النصيب
بارت6
تريدين تفتحين تحقيق وياي وجيت
مو تحقيق بس غير اعرفك شتشغل هناك مو تگلي دكتور لو مهندس ترى كل العراقيين بالخارج من يسالوهم يگولون لو دكتور لو مهندس ادري ماكو واحد خلفه صباغ نداف
لا اني لا مهندس ولا دكتور أستاذ بجامعة جورجيا وهم ادرس
ابن عمي لاتحمى علينا گول الصدوگ
والله الصدوك هذا شغلي وعندي بيت زغير هناك واتزوجت امريكيات وحده اول دخولي لامريكا اوراقي كانت مو رسميه اخذت الجنسيه وطلگنا والثانيه الوحده وغربه ودراسه تزوجتها وبعدين ماتحملتني طلگنا
يعني شنو ماتحملتك تضربها تخونها شنو
لا طبعنا يختلف واطمئني اني مااضرب
وليد اني قبل لااوافق تلث شغلات اضوج منها بالرجال الضرب والخيانه والشرب ذني اذا ماعندك اي شي ثاني اتحمله
والله العظيم تلاثتهم مااسويهن
وعمتي منو يبقى يمها
انتي اول وتالي تتزوجين وبعدين بيت اخوها گبالها وبناتها موجودات بغداد
زين ليش اني رايدني
هوايه اسباب روحچ حلوة ارتاحلچ محتاجه ضحكه بحياتي وشكلچ ينجرع مو مشكله
لا بالله شايف شكلك بالمرايه مادري ذني الامريكيات شلون قبلن بيك
عوفينا من الامريكيات المهم انتي تقبلين
اخواني غير يعرفون ويوافقون
اخوانچ ولد عمي بيناتنا نتفاهم
چنت اتصور اخواني يرفعون راسي ويگولون تعالوا الناصريه واخطبوا اخوي الچبير گالهم بتكم وبيكفكم اتصرفوا
بالعقد وكيلي عمي وحتى محد ناقش بمهر ومؤخر اتفقوا وقرروا بيناتهم وسافر وليد گال يرجع بعد شهر نتزوج....
النصيب بقيت وي وليد اتصالات عرفت هو ماعنده وقت حياته شغل ودراسه وتحضير محاضرات فهمني لازم اعتمد على نفسي بكلشي ولازم اسوق وعرفت طبعه يحب الحياة والفرح والضحك بعكس اخوانه اني هم هذا طبعي ازعل وابچي ورا خمس دقايق اجمع چبس ونساتل واشغل يوتوب اضحك واكل مر الشهر بسرعه ورجع وليد حتى نتزوج قبل زواجنا بيوم خابرني
زي انتي من باچر راح تصيرين مرتي اريد اوصيچ شي ماريد كل شويه تذكرين زواجي السابق وغيره وتحقيق صدگيني اني اعتبر باچر اول زواج إليه الي قبلچ چانت علاقات فاشله وحتى لا تتفاجئين زوجتي الاخيره استاذه وياي بنفس الجامعه وأصدقاء بعدنا
بس مو صعبه چانت زوجتك ولحد الان صديقتك
هسه من تروحين هناك تشوفين عادي
المهم انت متاكد من نفسك متريدها بعد
والله متاكد ماريدها اريدچ انتي حبيبتي وبت عمي
اگلك خلي هذا التصفط لباچر هسه اريد انام
اگلچ رحمة على اهلچ باچر من تروحين للصالون مو يسوون وجهچ الوان قوس قزح خليچ طبيعيه وهاي التسريحات سبع طوابق لاتسويها ترى ارجعچ لبيت عمتي بنص الليل
هسه اني راح يخلولي مكياج ويمشي حالي الا انت شوف حل لروحك
خلي نشوف باچر الناس تگول منو الاحلى اني لوانتي
نشوف يجي باچر
يوم عرسي اكتشفت شگد اني جبانه ويمكن هواي بنات مثلي صعب هذا اليوم طول عمرنا تربينا على العفة والحرام والعيب وبليله وحده لازم تعيشين علاقه حميمه صح الي وياچ زوجچ بس يبقى الخجل صفة هاي الليله حتى حچي ماگدرت احچي وليد عجبه خجلي وماضيقه البچي الي بچيته احتاجيت اكثر من يوم حتى اگدر استوعب اني زوجه وشنو المفروض اتصرف ويه زوجي اتزوجنا بالفندق وعشنا بيت عمتي بقية إجازة وليد تعلقت بوليد اني بعمري ماعرفت رجال يخصني الي مو عمي او ابن عمي اول مرة احس اكو شخص مسؤول عني ومتكفلني عجبتني كلمة رجلي ظليت بين كلمه وكلمه اگولها يمكن ممصدگه حچالي عن كلشي بحياته وحتى الجو بالولاية عرفته
خطيه عمتي راحت الزيارة حتى تعوفلنا البيت واجازته هي اسبوعين مرت بسرعه ليلة السفر بقينا سهرانيين نسولف
اگلك وليد خابر الشركه واجل السفر شيصير يعني
حبيبتي موسهله اني عندي دوام ومحاضرات وهناك ميحبون واحد يتأخر على مواعيده
والله مااگدر بدونك
شنو هالرومانسيه الي نزلت عليچ
ليش شبيه اني مو رومانسيه صوچي گوم روح من هسه بات بالمطار
واهون عليچ ابات بالمطار
لا ميهون انشالله ميجي باچر وتسافر
شدعوه هيج راح تموتين عليه
اي والله راح اموت عليك وانت
اني متت عليچ من زمان
زين لعد من تروح لاتظل عينك على هاي وذيچ وامشي وانت مدنگ زين والغشاش الله يذبه بالنار
وداعتچ مااسويها وكلها شهرين وتجين ونظل اني وياچ نتناگر العمر كله ويصير عدنا اطفال وبيچون ويتعاركون بيناتهم شوكت يجي هذا اليوم مليت من البيت الفارغ والوحده خاصة ايام الثلج تنگطع الحياه عبالك المدينه ميته والكابه تصير تخنگ
شنو هالماساة راح تخليني ابطل مااروح
لا من تجين انتي يختلف الوضع من ينزل ثلج نگعد گبال الفاير بليس ونجمع جهالنا ونحچيلهم قصص
اگلك جهالنا كم واحد تقريبا
يعني اربعه كافي
الله شلون الافلام ولد اثنين وبنات اثنين داحس نفسي باعلان مال معجون تركي وجهالنا شگر مو
لا مااريدهم شگر اريدهم عراقيين
سافر وليد حلفني ماابچي ورا ومابچيت وظلنا نتخابر يوميه هو عنده بالسته العصر لان يرجع للبيت واحنا عدنا ٢ الفجر بعد سفره بشهر عرفت نفسي حامل واتصلت بيه من الفرحه ماعرف شيگول وظل يوميه يتصل مرتين ولاتتحركين ولاتمشين اني هم فرحت بالحمل وحسيت بالامومه من اللحظه الي عرفت بيها حامل حتى المرض واعراض الحمل ماهمتني
دخلت الشهر الرابع اجى موعد سفري خلصت الطريق نايمه وصلت لوليد دايخه وبعد الحضن وغيره بالمطار گتله وديني البيت اريد انام
شبيچ زي حبيبتي مريضه
راح اموت شنو هاي امريكا هالگد بعيده يومين صار من طلعت من البيت
هسه عشر دقايق احنا بالبيت
وصلنا البيت صح زغير بس حلو ومرتب وحديقته حلوة فعلا وليد كان مخطط لحياتنا بهذا البيت وحياة اطفالنا ثاني يوم أصدقائه وزوجاتهم اجوي علينا ضجت أن الكل يحچي انگليزي وحتى الي يحچي عربي هم ميگدر يكمل جمله بدون ميگول كلمه انگليزي من طلعوا وليد عرف الي مضوجني
زي لاتضوجين هسه شهرين تصيرين احسن منهم بالانگليزي اني اطلع من الثمانيه الصبح ارجع بالسته تگدرين تاخذين دروس وتتعلمين سياقه لازم تتعلمين لان تحتاجين من يجي البيبي مواعيد ولقاحات وهواي اشياء تحتاجين بيها السيارة
وفعلا تعلمت سياقه ودرست عشت احلى ايام ويه وليد وتعرفت على زوجته القديمه لوري بالبدايه غرت منها لكن من شفتها بطلت غيره لاهي احلى مني ولااصغر مني وليد يحبني وصريح وياي ويحسب الايام حتى يصير اب
بالشهر الخامس عرفت عندي بنيه واني وليد قررنا نسميها رفقه لان حياتنا چانت رفقه حلوة...يتبع
