النصيب
بارت5
احنا هسه صيف ودامسح كاشي وگالبه الدنيا واندك الباب طلعت فتحت وليد
هلو وليد تفضل
عمتي موجوده
اي موجوده بس انزع حذائك وامشي منا هاي ماسحتها لاتدوس
شنو حقل ألغام هسه منين افوت
بعد انت لصت الدنيا فوت بكيفك وين تريد تگعد
شنو ناصبه سيطرة وين اروح وين تگعد
اكلك فوت ولتسوي نفسك عليه سائح اجنبي عمتي جوا بالمطبخ فوت وامري لله امسح من جديد
خلصت شغلي دخلت المطبخ هذولي اثنينهم گاعدين على الميز ويبچون عمتي دوم تتذكر ابنها وتبچي
هاي شكو عمه ليش تبچون الدكتور گال لاتبچين مو زين على گلبچ اساويلكم چاي
سوي ريوگ لابن عمچ صار هسه اسوي الريوگ ولو مو وكته
عمه هاي شلون متحملتها
سمعتك اصلا البيت بدوني وحشه مو بالله عمه
اي والله عمه صدوگ
زين شوكت تخلصين شغل وتگعدين اريد اعرفچ مشايفچ قبل
شتريد تعرف اني بت عمك كاظم مات الله يرحمه وصى عمتي تاخذني يمها هاي المختصر
عمتي كملت البقيه شلون امي ماتت واخواني وموقفهم مني حسيت بعيونه عطف عليه واني مااحد يعطف عليه صارت جيات وليد الصباحيه يوميه لعمتي ويتريگ ويتغدا عدنا الظاهر منشور علينا واني ماادري بس هم احسن من مهدي ومصطفى يضحك يجامل فد يوم لكاني اطبخ اصر يسوي الزلاطه هو
زين والله تعرف تلزم السچين
الي يتزوج امريكيه لازم يتعود يطبخ لروحه ذني ميطبخن
اويلي تأخذون العراقيه تطبخ وتكرب وماعجبكم والامريكيه حتى الزلاطه تسووها حظوظ
ياحظوظ هن الامريكيات طايح حظهن
لعد ليش اتزوجت امريكيات مرتين
وحده اخذت الجنسيه وحده من الوحده اخذتها
وبالمقابل چنت تطبخ الهن واكيد طبخك موزين طلگنك
اني طلگتهن والله
وباچر تاخذ عراقيه تشلع گلبها وتخلص عمرها بالمطبخ وحتى گلاص المي هي تجيبه الك والله خطيه النسوان
وانتي ليش محروگ كلبچ على النسوان
ليش اني شنو گدامك شرطي
ها العفو منتبهت
معناها اعمى متشوف
الله على السانچ شنو هالرقه يمعوده
والله انتي المفروض يوگفوچ بالسيطرة براس الشارع وماكو داعي للتفتيش اي مجرم بس يشوفچ يسلم روحه
ليش عيني شايف سعلوه گدامك
تقريبا يعني وصف قريب
بنفس اليوم وليد على الغدا طلب رقم تلفوني گدام عمتي وبحجة يسال على عمتي باليل هو عمتي تنام بالتسعه بعد شيسال عليها والله ابن عمي هذا يرادله صفنه بنفس اليله اتصل چنت نايمه
شلونچ زي
شنو زي غلطان بالرقم اني مو امريكيه واسمي زينب
انتي لو تروحين لامريكا يصيحوچ زي وراح تكسرين على الامريكيات وهناك تصيرين مو سعلوه تصيرين تخبلين
لعد شبيك ياحضي مصرت تخبل انت وكسرت على ولد امريكا
لعد انتي ماعندچ ذوق اني اخبل
اي صدوگ قبل شويه بنات فرعنا كلهن مشككات هدومهن ويصرخن سالتهن شبيچن گالن ابن عمج خبلنا
شفتهن وطلعت سلمت عليهن لا جديات زينب اريد احچي وياچ واعرفچ
ماادري شتريد بس تسالني واجاوبك
ليش تاركه المدرسه امي تگول مصطفى مقبل تداومين
صحيح ظل يتعارك وياي على لبسي وبطلني
وهو باي حق يحكم عليچ
وليد هنا عدنا البنيه اي واحد يجي يحكم عليها حتى ابن الجيران من حقه يحاسب ومصطفى ابن عمي واخواني ساندوه
وانتي تحبين الدراسه
احبها واريد شهاده بس الي صار
واخوانچ ليش متروحين يمهم
عشت وياهم ميحبوني ومعتبريني غريبه عمتي تحبني ومرتاحه يمها
وليش متزوجتي لحد الان
شنو لحد الان.ليش شكد عمري هو اني ٢٠ مو قصدي بس بالعراق البنات تتزوج من وكت
مجاني واحد مناسب
هاي البشر كلها معجبچ واحد
اگلك انت ليش متعرف تسال يعني شفت الخطاب واگفين بابنا سرا واني اطرد بيهم داگلك ماكو واحد مناسب يعني وين الي زايحته الكاع يدگ بابي زين افتهمت
بس اعصابج على كيفچ مادري بالمساله حساسه هالدرجه وانتي متريدين تساليني على شي
اي باجر تجي على الغدا شنو تريد اسوي لاتگلي بكيفچ
اكيد اجي مو علمود الغدا حتى تناگر وياج بكيفج شنو تطبخين
وظل وليد جاي رايح على بيتنا بحجة زوجات اخوانه محجبات ويتقيدن من هو موجود بس اني هم چنت محجبة راد يروح الزياره هو ومرة عمي وعمتي ام ستار وأصر اروح وياهم لان اني مااطلع والطريق كله يصنف ويقلد وارد عليه
رجعنا من الزياره بقى عدنا بالبيت مراح لأهله
اگلك ترى احنا مفاتحين لجوء موبس نسوان اخوتك محجبات
واني مضايقچ بشي گاعد بيت عمتي
اي مضايقني اريد انزع الحجاب
انزعيه منو لازمچ
لا والله انزعه وانت موجود مو
ادري قبل كم سنه مو چنتي مو محجبه والناس كلها شايفتچ بدون حجاب
چنت زغيره ماافتهم
زين عندي حل ليش مااخطبچ وتگدرين تنزعين الحجاب
هو على طول يتشاقه ومااعرف شقاه من الجديات لذلك سكتت
ها ليش سكتي فكري وردي الجواب لاتطولين لان اريد اسافر
طلع من البيت وحچيت لعمتي الي گاله عمتي گالت يتشاقى
فكرت ويه روحي اني مااعرف وليد صح ابن عمي بس صار شهر من شفته وحتى مااعرف عمره شغله وهو ميدري بمصطفى رادني قبله صار المغرب اندگ الباب مصطفى خفت مدنگ رأسه وميباوع سلم عليه واول مرة ميصيح
زينب وليد حچى ويه اهلي عليچ وافقي
مصطفى وليد مااعرفه ولايعرفني وهذا زواج وغربه
بالخطوبه تعرفيه واني لو مااعرف اخوي يستاهلچ مااجي برجلي عليچ
والله ماادري خلي افكر واشوف
ماكو تفكرين وليد رايدچ توافقين
راح مصطفى مادري هو تهديد قرار امر واقع ولازم ارضى
ثاني يوم الصبح جتي مرة عمي جبار وحچت وياي وعرفت هو عمره ٣٣والباقي كلشي متعرف بس هو بالخارج وگالت يعقد ويرجع ورا شهر تتزوجون هنا وبعدين تنضرين تسافرين يمه الكل مقرر ومخطط واني بعدني مموافقه گتله خلي يجي احچي وياه اساله ليش مطلگ مرتين شنو شغله دراستي بالعراق شلون اخواني منو گال يوافقون عمتي منو يبقى يمها كل هاي الاسئله جاوبني عنها وليد بحديقة بيت عمتي
گالوا تريدين تفتحين تحقيق وياي يتبع
