلوان القديم مو هسه الي يمج
حاليا غير وما بقلبه وعقله غيرج
كافي الله يرضى عليج ترى عاقبتيني بما فيه الكفايه
اذا مراح تجين اني اجي
هويده : ابتسمت واكذب اذا كلامه ما حرك مشاعري وخلاني احس شكد اني احبه ومشتاقتله
بس اخاف يحس ويرجع سلوان القديم
حسيت بحركته من السرير غمضت عيني .... حسيت بخياله كدامي
سلوان : ادري انت منايمه افتح عينج بداعت
هويده : مكدرت أكتم الضحكه متعجبه من أسلوبه وطريقه كلامه
فتحت عيني شنو شتريد رفع كف أيدي قبلها
سلوان : اريد ترجعين ويايه للبيت ....وصفحه الماضي نطويها
ونبدي من جديد اذا مو لخاطري لخاطر الجهال
هويده : اخاف وماعندي ثقه بيك
سلوان : انطيني فرصه وما تندمين
هويده : خلي احجي ويا جدي باجر واشوف شنو ينصحني
سلوان : ماشي بس اريد تبقين قريبه مني حتى اكدر انام
هويده : قلبي غلبني وقربه مني ...غلبني كلامه واحساسه حسيت كل الي تصرفاته حقيقيه نابعه من حب واشتياق جنت مفتقدته
على كل المساوىء الي بي بس جنت مأمنه على نفسي بحضنه احسه سندي وسند بناتي بهالدنيا همس
سلوان : والله ما حبيت غيرج انت والبنات كل حياتي
لو تدرين شگد مشتاقلج يشهد الله احس الراحه رجعتلي وانتو يمي
باجر اروح للدوام وارجع الگاج محضره امورج حتى نروح للبيت
بعد ما اتحمل يوم بلياج
وسن: يا زعلان صدك انت تغار هلكد .... لو ماعندك ثقه بيه
لف وجهه رمقني بنظره قريبه للخزره
ميثم : سدي الموضوع اريد انام
وسن : وانت منو وياك متنام اني كلت يا زعلان ما كلت ميثم
يجوز دا اقصد يحيى كتمت الضحكه
ميثم : كلش زين لعد باجر نتفاهم ولا ليش باجر هسه
بعد من اليوم ممنوع شقى ابن عّم ابن خال حتى ولد عمي تتعاملون وياهم برسميات
وسن : يا الله شكد حلو يحيى من يصير عصبي
ميثم : نامي وسن اظاهر انت ماخذه الامور بضحك
وسن : يعني انت من اخذتني تعرف بيه فطيره وأعامل كل الناس بود واحترام وأحب اضحك
اذا أتشوف لان ضحكت ويا ابن عمي معنى جرحت مشاعرك
فهذا سببه شي بداخلك المفروض من اخذتني لليوم عرفت اني شنو وعرفت اخلاقي تفهم الشقى عفوي
واني محترمه غيرتك عليه بدليل من اليوم راح أنفذ الي كلت عليه
بس هالشي اكدر وراك اسوي وامثله كدامك خلي هالشي براسك
المره الي شرفها وأخلاقها مو من ذاتها تكدر تلعب على اكبر رجال وتوهمه بالاخلاق والشرف وتلعب من ورا
اني اريدك تتعامل ويايه بثقه .... الثقه هي الي تخلي الانسان المقابل يمشي صح بدون تخوف من اي تصرف لا يفسر بصوره غير صحيحه
ميثم : كلامها فشلني بس ما كدرت اتراجع او أغير حالتي ....
بقيت ساكت لان الي گالته صحيح اني الي صاير شكاك وماعندي ثقه بأقرب الناس الي وهالشي غلط
مو كل اصابعي سواء ولأ كل النسوان تشابه حسيت هي مقهوره بس متريد تسوي مشكله
تصبحين على خير
وسن : وانت من اهله
سنان: بهاليوم ما كدرت انام انقلابات بداخلي بين تأنيب الظمير وبين قناعه وبين أفكر بأنسانه عاشت بقلبي وفقدتها وبين انسانه
الها مكانه غاليه على قلبي لازم اكون عد حسن ظنها ماطول خطين هالخطوه واختاروا اكمل حياتي وياها
لازم اتعلَّم اعيش بالحاضر واحتفظ بالماضي وذكرياته بقلبي بدون ما اخليها تحس بعده موجود وعايش ويايه
ياربي اني استخاريتك قبل ما أخطئ هالخطوه وانت علمتني بيها خير الي وراحه
اريدك انت تساعدني أسيطر على مشاعري واتعلم وجود مرآه جديده بحياتي الها عليه حقوق
ولازم اجازيها خير وأكون الها السند واعوضها عن الحزن الي شأفته بحياتها لا تخليني اظلمها ويايه وانت تعلم معزتها بقلبي
من باجر أبدي أتقرب منها
وأزح من بالي فكره جنت أعاملها كأخت لازم تتعلم عليه كرجل راح تكمل حياتها ويا بدون قيود بعلاقتهم
فركت وجهي .... من باجر اتجرآ وأبدي ابين الها العلاقه اختلفت
اول ما تصعد السياره
اگلها صباح الخير حبيبتي
_
عذراء: صباح هاليوم جان بالنسبه الي حياة جديده
كعدت بواهس غير طبيعي ... بقيت كدام المرايه غير عن العاده
وكفت كدام الكنتور اكثر من الوقت المعتاد .... طلعت ملابس ورميتها على سريري أيد انتقي شي مختلف
شي جديد يعبر عن هالبدايه الجديده
تسريحه الذيل حصان تغيرت وبقيت شعري مسترسل بعد ما كنت لافته بالرولات الليل كله
اكثر من مره رجعت للمرايه أتأكد من شكلي قبل ما اطلع من الغرفه
حتى ما الي واهس اتريك ... ملهوفه اصبح بوجهه يا الله
شكد جنت اشتاقله اليوم حتى اشتياقي اله غير
قررت من اصعد للسياره أتقرب منه وآشيل القيود .... واگله اني عازمتك بالكافتريا نشرب شي
طلعت .... لگيته كاعد بالسياره ينتظرني ...
فتحت الباب بخجل ... كل الكلام والجرئه طارت مني
صباح الخير
سنان: طلعت الكلمه بسرعة مو مثل ما جنت ارددها( حبيبتي حبيبتي) وااگد على نفسي أنطقها
تالي من شفتها تخربط وضعي وكلت صباح النور
طول الطريق ساكتين
يا ربي شنو هالحاله شبيه مدّا اعرف الگى موضوع وافتحه
نسيت كل المواضيع وهي هم ملتفته على الشباك تتفرج على الطريق الي متأكد حافظته مثل اسمها
ساعديني أتقرب منج انطي خطوه اتجاوز بيها علاقتنا السابقه
ما حسيت الا وصلنا
من انزل امسك أيدها ... من نمشي للقسم
ونزلنا
عذراء: حسيت بي مرتبك ما كدرت افتح حلگي بكلمه لعبت نفسي بالطريق وبالحقيقه مو شايفه شي لان بالي كله ويا انتظره ينطق بكلمه
وصلنا للجامعه اريد أكله خلي نروح نشرب شي مكدرت اذا هو مابادر بأي مبادره تخليني أتجرأ واطلب منه هالشي
حسيت بدا يمشي ويايه بقرب غير عن كل يوم كم مره طخت أيدي ايده بالمشي
ومره حسيت بأصابعه لمست طرف أصابعي بس اتصورتها صدفه
بدون قصد
لكن لنص الطريق گلي
سنان: عذوره اليوم كاعده نشطه حتى مشي تمشين سريع
ترى تعبت على كيفج
عذراء: بألتفته مركزه ويا حديثه حسيت بإيده التفت على أيدي
سنان: هيج احسن حتى أسيطر على سرعة المشي وتبقين ويايه
عذراء: حسيت بقطرات العرق حتى بإيدي وحمره غزت خدودي
خلتني افقد حاسه النطق
معرفت أرد ولا كدرت بعد اخلي عيني بعينه هو هم حسيته ديحاول يكون طبيعي بس مسكنه الايدي بقوه خلتني احس هو هم مثل حالي لكن ديحاول يكسر القيد بيناتنا
قريب ما نوصل للكافتريا گلت يله عذراء هو بادر لازم انت هم تنطي مجال اطلبي منه تكعدون سويه
لكن مسكة ايده خلتني ما اتمني يترك أيدي
الى ان وصلنا للقسم .... التفتت عليه سنان اشوفك بالريست بالكافتريا تدري اليوم طلعت ما اتريگت لان تأخرت عليك خفت عندك محاضرات
سنان: بعد وكت خلي نروح انت آكلي واني اشرب وياج شي
عذراء: يا الله احس اني بحلم راح يغمى عليه من السعاده لو يمكن من الجوع واني ما حاسه اتذكرت اني حتى عشا ما متعشيه حتى الاكل نسيته
رحنا للكافتريا هالمره كعد بصفي بقى يسولف ويايه بمواضيع
ما الها علاقه بينا بس جنت متونسه لان بدا يسوي تغيير
ديحاول يحسسني الوضع بيناتنا اختلف
ميثم : وين صرتي ... مو تأخرت
وسن : دقيقه وأكمل مو رحت على مريم اخذت منها شغله
ميثم : يله انتظرج بالسياره
ورا دقايق طلعت رفعت حاجبي مصدوم بالمنظر
بقت عيني وياها الى ان صعدت بالسياره
وسن : يله ها حلو عليه

يتبع