النصيب
بارت2
كبرت واني مدلله عند الحجي والحجيه البس احلى الملابس اروح زياره ويه الحجيه حلويات ولعاب اخواني كل واحد طلع بيت الحجيه علمتني كلشي وقبل متموت الله يرحمها انطتني صندوگ مال ذهب گالت هذا ذهب امچ ضميه عندچ انقهرت على موتها حيل وحسيت باليتم دخلت مدارس وتعلمت والحجي مخلاني احتاج اي شي حتى بالحصار محسيت مثل العالم لحد مافاد يوم راجعه من المدرسه لگيت اخواني كلهم بالبيت وعرفت ابوي صايره عنده جلطه وموديه للمستشفى ويريد يشوفني اني بذاك الوكت مااعرف شنو جلطه عبالي مثل الگحه والصخونه ويطيب ودوني على المستشفى دخلت عليه ميگدر يحجي گوه سألني بابا زنوبه تحبيني
اي بابا احبك شبيك مصخن يمته تطلع
زنوبه اريدچ يوميه الغروب تدعيلي حتى لو متت
انت مو گلت متموت لحد مااني اكبر
ماگدرت اعوفلچ شي ملك يحميچ اخوانچ ماخلوني اعذريني
شنو ملك بابا انت تعال وياي واني بالبيت انطيك حبوب وتصير زين
الحجي العصر توفى الله يرحمه يمكن من ذاك اليوم ماحسيت بالفرح بحياتي راح ابوي وبدت حياة جديده چان عمري ٧سنين عرفت ابوي موصي اخوه جبار عايش بغداد واخته ام ستار ياخذوني عدهم همه يربوني لكن اخواني ماقبلوا بقيت اتنقل من بيت لبيت بين اخواني وراح الدلال وظليت اخدم الكل من عدها افراشات للغسل تودي عليه منو عدها تنظيف سيراميك المطبخ غسل السطح نفسه مريضه اني اروح وبت الطرمه صار اسمي بدل زينب اخواني چانوا ظلام ميخافون الله حتى ضرب يضربوني ونسوانهم بعد مااشتغل خلص خايسه تبوگ أيدها طويله تصدگون بعمر ال١٢حتى اطبخ وتراجع مستواي بالدراسة ظليت على هذا الحال إلى أن اجى عمي جبار وقنع اخواني اروح وياه اعيش عد عمتي ام ستار مرة چبيره ابنها ميت بحرب ايران وبناتها كلهن متزوجات ومحتاجه احد يداريها رحت وياه ممصدگه بغداد حلوة والبنات ملابسهن غيرشكل وجوها حلو ماكو شرچي وعمتي چانت عصبيه وبس تنعى وتبچي بس حبتني وعلمتني خياط وطبخ وكلشي هي عايشه على تقاعد ابنها وعدها بيت ثاني واخواني كل شهر يودولي خمس الاف لان حصار يگولون ماكو بيع وشرا بيت عمي جبار گبالنا بالمنطقه عنده بنات اثنين واولاد تلاثه اسراء والاء ومهدي وليد ومصطفى وليد عايش بالخارج من زمان وظليت اروح يمهم لان بتهم اسراء حبابه والاء معوقه وامها مشلوع گلبها بيها اروح يم اسراء اساعدها بالبيت وتساعد مرة عمي ام مهدي بالاء خاصة بالعطله وكتي كله عدهم وكلهم اكبر مني مهدي چان يحب المدرسه مالتي واني اودي رسائله الها واخذ منها الرسائل فد يوم جبت الرساله هو واگف بالفرع هو هم مدرس وياه ولد اثنين انطيتها الورقة وگتله
هاي ودتها ست هيفاء
ومكيفه دااسوي مهمه انسانيه الورقه بيها ورد وگلوب وهاي السوالف مال الناس البطرانه ماادري واحد من ذولي الولد اخو ست هيفاء شفت مهدي وجهه صار دم والولد دنگ ومشى واني بسطي صار حي على. الجهاد مهدي يبسط وام مهدي تبسط وياثوله ياغبيه وست هيفاء الله يدري شصار بيها مرة عمي ام مهدي لبست عبايتها وراحت لاهل ست هيفاء خطابه بنفس الساعه حتى تلم الموضوع وباليل راح مهدي وعمي وناس خيره عليهم وخطبوا البنيه بس چان ظروف صعبه وحصار مهدي راتبه ثلاث الاف واهلها رادوا العرس بسرعه رحت على مرت عمي وگتلها
عمه اني اسفه والله ماافتهم مو قصدي
ولچ انتي ثوله شلون تاخذين رسائل وتجيبين رسائل مو عيب
مهدي گالي اني شعليه
هو هم مهدي ميفتهم بت عمه من هسه يفتح عينها على. هاي السوالف
هسه الحمد لله خطبتوها
خطبناها والفلوس منين تدبر ولچ هو مهدي حافي شعنده چان يريدها حبيات مو زواج شگول عليچ
زين عمه اني عندي ذهب انطيچياه وتبيعيه وزوجي مهدي
منيلچ الذهب
مال امي الله يرحمها الحجيه انطتنياه
هواي الذهب وعمتچ ام ستار تدري بيه
اي هواي وعمتي تدري ضامته عدها
لعد متگدرين تاخذيه متنطيه
اني اگله اريد اساعد مهدي وتنطيني
دروحي يله انتظرچ
رحت على عمتي مقبلت تنطيني الذهب كله گالت مرة عمچ تريد تضحك عليچ واخوانچ اذا دروا يموتوچ كتل اخذت منها گلاده لير وديتها الها
گالت هسه هو هذا الذهب يله جيبيه وباعتها وسد قسم من المصاريف وتزوج مهدي ست هيفاء بس بقت تشوف العمى ولا تشوفني فوگ مازوجتها من مهدي...يتبع
