قصة عائله تمثل حالات من المجتمع بأشخاص وتصرفات وقصص حب اولاد العم وبنات العم .... يسكنون في بيت الجد
حالات اشخاص بين
حب قسوه انحراف اتزان طموح ضعف التزام ديني ... انقلابات ... وفاء غدر
#حكايات_من_بيت_جدي الجزء٥٥ اماسي الليل حقوق النشر محفوظه وسن: هاي صارت ثلاث كلمات ميثم : تمددت على القنفه ... اشرت لهويده تطلع ... بقت تأشرلي وتضحك بنفس حركه ايدي الها ( اخر شي وصلت للباب گلتلي يا مصلحجي ) ابتسمت ورديت على وسن هاي عديتيها عليه بس كم مره صار اجي عليج للكليه متنعد وسن: انت تريد فرصه ... واني محتاجه افكر بالموضوع ... انطيني شهر اقرر وارجعلك خبر ... بس بشرط خلال هالشهر ما اريد نلتقي ... لا بالكليه ولا بأي مكان ميثم : تمام بس هالشرط يسري مفعوله بعد ما تجين واشوفج بالعزومه ...حتى وراها التزم وسن: انت مصر على جيتي ... لكن جديات عندي امتحان وما كذبت من اعتذرت لهويده ميثم : خلص اخذي راحتج امرلج للجامعه وسن : مو اتفقنا قبل دقيقه شهر ميثم : واتفقت وياج اشوفج اخر مره قبل الشهر ... لازم نكعد ونحجي وتعرفين هواي امور تخصني ... حتى من تفكرين بموضوعنا ... عندج معلومات كامله عني ... وحتى على ارتباطي السابق لازم انطيج فكره عن اسباب الانفصال حتى تطمئنين ... من ناحيتي وسن : اتفقنا .... انتظرك شوكت تمر ميثم : اذا عندج مجال باجر عالوحده امر وسن : انتظرك ... لازم اروح يمنا ضيوف ميثم : اخذي راحتج ... ثاني يوم ...كعدت الصبح ... حددت لحيتي دخلت للغرفه ... صفنت بداخل الكنتور ... جريت قميص بنفسجي غامق بي اقلام رصاصي واسود وبنطلون رصاصي .. رشيت العطر ... اخذت محفظتي وساعتي ... نزلت اصوفر ... تلگتني هويده لان باقيه يمنا هاليومين ... شفتها انطت اشاره لامي تنبهها عليه ها راح تشتغليني ... نجاه: لا خطيه گالت شوفي شلون فرحان ... وواكعله الحب لازم اليوم وراك ... شي ميثم : صباح الخير ... اليوم اتفقنا نكعد نحجي ... وطلبت مهله تفكر وترجعلي الخبر ( كعدت اتريگ) هويده : لاتخاف ماطول تحبك ... هسه تتساهل وياك بس انت شويه تنازل واتحمل ادفعك ثمن حب سنين وانت متجاهلها ... هي حاليا تريد ترد اعتبار لنفسها ... وتقنع نفسها متتنازل بعد انت الي لازم تتنازل وتبين حبك الها ... بس قلبها راح يساعدك ميثم : ان شاء الله ... صدك شعندج كاعده من الصبح بناتج نايمات ... هويده : اتصلت اشوف سلوان رجع للبيت بليل ... لان لحد اخر شي جنت كاعده اتصلت بعمه أمال گالت يم فائز ... هسه اتصلت ... طلع ما راجع بايت يم بيت خالته ... يله اني اروح انام قبل ما ست ديم تكعد ميثم : طلعت للدوام ... وعيني على الساعه ... ردت الهي نفسي حتى يمر الوقت ... دخل خضير موظف ويانا ... متزوج نسوان اثنين وعنده اطفال من الاثنين ... بس واحد يسأله شلونه الزواج خضير ينفجر ... بأسلوب شقى ... (يگول حلم وردي تتخيل نفسك مثل السلطان ... بس حقيقته تنگلب مثل ابو صابر تركض صبح وليل حتى تصرف عليهن ... وتالي الليل .. من التعب تفوت تنخمد ما الك خلك حتى تباوع بوجه وحده منهن ... لان اذا ما انخمدت تبدي الطلبات والمقارنات تالي تكب العيطه ...تنهزم تنام ... فاختصرها واروح انام بوجهي ... ) مر الوقت ... بضحك وسوالف .. وشغل ... رفعت ايدي وعيني على ساعتي ... بعد ساعة ونص ... بين ما طلعت .. . انطيت خبر لمسؤولنا راح اطلع قبل ساعه ... عندي شغله الى ان وصلت الجامعه ... مرت ساعة ...بقيت انتظرها بالكافتريا الى ان ... دخلت عيونها تتلفت ... حسيتها مثل الگمرالي يمحي ظلمه الليل قلبي گام يعزف سنفونيه فرح ... مشاعر حب مراهق ... غايه اماني بهاللحظه ...يحرك خصله شعرها الي نازله ... على جهه عينها ضايقتها بالنظر ... مشطتها للخلف ... بأطراف اصابعها كأنه تريد تتأكد شعرها مرتب ... متدري قلبي يتمنى هي حلالي ... وابعثر شعرها التقت النظرات وبانت ملامح الخجل ... خطواتها بطيئه بأتجاهي والابتسامه باينه بالعيون قبل الشفايف ... تأكدت شكد جنت اعمى قلب وعين ...الي هالبنيه كدامي سنين ... وجنت ما اشوفها ... جمال وبرآءه ... خجل وتواضع تجربتي الفاشله علمتني ... اشوف الي بالقلوب وما بداخل الانسان مو الشكل والظاهر ... حتى احكم صح وهذا السبب ... فتح عيني على وسن ...شفت نظافه روحها وسن : هلو ابقى كاعد ... لا توگف ميثم : عبرت عن مشاعري بكلمات اني نفسي تفاجئت من الجرأه الي عندي وشكد متغير ... جلست كدامي حبيبتي انت من قبل هيج حلوه ...( رفعت وجهها متفاجئه بكلامي ) وسن : ابتسمت شكرا ... وانت من قبل هيج جرئ جنت متصورتك هادئ و ميثم: بعدني هادئ وثگيل هاي الي ردتي تگوليها وسكتي ... وسن: انت متغير ... وقصدت من سؤالي عندك علاقات؟ ميثم:لعب ماعندي ...لكن حبيبه عندي وكاعده كدامي وسن: ارتبكت بخجل ... لا اتصعب الكلام عليه .. اترك مشاعرك هسه وخلينا واحد يتعرف على الثاني ميثم : عدلت كعدتي وسندت ظهري للخلف ... خليت رجلي على الثانيه وريحت كفوف ايدي على ساقي ... اسألي واني اجاوبج بالتفصيل وسن : انت اخذت طليقتك عن حب ... وبالنهايه انفصلتوا ميثم : راح اجوبج مو بالتفصيل لان مراح اذكر شي يخص نوران ما يجوز اطلع اسرارها راح اذكر الامور من جانبي بعد ما انتهينا من الحديث ... ودعنا بعض ... على الاتفاق ... ما نلتقي شهر رجعت للبيت ... استقبلتني هويده ... تريد تعرف التفاصيل ... قبل ما ترجع لبيت عمي هويده : وهاي انت صدك راح تصبر شهر .... اشك ميثم : ابتسمت ... لا اتفقت وياها لان گلتلي اذا ما مشيت بالاتفاق ... اعتبر الرد رفض هويده : ها لعد ... اتحمل يا عاشق اني اروح لبيتنا ... رجعت للبيت ... لكيت سلوان بعده ما واصل .... بقيت البنات يم بيبيتهم .... وصعدت ديم انيمها ... اتمددت ويا الطفله على الفراش ... إجى على بالي كلام امي ... (ميصير تخلي يبات برا البيت او يطلع او يتأخر بدون ما تعرفين وين يروح رجلج... يشتغل بمكان زين ... لا تجي وحده تاخذه منج ومن بناتج .... ) احجي ويا نفسي ... (ليش هو اصلا الي ... الكل ما يفهم الي بداخلي ... ما يعرفون الي بيني وبين سلوان مثل الجبل والوادي ... كل واحد من عدنا محتفظ بداخله بأسرار ومشاعر ... نخفيها عن الكل ... ياريت اكدر أفصح عنها ... ياريت اكدر ابوح لاحد بدون ما أتلقى الملامه ... من تزوجت لليوم ما عشت الامان ولا الاستقرار ... دائما عندي تخوف من علاقتنا ... الي تشوبها كل هالثغرات والاختلاف ... ولشوكت تبقى صامده لحد الان ... محد يعترف انجنى عليه بهالارتباط ... خسرت هواي ... واهمها راحة البال الي أفقدها بكل مره يخذلني بيها سلوان ... واقنع روحي ... استمر واعيش لنفسي واحسب لكل التوقعات ... حتى لا يجي اليوم الي انصدم وانكسر بي .. واعرف هالرجال قلبه مو ويايه ... بمكان ثاني من اول ما اتزوجنا اعترف بهالشي بدون وعي ... من يومها عرفت الثغره الي بيني وبينه سببها امرآه لليوم قافل قلبه عليها ... وما كدر يطلعها منه وبسببها ماكدرت احب سلوان واتعلق بي ... والي يربطني بي دم وعشره واطفال.... وصلتي مرحله تكذبين حتى ويا روحج .... لاحبيته واتعلقت بي ... من اول يوم عقدنا وبعد ما صار اقرب شخص لقلبي ...بكلمه غير مقصوده منه ... ذبحني وكسر قلبي ...اكذب من امثل الااباليه بمشاعري تجاه سلوان كدام احد .حتى ابقى ابين قويه واكون اني الي ظالمته مو العكس . تعز عليه نفسي ... أفصح عن انكساري والالم الي عانيته ... من حبي اله كدام احد حتى اقرب الناس الي ... حاولت أكسبه واخلي يحبني .. ماكدرت وصلني مرحله ... دست على قلبي وحبست الدموع بداخلي ... ويا كل خيانه يجلد قلبي عليه ويقوي سمعت صوته وصوت سنان ...التفتت على ديم نايمه ...خليتها بفراشها ونزلت .... دخلت للهول سلوان كاعد ومخلي البنات كل وحده على رجل ... ويسولف ويا خاله وسنان السماعه بأذنه فهمت ديتفق ويا عمي معن هو يوصل عذراء سلمت ...كعدت على القنفه مقابل لسلوان ... ادرس حركاته ..اول مره لمحني من رفع راسه عن خد ريم المره الثانيه انتبه عليه ... من ديسولف ويا سنان ... على سفر عذراء ابتسم ... اشرلي تعالي اخذي رانيا ... وصلت يمه اخذ الطفله ... همسلي بأبتسامه سلوان : لازم اليوم مشتاقتلي كل ما ارفع عيني الگاج مركزه ويايه هويده : بغباء لساني نطق غير اللي بقلبي لا بس دا اشوفك فرحان ومتونس حالك قلقني ... سلوان : ليش انت متكيفين اشوفيني متونس وفرحان ... هويده : افرح اذا من الله ... بس اذا من غير سوالف لا ما افرح سلوان : شكد ظالمتني .... والله ماعندي ... وحده غيرج اخذت رانيا وطلعت من الهول بقلبي والله هالمره صادق وياج ... بعد ان طلگت نوران ما بقى على ذمتي غير هويده فطنت للي سويته وللي بعده لحد هاللحظه عندي خوف وارتباك ... من نوران حتى بعد ما واجهتها بموضوع ما تخلف ... وكذبت عليها گتلها من اتزوجتج جان بالي يجيني الولد منج بعد ما اعلن زواجنا ... طلعتي عاقر ماريدج صارت مشاكل بيناتنا وهددتني تفضح موضوع زواجنا اذا طلگتها كدام اهلي ... لكن هالمره صرت مفتري ... اتصلت على اختها نجوان وطلبت أقابلها بمكان ... وذكرتلها اختج ضحكت عليه ... ما ذكرت موضوع ميصير عدها اطفال ... واني مقرر انفصل عنها تريد بالتراضي اني حاضر متريد كلشي ما الها عندي ... ولا تتصور تخوفني بتهديد ... ذاك بيت جدي خلي تروح تگلهم اني طليقته اكذبها وحتى لو عدها اثبات اتهمها بالتزوير ... وأأذيكم عائله كامله ... تدرين بيه ظهري مسنود ... وعندي معارف واصلين ... واصلا مو من مصلحتها تفضح نفسها متزوجه بالسر كدام رياجيل خواتكم ... والمنطقه نجوان: ليش ِمنو الي ديهدد هي لو انت ... وثانيا شنو الي بدر منها وتريد تنفصل عنها .. صارلها اشهر وياك .ومن البدايه متفق وياها متريد اطفال شنو الي غير الاتفاق سلوان : الي بدر منها ... من يوم الي دخلت حياتي ...وهي تحتال عليه وكذابه ... واني وصلت مرحله بعد ما اطيقها ... ولا اريدها ... الي عندي حجيته وحذرت من اي تصرف ارعن ... ما تلوم الا نفسها وانت هم مشموله والعائله كلها .. فاهمه ... انتظر منج باجر تلفون دا احجي وياج سمعتيني نجوان : سمعت ... سلوان : البارحه ... طلگتها بتراضي أو بالاصح بالتهديد وبتأثير نجوان وانطيتها حقوقها لحظه الي تحررت من هالورطه الي ورطت نفسي بيها ... طلعت لبيت ابن خالتي فائز ... اول ما فتح الباب وشفته اليوم اريد سهره صباحي ... حتى للبيت مراح ارجع ابات يمك ... فائز : خلصت السالفه سلوان : خلصت بفضلك ابو الفوز ... فائز: انت غبي من الاول .. لو حاجي قبل ما تورط نفسك كان لگينالك حل وكل هذا ما صار ... بس متأكد هسه متروح لاهلك سلوان : حتى لو تروح اطلعها كذابه ... قبل جنت اخاف لان ما اكدر اسوي شي ... هسه مسنود وهي تعرف وين اشتغل وعندي معارف واصلين لاتخاف عليها عدها دماغ ... فرت عقل اثنين من احفاد القاضي ... لو يدري كان انطاني حكم بالإعدام فائز: والله تريد الصدك تستاهل ... هالسالفه راح تبقى طمغه مثل الشمع الاحمر بتاريخك الاسود سلوان : فركت وجهي ... كافي سد الموضوع اريد انسى واطوي هالصفحه من اليوم ... سوالف نسوان بطلتها وحتى الشرب اريد ابطله اريد اربي بناتي التفت لمرتي وبيتي ..اكثر شخص ظلمته بحياتي هويده فائز : تدري انت بيك شغله حلوه ... من تغلط تعترف بغلطك وتعرف الغلط وين ... بينما اني لليوم اغلط واحاول اغير من نفسي ... بس احس نفسي انغمس بالغلط يوم بعد يوم اكثر ... كل مشاكلي ويا مرتي ... ويوميه زعلانه وكم مره توصل للطلاك ... واروح كدام ابوها أتعهد ابطل شرب وسهر وهم ارجع ... سلوان : هاي الفضيله وإرثها من خالتك خو ما تريدني اطلع نسخه من قيصر ... اكيد تربيه خالتك وتعبها باقي منه بداخلي وشغله ماعدنا اراده نسيطر على نزواتنا ... هي سبب فشلنا بالحياه من كل النواحي ... بس هالمره اكو شي بداخلي اقوى من نزواتي خوفي على بناتي ... اريد اتلاحگ لنفسي واستقيم قبل ما يكبرن ويفتهمن اذا كبرن وشافن ابوهن المثل الاعلى وقائد البيت اعوج ... يتأثرن على الاقل وحده بيهن تصير مثله مثل ما اني شفت ابويه وتأثرت بي .. لليوم بداخلي ما اكدر احترمه ومرات من اشوفه يتفلسف بالحجي عن الشرف والدين والالتزام ..ما اكدر ابقى كاعد ... لان اشوف نفسي بي ... واحتقرها... كافي لك غير الوضوع ...انقبض قلبي من هالسوالف ... ) وعيت من صفنتي على صوت سنان سنان : وين صافن ابو السوس ... تحتاج السياره العصر سلوان : لا ليش ... سنان : مو دا اخذ بيبيتي تتسوك عازمه الكل اليوم على العشا ... علمود سفر عذوره.... وسيارتي رايدلها تبديل بطاريه .. نزلتها دا اشحنها سلوان: اي والله عذوره شلون راح تكطع بينا ... الله جاب هالسفره حتى يكشف ما بالقلوب ... ابتسمت لا ما محتاج السياره اليوم ... كاعد بالبيت سنان : ههههههه يويل جوز سلوان : اني شگايل انت تاخذ على روحك ... والاسباب يعلمها الله خلي اصعد ابدل وارتاح فد ساعة حتى ورا الغدا امر لبيت جدي . ♥️♥️♥️♥️♥️♥️♥️♥️ عذراء: احضر غراضي ... والدموع ما فاركت عيني ... شكد حاولت اشجع نفسي .. وادعي القوه لكن دموع امي ... من دا اساعدني بتحضير غراضي هبطت من عزيمتي ... سببتلي حاله ارباك اتمنيت بلحظتها احضنها ... واكول بطلت ما اريد اسافر .. لكن لمحة ابتسامه انرسمت على شفاهي اتذكرت عبرت ال٢٥ يعني مو عذراء الطفله الي تكدر تغير قراراتها بين دقيقه وتدقيقه لكن بعدني مهما كبرت صغيره بحضن امي ... من سديت الجنطه ... التفتت عليها وامتزجت دموعي ودموعها على الخدود المتلاصقة ... حضن امي مثل جنه من تدخلها يصيبك احساس بالنعمه ونسمه حنيه دافيه وامان واطمئنان سكينه روح وجسد ... شمس تنير كل ظلمه بداخلنا ... قوه تتسلل لداخلنا بلمسه من كفوفها تمسد جسدنا ... تمنحنا قلبها يطولنا بمحبته مهما ابتعدنا ومهما فرقتنا المسافات ... سعاد : كافي حبيبتي ... ربج يسهل وترجعيلنا بالسلامه ... اخوج گلي كل ميصيرله فرصه يمرلج ... بس تولد مرته بالسلامه هالفتره ... وخالتي وصيتها عليج گلتلي اخليها بعيني وتلفون موجود ... نطمئن عليج ... حبيبتي اني وابوج واخوج نعرف بيج كدها والله ما نزل دموعي غير الفراغ الي راح اتركي بيناتنا ... عذراء: حبيبتي ان شاء الله ارفع راسكم ... واكون كد الثقه ... لا يبقى بالج يمي ... ولودي گلي بس تحتاجيني تلگيني يمج ان شاء الله وبيت خاله فريهان ( خاله امي عايشه بلندن) قريبه على السكن ... اذا احتاجيتهم ميقصرون انت لا تخلين بالي يمكم سعاد : ان شاء الله ... يله خلي نروح لبيت جدج عمتي خطيه كل شويه تسأل عليج عذراء: وبمجرد دخولي لبيت جدي ... وشفت سنان وبيبيتي الي تلگتني بتماسك ما طول اكثر من لحظه وصول شفايفي لخدها ... حتى نعاد نفس الموقف بيني وبين امي لكن هالمره بيني وبين بيبيتي ... شعور محبه الناس الي حولك تحسسك بقيمتك عدهم ... نظرات الحزن بأبتسامه تخفي الالم على الوجوه ... تنطينا صبر وامل حتمر الايام ويجي اليوم الي نرجع بيناتهم نتأمل كل الوجوه موجوده ... لكن ما نعرف القدر شنو مخبيلنا سنان : يمه لا تبقين مقهوره مو زين عليج ... انت عندج سكر ... بدل هالدموع ادعيلها الله يوفقها وترجعلنا بالسلامه ... ياسر : جدو بيبيتك ... تحب اللحظات الحزينه تبدع بيها ... محاسن : هاي انت ما بيوم حسيت بيه ... بس تعرف اتغثني وتقلد عفيه رجال حتى بزرك ما يهز قلبك ياسر : ههههههه هسه راح يستعدل سكرها لبيبيتكم .. هاي القويه من دون أحفادج معزتها بقلبي غير ... كلهم بكفه وهي وحدها بكفه كلهم تعبوا تفكيري وقلبي الا هي ... ما بيوم شغلت تفكيري ... دائما تكون عند حسن ظني واكثر عذراء: مسحت دموعي بأبتسامه ... حبيبي بابا ان شاء الله ابقى دوم عند حسن ظنك وتبقى تفتخر بيه ... ياسر : واثق من هالشي مديتلها ايدي ... تعالي بصفي ... عذراء: كعدت بصفه حضنته ... لاتبقى بالي يمك ... حافظ على صحتك ياسر : تدرين انت وابوج نسمه طيبه بحياتي ... راضي عنكم رضى تام اذا الله كتب ورجعتي بسلامه واني موجود او ماموجود العمر بيد الله تلگين عيادتج موجوده هديتي الج وهاي الكل تسمع ... معن : بابا الله يطول بعمرك ... ان شاء الله بوجودك تفرح بيهم كلهم واشوفهم مثل ما تتمنى ... ياسر : ان شاء الله عذراء: دخلوا بيت عمي سعد وبيت عمي قيصر ... سويه ... محاسن : وهاي التموا الحبايب كلهم .... مكان ولودي ومريومه ناقص بيناتكم الله يلمكم على خير ميثم : شكو شو العيون كلها مورمه ... سلوان : القلوب هم مورمه ... وجهت نظره لسنان ... افتهم قصدي وابتسم ياسر : همزين ... تصير سالفه وتنجمعون كلكم ... صايرين ما تنجمعون بس بالمواقف الحرجه ... جمعه الغدا كل جمعه ... لازم بيها واحد غايب ... قيصر : والله يابه حقك .. بس الدنيا صايره ركض كلها مشاغل ... هويده : همست لعذراء ... يا رفيقه دربي ... شلون راح اتحمل فراگج لا انت ولا مريومه ِ... بعد ويا ِمنو اقشب عذراء: لج ترى ما بقى عندي دموع ... هويده : مبين من خشمج الاحمر ... الله عليج ذاك الوسيم مو هو سبب نص الدموع عذراء: ههههه وياج اكدر ابوح حتى بلي اكذب روحي بي ... تنهدت كل الدموع الي نزلت عليه بكوم والي نزلت اليوم بكوم لان قبل تصبرني شوفته وقربه مني ... هسه راح نفترق وما اشوفه احس قلبي من هسه تخلى عني طلع من مكانه وقرر يبقى ويا بهالبيت .... هويده : ترى هو هم ... مبين عليه يدعي الوضع طبيعي لكن الي بداخله مبين من عيونه ... سفرج هذا ... راح يدلي على شي طول ما انت موجوده كدامه يكدر يخفي ويقنع نفسه بمشاعر غير حقيقيه لان اي مشاعر حقيقيه يضنها خيانه للمرحومه ...لذلك محصن نفسه ... عذراء: هويده لا تخليني اتأمل خليني قانعه بمشاعري وحدي ... تدرين اني مرتاحه لفكره ما يتقبل يرتبط ... لان على الاقل اعرف ... راح يبقى قريب مني هويده : ليش ان شاء الله اذا ما ناوي يتزوج ناويه انت هم تعتكفين وتبقين معلقه روحج بي ... بابا الدنيا متوكف على واحد ... حتى لو نحب الحب مو كلشي ... الحياه لازم تستمر والعمر يمشي ... ماكو شي يبقى على حاله حتى احنه نتغير وما نشبه أنفسنا القديمه عذراء: الله كريم ... انت دائما اذكريني بالدعاء ... هويده : بدون ما توصين ... انت اقرب شخص الي حتى اقرب من مريم الي هي اختي ... الله يوفقج وينولج الي تتمني عذراء: امين كل الم وحزن ينجلي ... بساعة لمه قلوب حنينه ... ومحبه ... بصوت ضحكاتهم والتودد الي بينهم ينزاح كل هم ... نتمنى الوقت ما يمر وتوگف الدنيا ... عد هاللحظات ... لكن على گولت هويده تستمر الحياه وتمشي الساعات والايام الوداع صعب ... لكن الفراق اصعب ... ودعت حضن ابويه ... الي بقيت اذرف بي الدموع ... وايدي محاوطته ما بودي اتركه ... على هدوءه ورزانته ... لكن قلبه غلب قوته وتماسكه نزل دمعته العزيزه ... العلاقه بيني وبين ابويه ... عمري ما فكرت بيها لان عشت بظله ناعمه بأمان وجوده بحياتي مثل خيمه وعامود ... استند وأحتمي بي من هالدنيا وناسها ما افكر بشي لان هو بظهري طول عمره مساندني ومنطيني دعم ... حسيت بهالحظه مثل الطفل الي يدخلوا للمدرسه اول يوم ويواجه حياة ومجتمع وناس وحده لازم يعتمد على نفسه ويتعرف على الي حوله ... كلماته ترن بأذني لليوم .... الله يرضى عليج ويرضيج دنيا واخره عزيزتي مسح دموعي وبوس جبيني ... مثل وسام شرف ... نوطني بي طول العمر بوست ايده ... وودعته ... التفتت على سنان الي كان يراقب الموقف بصمت .. بنظرات اجهل تفسيرها ... التقت النظرات وكانت بالنسبه الي أمل ... ارجع بيوم واشوفه مثل ما هو باقي الي سنان : توصلين بالسلامه ان شاء الله عذراء: الله يسلمك ... (وما حب الديار شغفن قلبي لكن حب من سكن الديارا قيس ابن الملوح ) وداعا ... يا بيت جدي ويا من فيه .... انتظروا ... تكمله الجزء٥٥ خلال هالايام
شكرا لكل انسان صاحب ذوق ومبدأ اقصد كل المتابعين الي تعليقاتهم محترمه وتعكس اخلاقهم .... وأسفي على كل من تجرد من الاخلاق
اذا فشلت في رفع احد لمستوى اخلاقك فلا تدعه ينجح في انزالك لمستوى خلقه موجه لكل المتابعين ... الي ذموني ووجهولي كلمات قاسيه كلامكم ما يأثر بيه ولا يمسني لكن يمس صورتك وأخلاقك لان تعبر عنها بما كتبته لذلك بدل ما تستنزفون وقتكم بقراءه القصص ... استنزفوا وقتكم وتعلموا الاخلاق والذوق ... وربوا انفسكم جملوا ذوقكم بالاخلاق لا بالملبس
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
