النصيب
بارت..نهاية
بدا وليد يتقبل الواقع وافتهم هو اب لطفله معوقه ورجع اهتمامه وحبه إليه هذا الشي هون عليه التعب والقلق على بنتي واني اشوفها يوميه حالتها اسوء من قبل شركة التأمين وقفت واحد من الادويه لان غالي وهذا الشي بدا يسبب عدها التهابات لحد يوم كان شتى والدنيا ظلمه ساعه ثمانيه وليد هستوه يدخل البيت شفت رفقه لونها تغير ومتگدر تتنفس لفيتها بالبطانيه وخليتها بالسيارة وليد وياي وصلنا المستشفى خلوا الاجهزه والصوندات بس بنتي مااشوفها تتنفس عمرها راح يصير سنتين ونص ومسامعه منها كلمة ماما بس روح ونفس يصعد وينزل بيقينا ثلث ساعه الأطباء اخذوا وليد حچوا وياه شفته ديجي عليه گوه يجر بخطواته جرني من اديها وگلي
زي اطلعي راح يوگفون الأجهزة لاتشوفيها احسن
لا وليد الله يخليك خطيه زغيره متتحمل موت فدوه احچي وياهم لاتموتوها
كافي ارحميها تعذبت وبعد متتحمل
گلهم بس الليله اذا مصارت زينه خلي يطفون الاجهزه فدوه وليد
والله بعد متتحمل كافي مو راح تموتيني اني همين
انداريت على الزجاج حتى اشوفها خله اديه على عيوني
انداري عليه لاتباوعين وادعيلها
لك خطيه تموت سوده عليه ماما رفقه
بقى وليد لازمني وميخليني اشوف لحد منطونه خبر ماتت دفعته ورحت شفتها اقسم بالله صار سنتين ونص مشفت تعابير الراحه على وجهها مثل ذيچ اللحظه ارتاحت بالموت وراحت لرب هو ارحم الراحمين
دفنوها بمقبرة المسلمين بالمدينه وخلص عزاها وراحت الناس بقيت وراها فارغه دخلت لغرفتها جمعت اغراضها واشيائها وسريرها وديته للتبرع وسديت باب غرفتها مااريد انساها كافي اعذبها بدموع وبچي
وليد اتجاوز الأمر واخذ اجازه من شغله لان من ولادتها هو يشتغل ويدفع لشركة التأمين تمرضت اخذني لادكتورعرفت عندي كآبة ومنطوني علاج لان ياثر عليه وياخر الحمل من طلعنا وليد مستغرب اني عندي كآبة
انتي عندچ كآبة اصلا اني حبيتچ لان دمچ خفيف ودوم تضحكين
مااگدر انساها وقتي كله چان الله هسه مااعرف شسوي
اشغلي وقتچ بيه تناگري وياي لعد اني ليش اخذتچ
وهسه انت من اخذتني شحصلت لو باقي بدون زواج احسن
شلون احسن اصلا الدنيا بدونچ متسوا شوفي هسه اخذچ للصالون گصي شعرچ واصبغيه مثل ايام العرس اللون چان حلو
هسه صار حلو بوكتها مو گلت عليه خوش صبغ مال اخشاب
اني گلت مااتذكر بس صدوگ هو چان صبغ مال اخشاب لو مال شعر
مادري يمكن اثنينهن
يله خلي اوديچ وانزعي الاسود كافي دافنه نفسچ انتي بعدچ زغيره الي بعمرچ بعدهم يدرسون وباچر نسافر لكليفورنيا الجو بيها حلو مثل العراق واوديچ للمول اشتري ملابس وكل الي تريديه
والله انت الي جبته لنفسك جيب الكردت كارت مالتك اذا ماخليك تدگ على راسك واصفر الك بسيطه
ميخالف صفريه بس مو تشترين گلاصات وجدور ترا اشمرچ انتي وياهن بالشارع
سافرنا لاجازه وبعد وفاة رفقة بشهرين صرت حامل وبدت دوامة القلق والخوف وتصوير وكل اسبوع تحليل لكن الله دائما فرجه قريب وأجره للصابرين ولدت طفل سليم اسمه سجاد وبعده طفلة سليمه سكينه ابني هسه عمره خمس سنين وبنتي اربعه وقررنا بعد منسوب اطفال لان عمليات قيصريه وخوف وقلق والحمد لله
وليد عايش بين اطفاله احلى سنين عمره صح مرات يحب يخبث بيناتهم حتى يتعاركون وهو يصف ويه سكينه واني اصف ويه سجاد لكن خباثته هو يدفع ثمنها حتى يصالحهم
مرات من اتذكر الي مريت بيه اشكر ربي لان جعلني صابره وكتبلي اجر الصابرين ودائما ادعو الله لا يضر والدة او والده بضناه وسأل العالي القدير لكل اب وام يمرون بظروفي أن يخفف عنهم ويصبرهم لان معاناة محد يعلم بيها غير الله والوالدين
هسه من مرت السنين افتهمت موقف وليد من رفقه راد يرحمني ويرحمها من هواي معاناة وعذاب والم بس اليء رادها ربنا صار الله يحفظ اولادكم من كل سوء امين
