فِـي أَحْــــضَانْ الـْــــمَوْتْ

" حلقة 3 "

حلقة 3
وصلت لدار...ركيت الكرهبة على جنب...و نزلت...تبسمت على جنب و انا نرا في كرهبتو مراكية...زح بدل كلشي في حياتو...كان كرهبتو... هزيت المفتاح في يدي نلعب بيه...اول ما وصلت...فتحت البون الباب قبل ما ندخل...و لا منجمش نسميها البون...خاطر نعتبرها اكثر من هكا...بستها من راسها نحكي
انا:شنوة ظاهر رجع بكري ليلة
عزيزة؛والله هو كل يوم يرجع بكري...اما انت و السخطة لاخر...تغيبو كيما تخبو و تجو وقت ما تحبو
انا:شنوة عزيزة ياخي توحشتني انا ولا هو
عزيزة:برا السخطة هذا لا عاد حشمتو نتوما زوز
انا:ملا عينك على توفيق
عزيزة:تي احشم عاد...هكا تحكي على بوك
انا:ههههه باهي باهي وينو توا
عزيزة؛في صالة
انا:عيش عزيزة الغالية...اه و على سيرة السخطة لاخر...مركح جوو عاللخر
عزيزة:على اساس انت كنت تصلي و تسبح
وقفت في بلاصتي...و هي سكتت...بدلتها بضحكة تحكي
عزيزة:برا اسمع محاضرتك و انا تو نحط العشا
انا:باهي عزيزة عيشك
خذيت نفس...و كملت طريقي لصالة...حسيت بشكون راح يضربني لوجهي...وخرت راسي لتالي...و شديتلو يدو...بخفة...و درت عندو...تبسمت على جنب نحكي
انا:مش باش تبطلها العادة هاذي
بابا:و انت مزال عندك نفس الخفة
انا:تعلمتها عليك
بابا:زياد زياد...ولدي الغالي
انا:بابا والله ليك وحشة
قربت منو حضنتو...و جبدت روحي منو...ضربني على كتفي يحكي
بابا:وين كنت غاطس
انا:كي العادة
بابا:ممم باهي...و شصار في اللي حاول يقتلك اخر مرة
انا:ههههه ياخي ما يخفى عليك شي انت
بابا:توفيق راني و لا نسيت
انا:عطيتو درسو
بابا:تهديد مش كافي...رصاصة وحدة تهنيك منو
انا:بابا الغالي...ماك تعرف تهديدي...و هو زادة يعرف شكون زياد...و لي سماه توفيق الشيطان من صغرو...شينجم يعمل فيه...الموضوع تسكر و معادش يفتح...و كان باش نقتل واحد كيفو...باش نحلو فوق راسنا مصايب كبيرة...و متنساش شي مهم...مازلنا بحاجتو...و انت ادرى
بابا:و اكثر شي يعجبني تفكيرك في شي مرتين...مش كي السخطة لاخر
انا:قصدك نسخة متاعي
بابا:فرحان ياخي...زوز وصلتو لثلاثينات...و معادش حشمتو على روحكم
انا: شنوة باش نعدوها بين سلاحات كهو...لا عاد الواحد لازم يتفرهد
بابا:بالطبيعة...باش تتفرهدو...ملا باش نستغرب انا
انا:شرايك نشوفلك عزيزة...والله عزت بيا...عرس بيها و تهنا...و سيب علينا الخدمة هاذي
بابا:يعيطك يا طفل اقلب منظرك عليا
انا:لا مش قبل ما ناكول...والله باش نموت من الجوع...و زيد انا لشديت سلعة الاسبوع هذا...و ستر ربي راني مزلت عايش...باش دللني راك
بابا:صحيح...على سيرة سلعة...ما جانا حتى خبر من اللي استلمها لتوا
انا:المهم فلوسك وصلوك...و الخبر باش يوصل اليوم و لا غدوة
بابا:باهي باهي...باش تبات الليلة هوني
انا:لا...جيت باش نودعك
بابا:وين على خير
انا:شنوة توفيق نسيت ياخي...بعد كل عملية...باش نغيب 3 اشهر عالوسط
بابا:باهي رد بالك على روحك...و طمني عليك
انا:بالطبيعة هيا توا عزيزة حطت العشا و تستنا فينا
بابا:فمك باش تلمو...مش كل مرة تعملو الفضح قدام المخلوقة...في مقام امكم راهي
انا:كي هكا علاش متعرسوش و تهنونا
بابا:شو كي مزال يحكي
انا:ههههه باهي باهي ايجا برك
بابا:باهي
_____________________________________
متكي على فرشي...نرمي في الفلايش بالوحدة...عاللوحة اللي معلقة عالحيط...نسمع في شكون يدق عالباب...كملت نرمي فيهم...نحكي
انا:ادخل
دخل واحد من رجالي...طلعت عليه...حط يديه فوق بعضاهم...مطابس راسو يحكي
هو:السلعة وصلت
تبسمت على جنب...و كملت رميت اخر فليشة...جات في الوسط بالظبط...هزيت روحي تقعدت..نشوف معاه و نحكي
انا:و صاحب السلعة
هو:مات
انا:مممم باهي وينها توا
هو:في المخزن
انا:شكون يعرف بالخبر هذا غيري
هو:بخلاف رجالنا حتى حد
انا:مليح برشا...ملا اسمعني شباش تعمل توا
هو:شنوة
انا:باش تنظفو كلشي وراكم...منحب حتى حد يعرف لي صار...و انت تعرف نقصد شكون
هو:بالطبيعة طمن
انا:باهي برا على روحك توا
رجعت تسطحت...جا باش يخرج...وقفتو نحكي
انا:استنى
هو:تفضل مسيو
انا:ابعثلي وحدة بمعرفتك
هو:باهي ساعة و تكون عندك
انا:نص ساعة
هو:باهي مسيو
اول ما خرج...هزيت تليفوني...كلمت السخطة هذاكا...هز عليا يحكي
زياد:و اخيرا مسيو ادم تنازل و كلمنا
انا:ههههه توحشتكم شنعمل
زياد:سكر على شعرة باش نصدقك
انا:وين غاطس يا واطي
زياد:قاعد نتعشى مع توفيق
انا:شعامل مع عزيزة
زياد:هاني نحاول فيه يعرس بيها
بابا:سكر انت وياه...ملا بهايم ربيتهم انا
انا:ههههههه والله ليه وحشة توفيق
زياد:نعرف هاني نطير فيها منو...ماك تعرف بعد العملية لازم نرتاح يمات
جيت باش نحكي...دق الباب...دخلت وحدة...بيضة...شعرها اكحل نازل على كتافها...المعري اكثر من المغطي...مطبسة راسها...مش من الحشمة جيست من الخوف...تبسمت على جنب...ظاهر باش نشيخ الليلة...عملتلها بيدي تقرب مني...وصلت قدامي...جبدتها من يدها جات على حجري...و كملت نحكي مع زياد
انا:مبعد نكلمك
زياد:شفما ياخي
انا:باش نلعب مع كعبة مش نورمال
زياد:زايد خامج برا على روحك
انا:هههههه والله انا معنديش وقت نضيعو مع توفيق
زياد:هههههه ماو انا ساعة عندي كعبة فيكس...تو كي نحب نبدلها نكلمك
انا:حتى هي تستاهل باش تكون فيكس...برا متخليهاش تستنا برشا...و خلي توفيق يستفرد بعزيزة
زياد:و انت قلتها...ليلة سعيدة و سايس علاها
انا:بلا ما توصي بونوي
علقت عليه...و رميت تليفون عالتابل دونوي...رجعت تسطحت و جبدتها فوقي...مركزتش مع وجها برشا...اصلا حاجتي لي بيه الفايدة...و هي زادة تعرف اللعب الصحيح...فرغت فيها ستراس النهار الكل...و زادة هي مقصرتش معايا...و شيختني...و هذاكا لي حاجتي بيه انا...دوب ما كملت...جبدت روحي منها..و غطست في نوم
_____________________________________
سوار تحكي:
"سوار...سوار...سوار...بنتي الغالية...سوار ايجا عندي...اممممي"..."لاااا سيبني امانك لاا امي تستنا فيا سيبني....سوااار...بنتي....اممممي سلكني امانك"...فتحت عينيا فرد مرة...مع صيحة كبيرة خرجت مني..."اممممممي"...صوتي خرج...بعد 3 ايام من الحادثة...نجمت نحكي...هزيت روحي تقعدت.. غطيت وجهي بيديا الزوز...و فحمت بالبكا...معادش نجم...ياسر تعبت...معادش عندي قوة...توحشت امي...كانو عندي شهور مشفتهاش...توحشت عماد...توحشت بيتي الصغيرة...لي طل عالحومة...الحومة لي تربيت فيها...الحومة لي حبيت ناسها و حبوني...الحومة اللي كنت كل صباح نمشي فيها و نصبح على النسا ليبكرو صباح ربي...و نسمع دعاويهم ليا...الحومة لكنت نحلم نخرج منها عروسة...يمكن لحد من ناسها و لا لحد اخر...تمنيت نرجع طبيبة كبيرة هوني...و الكل يفرح ستانست بالوضع هكا...ستانست بناسي و حومتي...اما...كل حلمة حلمتها طاحت في الما...بعد الليلة هذيكا...معاد عندي حق في حتى شي...مصير بعد اكا نهار مجهول...خسرت كلشي فرد مرة شرفي...قرايتي و اهلي...تكيت لتالي...نشوف مع السقف...و تفكيري بعيد...زعمة كي نخرج من هوني وين باش نمشي...شنوة باش نعمل...زعمة بالحق الشرطة باش جيبلي حقي...زعمة باش يلقاو الحيوان لي عمل فيا هكا...نحس في مخي يتحرق كي نذكر كلامو و صوتو...اعععع مخيبو...يا ريت لا خرجت...و لا عشت ليلة هذيكا...كرهت الرجال و ريحتهم...كرهت جنس ادم جملة...معاد نحمل حتى حد...و لا حد...مخيبهم الكل كيف بعض...مسحت دموعي...تسطحت و سكرت عينيا...نحب نرقد...نحب نرتاح من الدوامة لي دخلت فيها بين ليلة و نهار...نحب ننسى كلشي...و نفيق على صوت امي و ريحة القهوة...نحب نرجع لدارنا و كهو
فقت الصباح...على صوت طبيب يحكي مع الفرملية...حليت عينيا بالسيف...قرب مني يحكي
طبيب:تحس في روحك لباس
هزيتلو براسي باهي...كمل فحصني...و بعد عليا يحكي
طبيب:بعد ساعة باش يجو الشرطة...حاول تحكيلهم كلشي صرا معاك...و هوما باز باش يعاونوك باهي
هزيتلو براسي باهي...اصلا معنديش قوة باش نحكي معاه...تفكيري الكل في امي...و الكلام لباش نقولو لشرطة...ووين باش نمشي بعد ما نخرج من هوني...نحس في راسي باش يطرشق...كمل خدمتو و خرج...جيت باش نتسطح...نشوف في الباب فتح مرة اخرى...اما المرة هاذي...لي دخل مش الطبيب...عينيا وساعت...و انا نشوف معاه...تي اصلا الاشكال هاذي متشوفهاش برشا...تي طولو وحدو قد الباب...جات عيني في عينو...للحظة حسيت ببرودة في بدني...و نفس الخوف لي حسيتو ليلة هذيكا...رجعت تقعدت...ووخرت لتالي...تكيت و كبست بيديا عالفرش...نرقل وحدي..واحد كيف هذا...شيحب عندي...و شمدخلو لهوني...قلبي يدق بالقاوي نحسو باش يطيح...تعدات ليلة هذيكا بين عينيا...الوحش هذاكا تقريبا في نفس جهامتو...تلكمت على روحي...و ركزت مع وجهو...حسيت اني نعرفو...اني شفتو من قبل...اما وين...و الاهم من هكا...شيعمل هوني...و شيحب مني

هاذي حلقة الليلة 😍😍😍 انشاء الله تكون عجبتم 😙💜
#في_احضان_الموت 🔫